Proverbios 8 - La'aqtaqa Ñim Lo'onatac 'Enauacna 2013

Da lỹaxanaxac da naỹaanec

¹ Da naỹaanec ỹataqta nlamaxaren da deỹaxaatac, da naỹaanataxanaxac qaỹa'axaỹa naqa'en da lavilỹaxac.

² Nachaañi hueta'a aca qaỹoqotcheguemec lcomaraxalate, qataq hua'a ca nqa'aic maye hua'axagui ca lỹa nqa'aic,

³ nache ỹo'ot da qaỹa'axaỹa da lavilỹaxac da naloteuga ca lasom, ca ñegueuo maye taỹaua'a ca huaqta'a't nỹecpi, 'eeta':

⁴ «Qami' shiỹaxauapi, 'enauac da qoñiita qami' ỹalamaxatchiguilo naua ỹa'aqtaqa.

⁵ Qami' nsoxoppi maye qaica ca qauaỹaañiỹa'a, qanapaxagueñiỹa qome da sa qanqalaache, qataq qami' 'enaqaiqa qanapaxagueñiỹa qome da qami' huattonaxanaxaiqa!

⁶ Ñaq aỹem qana'axaỹaxañiỹa cha'aye qami' sanema naua ỹoqta huo'o naq 'eneque, qataq naua ỹa'aqtaqa maye ỹaỹamaqchiyiñi.

⁷ Cha'aye de'era shenapec damaye ỹataqta 'eesa, aỹem sa saỹamaxaren da ñasaxauec ca saq'en.

⁸ 'Enauaque naua ỹa'aqtaqa ỹataqta ỹaỹamaqchiyiñi, namayepi saishet da ỹalectaigui ca saq 'en.

⁹ Naamaye ỹataqta ỹataqteguelo naqa'en ca ỹaanataxanaxaic, qataq saishet da imaqta'ape ca ỹaanaxanaxaic.

¹⁰ Ỹataqta qauacoñeeguet qome da ỹapaxaguenataxanaxac saishet da 'eeta'am qanqa'eñi ca plata, qataq na nauattonaxanaxaco saq 'ena'ama qanqa'eñi ca oro.»

¹¹ Da naỹaanec napacalec da lyacỹaxac ca no'on coma', qataq saishet da qanaloqneguet ca ỹaguec da qanqopita.

¹² «Aỹem naỹaanec, nache soota'aguet da naỹaanataxanaxac, qataq aỹem hueto'ot da nauattonaxanaxac qataq da nqataxac.

¹³ Da huo'o naq 'enec qanqa'en Ñim Nataxala' qalaq nachera da ỹo'ot da qaỹaỹemec na qauem. Aỹem saỹemec da 'amqaanaxac qataq apagaqaanaxac, qataq da qauem nataxac qataq na qauema na'aqtaqa.

¹⁴ Aỹem nache aỹem hueto'ot da nqataxac qataq da ntelaqchec, aỹem nache aỹem nauattonaxanaxac qataq na'añaxac.

¹⁵ Nache aỹem chegoqchigui da huo'o da lo'onataxanaxac na nta'alpi, qataq na nataxala'pi da ishet da lapaxañi ca no'on lataxac.

¹⁶ Aỹem chegoqchigui da huo'o naq 'enec na llalaqpi na nta'alpi, qataq na nataxala'pi da ishet da ilo'ogue na shiỹaxauapi maye huetalec ana 'alhua.

¹⁷ Aỹem sauotec ca aỹem ỹauotec, qataq ca aỹem nmittaique aỹem ỹanata.

¹⁸ Aỹem hueto'ot da nsallaxa qataq da ño'oxoyec, qataq da na'amaqchec qataq da qaica ca qaiueetac.

¹⁹ Qaq cam san qalaq napacalec da lyac ca oro, qataq ca aỹem chegoqo'ot napacalec ca 'onaxaic lcat plata.

²⁰ Aỹem shectegue so nalochiguiñi nqa'aic, qataq da llec naua no'o'n lataxaco.

²¹ Ca aỹem ỹauotec qalaq sanem ca lalamaxat, qataq ñelaxatchigui ca lma' da lsallaxa.

²² Ñim Nataxala' aỹem ỹo'ot co'ollaq cheta'ague da ỹo'ot na lo'onatacpi, co'ollaq saxanaxa da ỹo'ot 'enauacna.

²³ Aỹem la'auaxanec da aỹem ỹo'ot co'ollaq cheta'ague da ỹo'ot 'enauacna, co'ollaq saxanaxa da ỹo'ot ana 'alhua.

²⁴ Aỹem nañiguiñi naqa'en co'ollaq saxanaxa da huo'oi naua late'el auaxai, co'ollaq saxanaxa da yo'oq na talapi qataq na mpaxaatasheguem 'etaxat.

²⁵ Sañiguiñi co'ollaq saxanaxa da qalapaxañi ana lcomaraxalatepi qataq ana qasoxonaxapi,

²⁶ co'ollaq Ñimaye saxanaxa da ỹo'ot ana 'alhua qataq naua no'onaxaye, qataq co'ollaq saxanaxa da ỹo'ot so 'alhuolec maye chegaqaigui naqa'en da ỹo'ot ana 'alhua.

²⁷ Ñimaye co'ollaq ỹo'ot na piguem, da yaqto' npa'aỹañi naqa'en na 'etaxat maye huetangui aso auaxai, qaq aỹem nache ñachattaua'a.

²⁸ Qataq co'ollaq ỹo'ottac na lo'oc na piguem, qataq ỹaỹamaxattapiguiñi na qaỹoqchiguingui laponqa' na 'etaxat aso auaxai,

²⁹ qataq co'ollaq ỹauo'oi naua loga'te aso auaxai da yaqto' saishet da jec na 'etaxat, qataq co'ollaq lapaxañi so lo'oxonaxala' ana 'alhua,

³⁰ qaq aỹem ñachattauo, sootaua'a na laỹe Ñimaye. Qaq aỹem machiguiñi naqa'en Ñimaye, qataq 'enauaque naua na'axa'te da aỹem imeteetac da sa'aistac,

³¹ qaq aỹem ñetootapigui' da sootalec ana 'alhua maye lo'onata Ñimaye, ỹataqta samachiguiñi souaxat da ỹo'ot na shiỹaxauapi.

³² Qaq nagui, qami' ỹalaqpi, aỹem qana'axaỹaxañiỹa, qoquiitegue qome da ỹataxac yaqto' qauamaichiguiñi.

³³ Qauloitelec qome na ỹapaxaguenataxanaxacpi yaqto' qami' ỹaanaxanaxaiqa, saishet qome da sa qauacoñeeguet da naỹaanec.

³⁴ Machiguiñi qome ca shiỹaxaua maye aỹem na'axaỹaxana, qataq ca 'enauaque naua na'axa'te da deuataxaatac da hueta'a ñi lasom ñi ima'.

³⁵ Cha'aye ca aỹem ỹanata qalaq ỹanata da lca'alaxa, qataq ỹaconeguet da lchoxonnataxanaxa Ñim Nataxala',

³⁶ Qalaxaye ca aỹem ca'ai qalaq huetalec da lchec da nachaalataxac, ¡qaq ca aỹem nquiỹa, qache ỹauotec da nleuaxa!»