Proverbios 7 - La'aqtaqa Ñim Lo'onatac 'Enauacna 2013

Naua latenataxanaxaco aca 'alo

¹ 'Am ỹalcolec, ỹataqta 'aualaxagueta qome naua ỹa'aqtaqa, qataq ỹataqta 'antoueeta'aque naua ỹamaxasoxonaxaco,

² 'aualaxagueta naua ỹamaxasoxonaxaco qataq naua ỹapaxaguenataxanaxaco, ỹataqta 'antela'alo, 'eeta'am 'anqa'en naua 'ara'aillalel, yaqto' 'anca'alec.

³ Ỹataqta 'aỹa'axatchiguilo naua 'aya'axaatal, qataq 'auachaiguilo da 'antoonaxac.

⁴ 'Eeta'am aca 'arqaỹa 'anqa'en de'era naỹaanec, qataq 'eeta'am 'anqa'en aca 'anauochaxaua de'era naỹaanataxanaxac.

⁵ Yaqto' naamaye 'am ntelaqna'agueta aca 'alo maye lauatapiguiñi' ca sa lhua, qataq aca ỹaqa'a 'alo maye datenataxa'n naua la'aqtaqa.

⁶ Cha'aye aỹem huo'o so na'a'q semeenaxaatac, salletaviigui ñi ỹalloxoqui ñi ima',

⁷ nache selota'a so nsoxoppi maye qaica ca ỹaỹaana'a, qaq somayepi huo'o so 'oonolec ỹataqta qaica ca ỹaỹaana'a.

⁸ Qaq cael ivita aso lamaqai nache ỹa'axasoxoolec so nqa'aic nache ỹalamaxatteua'a so lma' asa'aso 'alo,

⁹ qaq so mashe avit se'eso na'a'q qataq mashe yaqta'a da napalñi.

¹⁰ Nache aso 'alo sanaỹaloxon da nca'ateuga somaye, qaq da lataxac qataq da no'otaxac yo'oqta da quisheguetaxai,

¹¹ qaq asa'aso 'alo yo'oqta da 'oopai, qataq saq ỹataxalec, qataq da sanamaalec ca lma'

¹² qataq huo'o naxa da huetauga so nqa'aic, qataq huo'o naxa da hueta'a na naponqa', qataq naua lamaxal na nqa'aicpi da dauanaxaatac.

¹³ Nache asomaye qapalot so nsoqolec nache napigoxoi', nache qaica ca da'actaique da 'enapega, 'eeta':

¹⁴ «Aỹem san co'ollaxa so ỹa'aqtac, da saneuo ca ỹachetaqtaxanaxat qanhuaachigui, qaq nagui sepacchigui se'eso ỹa'aqtac.

¹⁵ Qaq ỹoqo'oye ñenoxonec da 'am ñanauga, cha'aye huo'o da iyaxa da 'am selo'ot, qaq nagui 'am ñauane'.

¹⁶ Qaq ye imala' mashe llapaqtalec ye ỹataqta 'onaxaic ỹacanec chegaqaigui na lino maye chegaqa'ague da Egipto,

¹⁷ qataq mashe secorelec so coraxat ama da laitaỹaxac, chegaqaigui na qo'oipaq lcha'q, qataq ana áloe qataq na lỹa coraxat.

¹⁸ Ỹoqo'oye 'auanac qome, nache ỹataqta ñemataqta da qaramanaxanaqtaic, ỹataqta qaramachiguiñi qome ivitta'a ca yo'oxoñi,

¹⁹ cha'aye so ihua saishet da hueta'a ye ima', inoxonec qaỹoqtegue ca taigue,

²⁰ somaye ỹache aso qalota alom nache qaỹaloqta da ñe'eguelaq, nato' qom ivita cam laloqnec da ñe'eguelaq.»

²¹ Qaq naua amai' la'aqtaqa maye ñe'eguelaxattrasheguem, nachenaua naua ỹañoxo't da ỹasat se'eso nsoqolec,

²² nache somaye ca'ategue asomaye 'eeta'am ca nauegaxanaxala' huaca da taỹa'a qanqa'en ca nalaataqa', qataq 'eeta'am ca chegaxango da nqoishec,

²³ nache ivitta'a da tagui añi lquiyaqte aca checna, nache 'eeta'am ca qoỹo da maiche taỹa da ỹe'egueneguet ca naleguec, sa ỹaỹaten da mashe daqat da nachaalataxac.

²⁴ Qaq ỹoqo'oye 'am ỹalcolec, nagui aỹem 'ana'axaỹaxana, ỹataqta 'aloteleguete naua ỹa'aqtaqa.

²⁵ Saishet qome da ỹashaxanec da 'arhuennataxac asa'aso 'alo, saishet qome da 'auqat souaxat da 'auca'ategue asomaye,

²⁶ cha'aye mashe qalota so que'emaq souaxat asomaye, qataq ỹataqta qalota so ileu.

²⁷ Qaq ca quegue so nqa'aic maye taỹa'a so lma' asomaye, qaq 'eeta'am da quegue ca nqa'aic maye taỹa'a da nleuaxa.