Proverbios 6 - La'aqtaqa Ñim Lo'onatac 'Enauacna 2013

Nqataxac da qaivita'a ca saishet da qaipaguelec

¹ 'Am ỹalec, da 'anañan da 'auavigaqtaxaalec ca 'anauochaxaua huo'otaq da 'anañan da 'autauan ca ỹaqa'a,

² nache maiche 'am da 'anañan da 'angui aca nqoina, qataq maiche 'am loxonec naua maiche 'ara'aqtaqa.

³ Qaq da yaqto' 'am huesoueeguesop damaye, 'am ỹalec, nache 'auo'ot da 'eeta': 'Axanec da 'ana'amqaanaxac, nache 'anqo'ona camaye nache 'auỹaxanot da 'am isheeten, cha'aye mashe qoueto'oto naua lhuaxaye que'eca 'arỹa.

⁴ Saishet qome da 'auo'ochetañi, qataq saishet da cara'ac da 'anmatec,

⁵ 'auatauec qome qoneta'am aca ñi'imshe da dataueeguesop ca 'ipiaxaic, 'auatauec qome qoneta'am ca qoỹo da dataueeguesop aca nqoina.

Da qanhuogaxa ca hualaic

⁶ 'Am hualaic, 'anqo'ona qome da 'aumeten ca qaguesaq, nache 'aumeteeta ca ỹo'ottacpi nache 'aue'enaxat camaye,

⁷ cha'aye camayepi na'aictoxo' da qaica ca na'aco' qataq qaica ca lataxala' da ỹamaqtac camayepi,

⁸ qalaxaye iqataxanai' na aloq da nvi' na napaxaỹaxa, qataq da ivita da qanqat na ala na nañiguishec, nache choche ỹaỹamaxat na aloq.

⁹ ¡'Am hualaic, nache a'aye qome da 'aro'ochaxa! ¡Nache a'aye da choche 'annaatai'!

¹⁰ Cha'aye da cara'acolec da 'auo'oche, qataq 'ananaqteguiñi na 'aro'ochaxa, qataq da 'ansoxoreuo naua 'arhua'q da yaqto' 'onaxaic na 'aro'ochaxa,

¹¹ nache 'am naỹa'a ca nachoxoyec da 'am icogaxanapec, 'eeta'am ca shiỹaxaua queuoxoic maye na'atchigui ca lo'ogoxonaxat.

Da 'eetec da lataxac ca qauemaic

¹² Cam qauemaic qataq 'etaxaloxoic, camaye ỹa'axattac na shepegaxanaxacpi,

¹³ qataq naquiaxaatai'salo naqa'en naua la'ai'te, da huo'o ye ỹecapega qalaq huota'aisalo naua lapia'ate qataq naua llaxaata,

¹⁴ da lhuennataxa qalaq huetaigui da ñe'etaxaloxo, qataq nache lhuennataxa da ỹo'ot na qauemsat qataq da loquiaxac.

¹⁵ Qaq ỹoqo'oye nque'elaxatta qome da nvita ca nlaguiñi naqa'en, 'eeta'am da choche nlouec qataq ỹamaxa't naua la'ai'te nache nlaguiñi, huaña nache qaica ca ishet da ỹaỹamaxaañi.

Nam saisheteguetpi Ñim Nataxala'

¹⁶ Huo'oi naua seis lataxaco maye saishetegueta Ñim Nataxala', qataq siete naua ỹataqta sa ihuoonegueta Ñimaye:

¹⁷ na'ai'te maye na'amqaanaxaiqa, qataq nachaxat maye shepecaic, qataq nhua'q maye ỹalaua't ca qaica ca ỹasouaxat,

¹⁸ qataq nhuennataxac maye lapaxañi da ỹo'ot na ñe'etaxaloxosat, qataq napia'ate maye nqalgoqta'a da ỹo'ot ca qauem,

¹⁹ qataq ca saq'en ca ỹa'axat, qataq tenataxanaxaic, qataq deloguiỹa't naqa'en ca nqaỹañecpi.

Da qaivitaqtaxanot da nauañe' aca sa nhua

²⁰ 'Am ỹalec, ỹataqta 'aualaxagueta qome naua lamaxasoxonaxaco ca 'arta'a, qataq saishet da qoca'aisalo naua lapaxaguenataxanaxaco aca 'arate'e.

²¹ Ỹataqta 'auachaiguilo qome añi 'arquiyaqte, qataq ỹataqta 'anqolaachiguiñalo qome,

²² yaqto' 'am ỹaueca'agueta da huo'o ca 'aigue, qataq 'am npaxattaleguete da 'auo'ocheta, qataq da 'anlouec nache 'am detaqtacoto.

²³ Cha'aye naua namaxasoxonaxaco nachenaua naua ncoỹaraxanaxaqui', qataq naua napaxaguenataxanaxaco naamaye 'ettaiguilo, qataq naua ntelaqtaxanaxaco nachenaua naua ỹo'o't da llec da achaalataxac.

²⁴ 'Am ntelaqna'agueta qome aca 'alo qauem da lataxac, qataq naua amai' la'aqtaqa aca ỹaqa'a 'alo.

²⁵ Saishet qome da 'auqopitta'a da lyacỹaxac acamaye, qataq sa 'anañaneguet da 'am loxonec da lmeenaxanaxac.

²⁶ Cha'aye aca quisheguetaxai choche quetague' da ilotaique ca aloq, aca lauañe' ca sa lhua qalaq ca'atteguiñi' ca ỹale maye huo'o naqye.

²⁷ Cha'aye ca ỹachalec ana ltogue ca norec, qalaq camaye ỹavi'c caua alogo.

²⁸ Qataq ca queuoỹapigui' quetangui aca poqopi, qalaq camaye ỹavi'c naua lapia'ate.

²⁹ Qataq ca lauañe' aca ỹaqa'a 'alo, qalaq camaye saishet da saqca ca nhuaxanaguec.

³⁰ Cha'aye saishet da qaỹo'otan ca cachaxaic, da decache souaxat na lqouaxa,

³¹ qaq da qaỹauanalec da decachetac, nache camaye iuen da siete da ỹe'eguelaxalec da isheeten ca lcachaxat, qataq ivira'a da ỹanec 'enauac ca lalamaxatpi.

³² Qalaxaye ca lauatapiguiñi' aca ỹaqa'a 'alo camaye ỹataqta qaica ca laỹaanataxanaxac. ¡Qaq cam ỹo'ottac de'era, camaye nlaxattapiguiñi da maiche nachaalataxac.

³³ Qaq camaye maiche talec ca nhuaxanaguec qataq ca nsheunaguec, qataq qaica ca ishet da ỹapalaxat da ne'enaguec.

³⁴ Cha'aye ca ỹale ca'alaxanaxaic 'eeta'am ca norec, sa dechoxonnataxan da ivita da ipalaique ca lvi',

³⁵ qataq saishet da ỹaconeguet ca nsheetenaguec, qataq saishet da nmooñi naqa'en da lalemataic ca qalota nmepi.