Proverbios 5 - La'aqtaqa Ñim Lo'onatac 'Enauacna 2013

Da nqataxac da yaqto' qaivita'aguet aca 'alo 'etaxaloxoi

¹ 'Am ỹalec, 'alotelec qome da ỹaỹaanec, qataq 'ana'axaỹaxanalo naua ỹaỹaanataxanaxaco.

² Yaqto' da 'autaqa qalaq 'aloteguelo naua 'ara'aqtaqa, qataq huo'o da 'arauattonaxanaxac.

³ Cha'aye naua la'aqtaqa aca 'alo 'etaxaloxoi ỹataqta huo'o da lamai'c, qataq da lavilỹaxac ỹataqta isotta,

⁴ qalaxaye da ivita ye loga't naamaye, nache napacalec da lchemaxa aca chemaxarai, qataq napacalec na llaxa ca ỹeelonec maye dos naua llaqa'ate.

⁵ Qaq da qannaicapegue' acamaye nache dauegaqtaxana da nleuaxa, cha'aye naua lqauaxaqui' ỹalamaxattalo aca huachiqui.

⁶ Acamaye ỹataqta sa itena'a da llec da achaalataxac, qataq sa ila'a da saỹaỹamaxañi da lqauaxac.

⁷ Qaq ỹoqo'oye 'am ỹalec, aỹem 'ana'axaỹaxana qome, saisheto' da qoca'ai na ỹapaxaguenataxanaxacpi.

⁸ Qaỹoqta qome 'anqa'en aca ỹaqa'a 'alo, qataq saishet da saqaỹapeque 'anqa'en ca lasom ca lma',

⁹ yaqto' saishet da ỹaqa'a ca taỹot da 'ara'añaxac, qataq da 'anachaalataxac da hueto'ot ca qaica ca iren,

¹⁰ yaqto' ca ỹaqa'a saishet da imatta't ca 'ara'añaqteguishec cam chegaqaigui da 'ara'añaxac qataq da 'aro'onataxanaxac.

¹¹ Ten qom huo'o ca na'a'q nache choche 'antogottac, qom ivita da imeuo da la'añaxac da 'aro'ocỹaxac.

¹² Qaq qoneta' qome: «¡Che'eeto' co'ollaxa da sa saconeguet so nhuogoqtaxanaxac! Qataq ¡che'eeto' co'ollaxa da sa saconegueta naua ñeviraqtagueeco!

¹³ ¡Qataq da sa ña'axaỹaxana so ñapaxaguenaxala'pi, qataq saishet da selo'oguet som aỹem huaqattegapi,

¹⁴ qaq saxanaqca qapio'olec nache sevita da qauem, da aỹem ỹauaachigui 'enauac na shiỹaxauapi!»

¹⁵ Qaq 'anỹomgui qome ca 'etaxat, maye chegaqangui aca maiche 'aralamaqte 'arshere, cam 'etaxat maye chegaqangui aca 'aralamaqte 'araquipiaxaqui.

¹⁶ Qaq saishet qome da 'aucorec ca 'etaxat maye 'aralamaxat, saishet da choche 'aue'en da 'aucorelec da huangui ca nqa'aic.

¹⁷ Cha'aye aca 'arshere qataq ca 'etaxat maiche 'aralamaxat, nache saishet da 'anhuaata'ai' ca ỹaqa'a.

¹⁸ ¡Ỹataqta huetalec qome da no'on aca 'aralamaqte 'anỹomaxaqui! ¡Qaq no'on da 'antonaxaua aca 'ananacte' 'arhua,

¹⁹ acam 'eeta'am aca ñi'imshe maye huotaxanaqtaqai! ¡Acam nache 'eetai' da lauotaxanaqtaic! ¡Qataq nache 'eetai' da lauoche da qoneta!

²⁰ 'Am ỹalec, ¿ta'ainco' taxa da 'anañaneguet aca ỹaqa'a 'alo? ¿Ta'ainco' taxa da 'anshetaique da 'anqapale' aca ỹaqa'a 'alo?

²¹ Cha'aye Ñim Nataxala', ỹaatec naqa'en da lataxac ca shiỹaxaua, qataq ỹaỹaten 'enauaque naua lqauaxaqui'.

²² Cam qauemaic qalaq maiche lqoishec da qauem lataxac, ca maiche lasouaxashet 'eeta'am ca nañec da icoñerai' camaye.

²³ Dam sa ỹaỹamaxañi lataxac nachera da ỹauecta'a da nleuaxa, qataq souaxat da qaica ca ỹaỹaana'a nache taỹa'a da daqat.