Proverbios 31 - La'aqtaqa Ñim Lo'onatac 'Enauacna 2013

Na la'aqtacpi so Lemuel

¹ Na la'aqtacpi so nta'a Lemuel maye lma' ye Masah, nam na'aqtaxanaxacpi maye ỹapaxaguenec co'ollaxa aso late'e, 'eeta':

² 'Am ỹalcolec maye aỹem 'auachegoxoigui co'ollaxa, 'am ỹashelaxanaxat co'ollaq seỹaxanot Ñim Lo'onatac 'Enauacna, ¿negue'tom ca lỹa ỹa'aqtac da 'am sanem? Nacherata da 'eeta':

³ Saishet da 'aumatalec da 'ara'añaxac na 'alpi, ten huo'o na nta'alpi na mashe daqat ỹasouaxat anamayepi.

⁴ Qataq da lỹa, 'am Lemuel, sa ỹaỹamaxañi da na nta'alpi qataq na nataxala'pi da nỹomtapigui na lataxa qataq na ỹactec da lchemaxa namaye,

⁵ cha'aye da nỹomtac nache ishet da icoua'ai na nqataxacpi, qataq qaica ca ỹanaigui ca 'eetapeguec na choxoraqpi.

⁶ 'Aua'axaỹa'a qome na lataxa qataq na ỹactec da lchemaxa namaye, nda'a't da 'aỹa'anem da nỹomgui ca qaica ca la'añaxac qataq ca daquicota,

⁷ yaqto' da nỹom nache icoua'ai da lachoxoyec, qataq saishet da ntoonec da nque'eenaxac.

⁸ 'Anlamaxaren qome da 'autaqlec na sa qana'axaỹaxana da detaqa, qataq 'aueelec qome nam qaica ca iueelec.

⁹ 'Anlamaxaren da 'autaqa, 'auo'ot ca nalochiguiñi lataxac, ỹataqta 'aueelec na choxoraq qataq na huo'o da lhuenaxanaxa.

Ño'oxonnataguec aca 'alo maye no'on da lataxac

¹⁰ Aca no'on 'alo ỹataqta huo'o da lqalaic da qaỹanata, acamaye napacalec da lashiichiỹaxac na ỹataqta no'on coma'.

¹¹ Ca lhua ỹataqta imatalec da lpi'iỹaxac acamaye, qataq saishet da decachetac da yaqto' huo'o aca laueque.

¹² Ỹataqta machiguiñi naqa'en da lavilỹaxac ca lhua 'enauaque naua na'axa'te da nachaalataxac.

¹³ Jec da nmitaique na qagueta laue qataq na lino, qataq ỹataqta nasapatta da ỹo'ottac na lqaleenec.

¹⁴ Qaq 'eeta'am ana notaxaqui da qanayeguelec na 'etaxat maye laỹe' na nmenecpi, maye qaỹoqtegue ca ỹachegoxota'ague na lla'ac nallec.

¹⁵ Da yaqta'a da yo'oxoñi nache ñisheguem, nache iquia'axan na llalaqpi qataq ana llaqtapi.

¹⁶ Imeten ca 'alhua maye qaimeetac nache desheenaxana, nache añi laueque do'onataxana da ỹaañi ana uva.

¹⁷ Ỹataqta huo'o da na'añaxataxac, qataq da lquesaxanaxa da do'onataxaatac.

¹⁸ Qataq ilo'ogue da lo'onataxanaxac da yaqto' qaica cara, qataq ivira'a ye pe da saishet da 'omtalec.

¹⁹ Huota'a na lhua'q da nasoqta'a ana lqaleenaxanaqte qaq na lỹa lhuaq qalaq deqalenaxaatac naqa'en.

²⁰ Itauaatac nataqa'en na choxoraqpi, qataq iviraxatauga na deuenaxaatacpi.

²¹ Saishet da leetapigui lauel da nvi' ana aloñi, cha'aye 'enauac na llalaqpi dapaqchigui na logoxot.

²² Na lapo'pi qalaq maiche lo'onatac, na no'otaxat qalaq ndotec na no'on tocalec da lo'oxoỹaxac qataq na no'on lino.

²³ Qaq so lhua ỹataqta qaỹauattoota cam hueta'a huaqta'a't nỹecpi, qataq ỹataqta nalaigui na 'amaqtaqaicpi ca qanayeuta'a 'alhua.

²⁴ Maiche ỹo'ottac na nogoxotpi qataq na saataxaquipi, ime, nache imenot na nmenaxaicpi.

²⁵ Qataq ỹataqta ỹaatañi da la'añaxac qataq huo'o da 'enec qanqa'en, qataq saq leetapigui lauel naqa'en cam huaigui ca lỹa na'a'q.

²⁶ Qataq ỹaanaxanaxaiqa naua la'aqtaqa da detaqa, qataq huo'o da lsoxoyec da dapaxaguenataxaatac.

²⁷ Ỹataqta ilotegue da llecỹaxac ca lma', qataq sa ỹe'egueeta'a da chec ca saq chegaqaigui da la'añaxac.

²⁸ Qaq da ñisheguem na llalaqpi nache ỹo'oxoreetac qataq ca lhua ỹo'oxoreetac acamaye, 'eeta':

²⁹ «Qalota ana no'on 'alo, qalaxaye 'am, 'anapacalec 'enauac anamayepi.»

³⁰ Da nqopitaxanaqtaic, damaye choche dayenaxan, qataq da nyacỹaxac qaica ca naigui, qalaxaye aca 'alo maye huo'o naq 'enec naqa'en Ñim Nataxala', acamaye ỹataqta 'itchiguiñi da qaỹo'oxoren.

³¹ ¡Qaq acamaye qaỹo'oxoren qome da qaỹalectaigui na ỹotta'a't shiỹaxauapi! ¡Qataq qaỹa'axatec 'enauac na no'on ỹo'otpi!