Proverbios 30 - La'aqtaqa Ñim Lo'onatac 'Enauacna 2013

¹ Naua la'aqtaqa so Agur, som llalec so Jaqué, maye lma' ye Masá. Qaq 'era da la'aqtaxanaxac so Agur maye ỹa'axatem so Itiel qataq so Ucal, 'eeta':

² Aỹem ỹataqta 'eesa da qaica ca saỹaten da salectaigui na shiỹaxauapi, saishet da aỹem hueto'ot ca laỹaanataxanaxac na shiỹaxauapi.

³ Saishet co'ollaxa da ñapaxaguena da llec na naỹaanecpi, qataq saishet da saỹaten da lauattonaxanaxac Ñim ỹataqta qui'itta da lataxac.

⁴ ¿Negue'tom ca ishet co'ollaxa da tasheguema na piguem qataq ñe'eguelaxañi? Qataq ¿negue'tom ca ishet da nllañi na la'at da ỹauota'a na lhuaq? Qataq ¿negue'tom ca ishet da ỹauo'o ca lpataxaalec na 'etaxat aso auaxai? Qataq ¿negue'tom co'ollaxa ca ỹo'o't naua loga'te ana 'alhua? Qataq ¿negue'tom ca ỹaỹaten ca le'enaxat Ñimaye qataq ca le'enaxat ca llalec?

⁵ Ñim Nataxala' ỹataqta mpaxattalec ca pi'iỹa'a Ñimaye, qataq 'enauac na la'aqtacpi ỹataqta ỹo'ot da qaỹa'amaqten.

⁶ Saishet qome da huo'o ca 'anquigaxatapeguec na la'aqtacpi Ñimaye, ten qom 'am iviraxato'ot nache 'eeta'am naqa'en da 'am tenataxanaxaic.

⁷ 'Am maye 'Aro'onatac 'Enauacna dos naua seỹaxaneua'alo da aỹem 'aỹa'anema, saishet da aỹem 'aullapeguema nagui da ñaq saxanaxa da seleu naamaye:

⁸ Ña qaỹoqteuga qome 'anqa'en da sheeta, na saq 'en lataxac qataq na natenataxanaxac, qataq saishet da aỹem sallaxanec 'anqa'en, qataq saishet da ỹoqta aỹem choxoraq 'anqa'en, nacherato' da aỹem 'aỹa'anem qome ca anoq maye ỹoqta seuen ye na'a'q,

⁹ cha'aye saiuena'a da ỹaguec ca anoq nache ishet da 'am seqoleguet, nache sheeta': «¿Negue't que'eca Nataxala'?» huo'otaq da ỹapac saq 'amaqtaq ca anoq nache ishet da secache, huaña nache qaica ca 'enec ñaqa'en da 'are'enaxat 'am Ñatamnaxala'.

¹⁰ Saishet da qauem ca 'ara'aqtac da 'autaxaỹa ca nlatac da 'auatato'ot ca na'aco', cha'aye camaye ishet da 'am ỹasaxalec ca qauem la'aqtac, nache 'anque'etaxaachigui ca naigui cam qauem la'aqtac.

¹¹ Huo'o nam sa ichoxonnai' da detaxaỹa ca lta'a, qataq saq ỹanem ca nqouagaxa aca late'e.

¹² Qataq huo'o na ipi'itaxaatega da qui'itta da lataxac, qalaxaye saishet da iỹouec na ishepaxanaqchet da lataxac.

¹³ Qataq huo'o na ipi'itaxaatega da huo'o naq 'enec, nache ỹataqta na'amaqten da ilota'a ca lỹa.

¹⁴ Qataq huo'o na 'eeta'am naqa'en na ỹeelonec naua lhue, qataq 'eeta'am naqa'en na ỹeelonec naua lanogoshel, da yaqto' nmatchiguiñi da chec na shiỹaxauapi choxoraq, qataq na qaica ca ye maye huetalec ana 'alhua.

¹⁵ Na pit, dos naua llalel, qaq naamaye ndotec da lỹaxanaxa'c, 'eeta': «'Achot, 'achot.» Huo'oi naua tres qataq huo'o so lỹa nache ivi' cuatro, maye saishet da nme da lỹaxanaxa'c:

¹⁶ Añim huachiqui, qataq ana 'alo maye sa deco'o, qataq na 'alhua maye sa nlaxagui na 'etaxat, qataq na norec maye ỹauapec na lalonaxat.

¹⁷ Qaq ca ỹe'enai' ca lta'a da iloto'ot, qataq saỹalaxaguet aca late'e da mashe ỹa'axaino'ole, camaye 'itchiguiñi da na teguesan che'c naua la'ai'te, qataq na vi'ic ỹauta camaye da ileu.

¹⁸ Qataq huo'oi naua tres qataq huo'o so lỹa, nache ivi' cuatro naua ỹo'o't da ỹa'aalaxa qataq saishet da sevi' da saỹate'n ca lataxa'c:

¹⁹ So llec da laỹoxoc na vi'ic da hueto'ot na piguem, so llec na na'araxanaq da hualeguelec ana coma', so llec ana notaxaqui da quetalec ana auaxai, qataq so llec na ỹale da ca'attague' aca 'alo.

²⁰ Aca 'alo maye ncachetague' ca sa lhua, 'eeta' da lataxac: deque'e, qataq iỹogui na alap, ime, nache 'eeta': «Aỹem qaica ca so'ot saỹaỹamaxañi.»

²¹ Qataq huo'oi naua tres maye ỹacholaxa'n ana 'alhua, qataq huo'o so lỹa nache ivi' cuatro, som ỹapactec da sa qanalo'oguet:

²² Ca nlatac maye ivitta'a da nta'a, qataq ca qaica ca ỹaỹaanapec maye chochaq huañi na aloq,

²³ qataq aca 'alo no'otana qalaq ỹanata ca lhua, qataq aca nlata maye ipa'axanauec aca na'acoro.

²⁴ Huo'oi nauatai' cuatro shiguiỹacolqa maye ỹoqta qapio'olqa huetralec ana 'alhua, maye napacaleguete da laỹaanec na ỹaanaxanaxaicpi:

²⁵ Nam qaguesaqpiolec maye qaica ca yo'oqchigui la'añaxac, qalaxaye ỹaqataxanai' na aloq da ivita ye cotap,

²⁶ ana soxona maye salamai' qataq qaica ca la'añaxac, qalaxaye ishet da ỹo'ot na lauacpi da naigui naqa'en ana coma',

²⁷ qataq ana shiiquioxoipi maye qaica ca lta'a, qalaxaye da jec nache ỹataqta inoicchiguiñi,

²⁸ qataq na malaxaic maye nalotaigui na nhuaq da qaỹaconeua'a, qalaxaye ishet da netaigui ca lma' ca nta'a.

²⁹ Qataq huo'oi naua tres shiguiỹa'c maye ỹataqta nya'n da queuotapigui'salo qataq huo'o so lỹa nache ivi' cuatro:

³⁰ Nam llon maye ỹataqta 'añaxaic da ỹalectaigui na laỹepi shiguiỹacpi, qataq saishet da huo'o ca dataueeguesop,

³¹ qataq na polalo, quetaq lhuaraic, qataq ca nta'a maye hua'auta'ague da llec na nalleppi.

³² Da huo'otaq qoneta'am ca qaica ca ỹaỹaanapec da 'ana'amaqten, qataq da huo'otaq huotaique da 'auo'ot ca qauem, nache ỹataqta 'auennataxaata qome,

³³ cha'aye da ỹaguec da qanvittagui na huaca lche' nache ishet da isaxa't, qataq ca na'axannec da nqashen nache ntoguec na lmic, qataq ca inogoqchettac ca lỹa nache ivitta'a da nhuaxan.