Proverbios 3 - La'aqtaqa Ñim Lo'onatac 'Enauacna 2013

Nqataxac da yaqto' qaivi' da naỹaanec

¹ 'Am ỹalcolec, saisheto' qome da 'aucoua'ai na ỹapaxaguenataxanaxacpi, 'oxotoigui qome da 'antoonaxac na ỹamaxasoxonaxacpi,

² yaqto' qaỹoqtrec naua na'axa'te qataq naua vi'iye da 'anachaalataxac, qataq 'am nlaqchigui da 'al-lagaxayec.

³ Saisheto' qome da 'aỹa'axanec da nsoxoyec, qataq da 'eesa lataxac, qataq 'auachetac qome 'eeta'am 'anqa'en aca 'arqola. Qataq 'oxotoigui da 'antoonaxac.

⁴ Yaqto' 'am huetalec da lqouagaxanaqtaic Ñim Lo'onatac 'Enauacna, qataq no'on da 'ana'aqtaguec da 'aualectaigui nam shiỹaxauapi.

⁵ Ỹataqta 'aumato'ot da 'arquiyaqteỹaxac da 'aupi'iỹa'a Ñim Nataxala', qaq saishet da 'aupe'etega da maiche 'araỹaanataxanaxac.

⁶ 'Auacho'ot Ñim Nataxala' 'enauac nam 'auo'otpi, yaqto' Ñimaye ỹo'ot da no'oitegue da 'icỹaxac.

⁷ Saisheto' qome da 'aupettega da 'am ỹaanaxanaxaic, nacherata da huo'o naq 'enec 'anqa'en Ñim Nataxala' qataq qoca'ai nam qauemsat,

⁸ cha'aye nachera da ỹoqta no'on natannaxanaxat, maye ỹa'añaqchet da 'aro'ocỹaxac.

⁹ Huo'o naq 'enec 'anqa'en Ñim Nataxala' maye chegoqo'ot da 'arsallaxa, qataq 'aỹa'anem ca la'auaxanec ala ca 'añiguishecpi,

¹⁰ huaña nache ỹataqta nlaqchigui, ca naỹamaqtaxaqui na ala ca 'añiguishec, qataq ca laỹe' na lataxa.

¹¹ 'Am ỹalcolec, saishet qome da qaica ca naigui 'anqa'en cam lapaxaguenataxanaxac Ñim Nataxala', qataq saishet da 'aunoỹa'aguet Ñimaye da 'am ntenaxaalec,

¹² cha'aye Ñim Nataxala', ỹataqta ỹapaxaguen cam ỹauotec, 'eeta'am ca nta'a da ỹapaxaguen cam lauotaxat llalec.

¹³ Ỹataqta machiguiñi qome ca ỹanata da naỹaanec, cam ỹaconeguet da naỹaanataxanaxac,

¹⁴ cha'aye damaye napacalec da lashiichiỹaxac aca lcat plata, qataq napacalec da lashiichiỹaxac ca oro.

¹⁵ Da naỹaanec napacalec da lashiichiỹaxac ca ỹataqta 'onaxaic coma', qataq napacalec ca ỹataqta qanqopita, cha'aye saishet da ivi' da lyacỹaxac da qanaloqneguet damaye.

¹⁶ Na aloiguishec lhuaq ỹan da logoraic achaalataxac, na ne'emaxashec lhuaq qalaq ỹan da nsallaxa qataq da ño'oxoyec.

¹⁷ Da llecỹaxac damaye ỹataqta 'onaxaic, da qanayecteguelo naua lleco qalaq ỹo'ot da nlagaxayec.

¹⁸ Da naỹaanec chegaqaigui da nachaalataxac cam ỹaconeguet, qaq ỹataqta machiguiñi cam ỹaỹamaxattec damaye.

¹⁹ Ñim Nataxala' do'onataxana co'ollaxa da laỹaanec da ỹo'ot ana 'alhua, qataq do'onataxana da lauattonaxanaxac co'ollaq ỹo'ot na piguem.

²⁰ Qataq ỹauota'a dam laỹaanec co'ollaq iỹottecache na 'etaxat aso auaxai, qataq da 'eetec na lo'oc na piguem da chegaqaigui naqa'en na sheue.

²¹ 'Am ỹalcolec, saishet qome da 'aỹa'axanec da ỹaỹamaqchiguiñi lataxac, qataq 'alotelec da ntelaqchec,

²² cha'aye damaye chegaqaigui da 'arca'alaxa, qataq 'am ỹo'oxoren 'eeta'am aca nqola.

²³ Yaqto' qaica ca tatapigui 'arhuel da qoquetague' ca nqa'aic, qataq saishet da 'auquia'aqañi.

²⁴ Da 'anmatec qalaq qaica ca 'añe'etaique, qataq da 'annaañi qalaq qaica ca machaqca da 'aro'ochaxa.

²⁵ Qataq saishet da 'aye'etega ca nque'elaxatta lchec, qataq cam ñaq naỹa'a da nlaxaañi na qauemaicpi,

²⁶ cha'aye Ñim Nataxala', nache 'eetai' qome da 'am hueta'aguet, qataq 'am ivitaqna'a da 'auapiỹangui aca nqoina.

²⁷ Saishet qome da sa 'anqouaguec ca 'am iỹaxanot da 'autauan, lamaaxa da 'am hueto'ot cam iueetaique camaye.

²⁸ Qataq saishet da 'auatta'a ca lỹa na'a'q da huo'o ca 'artaunaxanaxac maye ishet da 'aỹa'an nagui.

²⁹ Saishet qome da 'auo'otec ca saỹaỹamaxañi, ca 'arỹa maye huo'o da lpi'iỹaxac da qoneta.

³⁰ Qataq saishet da 'anmitta'a da 'ancotaỹapegue' camachaqca da saishet da 'am qaỹo'otec ca saỹaỹamaxañi.

³¹ Saishet qome da 'aupa'agueetac ca sancherapec, qataq saishet da 'aue'enaxat da lataxac,

³² cha'aye Ñim Nataxala' ỹataqta ỹaỹemec na qauemaicpi, qalaxaye nauochaxaua ca no'on da lataxac.

³³ Ñim Nataxala' ỹasaxalec ca qauem ca lma' ca qauemaic, qalaxaye ỹasaxalec da lchoxonnataxanaxa ca lma' ca no'on da lataxac.

³⁴ Ñim Nataxala' ỹataqta ỹe'enai' na 'enaxanaxaicpi, qalaxaye ỹanem da nqouagaxa ca qaica la'amaqchec.

³⁵ Na ỹaanaxanaxaicpi qalaq huo'o da la'amaqchec, na qaica ca ỹaỹaana'a qalaq qaica ca la'amaqchec.