Proverbios 29 - La'aqtaqa Ñim Lo'onatac 'Enauacna 2013

¹ Ca shiỹaxaua maye sa ỹaconeguet da qaỹaỹamaxaañi da lataxac, camaye qaica ca ishet da nca'alaxatec da nque'elaxatta da qailaxachigui.

² Da qaỹatatalec na no'on da lataxac, nache machiguiñi na shiỹaxauapi, qaq da qaỹatatalec na qauem da lataxac, nache na shiỹaxauapi huo'o da nque'eenaxac.

³ Ca ñalec ỹaanaxanaxaic ỹo'ot da machiguiñi ca lta'a, qaq ca nnaigaxaua aca quisheguetaxai qalaq choche ỹa'ashaxan ana alom.

⁴ Ca nta'a maye ỹo'ot da nalochiguiñi lataxac, ỹo'ot da qaica ca iraxaatapigui' na netalec ca na'alhua, qaq ca ndotec da iỹaxaataua'a da nsheetenaxanaxac qalaq taỹañecra naqa'en na netalec que'eca 'alhua.

⁵ Ca ỹale maye choche no'onaxa't naua la'aqtaqa da detaqtacot ca nauochaxaua, camaye choche nqoviitac que'eca lỹa.

⁶ Ca qauemaic qalaq que'emaxama naua maiche lqoinaxanaxaco, qaq ca ỹale no'on da lataxac qalaq nda'a't da machiguiñi.

⁷ Ca no'on da lataxac qalaq iuennata'a da huapegue' ca choxoraq, qaq ca qauemaic qalaq saishet da huo'o ca qochetega.

⁸ Qaq na nogoqtaxanaxaicpi qalaq lliỹa't naqa'en na netaña ca huaqta'a't nỹecpi, qaq na ỹaanaxanaxaicpi qalaq nmanaqche't naua nhuennataxaco.

⁹ Ca ỹaanaxanaxaic da ncotaỹapegue' ca qaica ca ỹaỹaanapec, qalaq na'aictoxo' da dalemata huo'otaq daỹalleguettac, qalaxaye qaica ca ỹachegoxotaigui damaye.

¹⁰ Na laataxanaxaicpi qataq qauemaicpi ỹaỹemec nam nalochiguiñi da lataxac, qataq huotaique da ỹalauat na no'on da lataxac.

¹¹ Ca qaica ca ỹaỹaanapec saỹaỹaten da nllañi da nnogoxonaxac, qaq ca ỹaanaxanaxaic qalaq ỹaỹaten da nllañi da nnogoxonaxac.

¹² Ca nta'a da ỹalaxagueta naua natenataxanaxaco, nache 'enauac na lo'onataxanaxanecpi ỹo'ot na qauem.

¹³ Ca choxoraq qataq ca sa dechoxonnataxan caamaye nache 'eeta'a't, cha'aye Ñim Nataxala' ỹanema caamaye da huo'o da lmeenaxanaxa'c.

¹⁴ Ca nta'a da ỹaỹamaxatchiguiñi da lo'onataxanaxac da ilotague' na choxoraqpi, nache camaye nache 'eetai' da sa nlaguiñi da lo'onataxanaxac.

¹⁵ Ca nalashenaxanaxat qataq da qanlaxanec ca shiỹaxaua damaye chegaqaigui da naỹaanec, qalaxaye ca ñalec maye saiuooneguet da qaitaxaỹot, ỹo'ot da la'aloxo aca late'e.

¹⁶ Na qauemaicpi da qalota nache ỹataqta qalota da ñe'etaxaloxo, qalaxaye na no'on da lataxac ỹauaachigui qom huañi namayepi.

¹⁷ 'Anhuogaxa ca 'aỹa'alec yaqto' 'aulactapiguiñi, qataq ỹataqta 'auamachiguiñi.

¹⁸ Ca huaña da qaica ca nauanaqchec saqcha'a, nache qaica ca naỹamqa', qalaxaye machiguiñi na shiỹaxauapi maye ỹalaxagueta naua nqataxaco.

¹⁹ Saishet da ndotec da qaỹauota'aisalo naua na'aqtaqa da qanlaxanec da lataxac ca nlatac, cha'aye camaye ỹaỹaten damaye, qalaxaye saishet da ỹalaq.

²⁰ Qaq ỹoqta ỹactec da ishet da qanaquita'a ca qaica ca ỹaỹaanapec, cha'aye camaye saq 'ena'am ca sa ilo'oguelo naua la'aqtaqa da detaqa.

²¹ Ca 'aco' da saishet da nhuogaxa ca l-latac da ñaq nogotolec, nache huo'o ca na'a'q qaq choche ntogottague' camaye.

²² Ca sa qaỹaloxonguit da lalemataic ỹo'ot da loquiaxac, qataq ca sancherapec camaye qalota na lsomaxac.

²³ Da ño'oxonnaxac ca ỹale nachera da qaica ca la'amaqchec naqa'en, qaq ca sa na'amqaanaxaic qalaq huo'o da la'amaqchec qanqa'en.

²⁴ Ca huaqtapeeguet ca cachaxaic camaye maiche na'aqchettapeguela't, cha'aye na'aictaxa da hua'aqtega da nsheunaguec qalaxaye sa da'aqtaxan.

²⁵ Da qañe'etega na ỹalleppi damaye nachera da icoñerai' ca shiỹaxaua, qalaxaye ca pi'iỹa'a Ñim Nataxala' camaye ỹataqta qanpaxattalec.

²⁶ Qalota na nmitta'ai da lqouagaxanaqtaic ca nta'a, qalaxaye nacheñita Ñim Nataxala' maye ỹan ca nalochiguiñi lataxac.

²⁷ Na ỹalleppi maye no'on da lataxac saisheteguet na qauemaicpi, qataq na qauemaicpi nataqa'en saisheteguet na no'on da lataxac.