Proverbios 28 - La'aqtaqa Ñim Lo'onatac 'Enauacna 2013

¹ Ca qauemaic qalaq datauec na'aictaxa da saishet da qaicaatac, qaq na no'on da lataxac qalaq 'eeta'am na llon da qaica ca ndaqtaique.

² Da huo'o da loquiaxac ca qanayeutaña 'alhua, nache ỹo'ot da nquictauec na nataxala'pi, qalaxaye ca nataxala' maye huo'o na ỹaỹaten da ilo'ogue camaye nache ỹaỹamaqchiguiñi naqa'en da lataxac que'eca qanayeuta'a.

³ Qaq ca qauemaic maye nhuo' na choxoraqpi, qalaq 'eeta'am na lta'araic auot da nlaxaañi na ala na nañiguishec.

⁴ Qaq ca ca'ai da llec na napaxaguenataxanaxacpi camaye ỹo'oxoreetac qome na qauemaicpi, qaq ca ỹalaxaguet na napaxaguenataxanaxacpi qalaq dataỹa'aguet namayepi.

⁵ Na qauemaicpi qalaq saishet da ỹaỹaten da llec ca ỹaỹamaqchiguiñi lataxac, qaq na nmitaique Ñim Nataxala' qalaq ỹaỹaten 'enauac namayepi.

⁶ Na'aictoxo' da choxoraq ca ỹale qalaxaye huo'o da llo'oxoyec, qaq saq 'ena'am ca sallaxanec qalaxaye qauema naua lhuennataxaco.

⁷ Ca ñalec ỹaanataxanaxaic camaye ipacchiguilo naua lqataxaco Ñim Lo'onatac 'Enauacna, qaq ca saiỹotec ca quia'axaic qalaq ỹo'ot da lcoxo ca lta'a.

⁸ Ca lapootasheguem da lsallaxa maye ỹachegoxotaigui ana nsheetenaxanaqte, camaye laỹootasheguem da lsallaxa da yaqto' talec qome ca nqouaguec na choxoraqpi.

⁹ Ñim Lo'onatac 'Enauacna sa ỹaconeguet da natamnaxac, ca sa ỹalaxagueta naua lqataxaco Ñimaye.

¹⁰ Ca ỹauecta'a ca qauem nqa'aic ca no'on da lataxac, camaye tangui aca maiche lqoina, qalaxaye ca ỹale nalochiguiñi da lataxac, camaye talec da no'on.

¹¹ Ca sallaxanec ipi'itaxaatega da ỹaanaxanaxaic, qalaxaye ca choxoraq qataq ỹaanataxanaxaic, ishet da ỹaỹaten camaye da 'eesa da ỹaanaxanaxaic.

¹² Da ivita da dauegaxan na no'on da lataxac, nache qaỹo'ot ca lta'araic na'ashaxac, qaq da dauegaxan na qauem da lataxac, qalaq nqañoxooñi na shiỹaxauapi.

¹³ Qaq ca ỹoxotchiguiñi ca lasouaxashet qalaq saishet da no'on da llecỹaxac, qaq ca ỹa'axatta qataq ỹaxanec ca lasouaxashet, camaye ishet da qaichoxoren.

¹⁴ Ỹataqta machiguiñi ca shiỹaxaua da huo'o naq 'enec naqa'en Ñim Nataxala', qalaxaye ca qaramta da lquiyaqteỹaxac qalaq taỹa'a da lachoxoyec.

¹⁵ 'Eeta'am ca llon maye desoqtac, huo'otaq aca potai maye nqouaqato, ca qauemaic maye ilotague' na shiỹaxauapi choxoraq.

¹⁶ Ca nta'a qaica ca ỹaỹaanapec camaye nquigaxattauec da huetaiya' naqa'en na shiỹaxauapi, qaq ca saishet da mataxalaic qalaq logoraic da nachaalataxac.

¹⁷ Ca dalaataxan, camaye saishet da vi'iiguet da naneltaxaatac choche ivitta'a aca huachiqui, nache qaica ca ishet da ỹe'egueeta'a da ỹa'axaneguet.

¹⁸ Ca ỹale ỹo'oxoraic camaye ishet da nca'alec, qaq ca 'etaxaloxoic qalaq taỹa'a da lachoxoyec.

¹⁹ Ca do'onataxaatapeguelec ca na'alhua, camaye ivira'a da chochaq huañi na aloq, qaq ca quetague' ca sa do'onataxan qalaq nda'a't da chochaq huañi da lachoxoyec.

²⁰ Ca shiỹaxaua maye npe'et camaye ivira'a da qaỹo'oxoreetac, qaq ca nda'a't da iỹalata'a da lsallaxa, qalaq saishet da saqca ca nhuaxanaguec.

²¹ Qataq saỹaỹamaxañi da qalca'atagui na shiỹaxauapi, cha'aye ivira'a catai' saq 'amaqtaq nallecolec ishet da qaỹasoilec.

²² Ca nda'a't da iuennatega da nsallaxa, camaye saỹaỹaten da naỹa'a da lachoxoyec.

²³ Ca ishet da nlaxan ca lỹa camaye ivira'a da huo'o da nauoche, qaq saq 'ena'am ca choche no'onaxa't naua la'aqtaqa.

²⁴ Ca decachiỹot ca lta'a huo'otaq aca late'e, nache camaye 'eetega da qaica ca lasouaxashet. Qaq camaye nache nauochaxaua na laataxanaxaicpi.

²⁵ Ca quetague' da lqopitaxanaqtaic camaye ỹo'otteua'a da loquiaxac, qaq ca pi'iỹa'a Ñim Nataxala' qalaq camaye nquictasheguem.

²⁶ Qataq ca pe'etegalo naua maiche lhuennataxaco camaye qaica ca ỹaỹaanapec, qaq ca ỹaỹamaqchiyiñi naua laỹaanataxanaxaco qalaq huo'o da lca'alaxa.

²⁷ Ca itauaatac na choxoraq camaye qaica ca iueetac, qaq ca saishet da itauan na choxoraq qalaq camaye qalota da nsheunaguec.

²⁸ Da ivita da dauegaxan na qauemaicpi, nache na shiỹaxauapi nqañoxooñi, qalaxaye da imeuo namayepi nache nachaañi na no'on da lataxac.