Proverbios 27 - La'aqtaqa Ñim Lo'onatac 'Enauacna 2013

¹ Saishet da 'ana'amaqteeta'aguet ca lỹa na'a'q, cha'aye sa 'auaỹaten ca huaigui qom nvi' camaye.

² 'Aua'aqta'a da ỹaqa'a ca 'am ỹo'oxoren, cha'aye saỹaỹamaxañi da maiche 'año'oxoreetapeguela't.

³ Na coma'pi qataq na lsoche namaye ỹataqta qapa'atta, qalaxaye ỹactec da qapa'atta da lalemataic ca qaica ca ỹaỹaanapec.

⁴ Da nayeloxo ỹataqta qauem qataq da nalemataic ishet da huo'o ca ilaxachigui, qalaxaye da nquiỹaxanaqtaic qaica ca ishet da mpaxata'aguet.

⁵ Qataq ỹaỹamaqchiguiñi ca qaichoxotta nviraqtaxanaxac, saq 'ena'am da nauotaxanaqtaic maye saqaichoxot.

⁶ Qataq ỹactec da naigui da qaipi'iỹa'a ca auochaxaua maye deque'emaqtaxan, qaq saq 'ena'am ca choche napigoxoi' ca ipa'agueetac.

⁷ Ca comaraxaic qalaq ivira'a na te'esaq lta'a lli'i da ỹo'otan, qaq ca iqouat qalaq ivira'a na chem 'eeta'am da ama naqa'en.

⁸ Qataq 'eeta'am ca qoỹo da huaỹoteguelec ca huaña cam qaỹoqta naña ca lpata'c, nachera da 'eetec ca shiỹaxaua da coleeteguelec ca huaña cam qaỹoqta naña ca lma'.

⁹ Ca no'on coraxat qataq nchenaxanaxat ama na laita, ỹo'o't da machiguiñi naqa'en da nquiyacteỹaxac, qataq da no'on lqataxac ca auochaxaua huo'o da lamaic naqa'en da achaalataxac.

¹⁰ Saishet qome da 'aualat ca 'anauochaxaua, qataq ca nauochaxauapi ca 'arta'a. Qataq saishet qome da 'anqo'ona ca lma' ca 'arqaỹa qom huo'o ca qouaigui. Ỹactec da no'on ca nhuoreua maye saqaỹapeque, qaq saq 'ena'am ca qaỹoqta nqaỹa.

¹¹ 'Anaỹaanaxanaqcheno' 'am ỹalcolec, yaqto' samachiguiñi, yaqto' aỹem ishet qome da sasateguet ca aỹem ipa'agueetac.

¹² Ca huo'o na ỹaỹaten da ila'a ca lchec nache ivita'a, qaq ca qaica ca ỹaỹaanapec qalaq nache queta choche ivitta'a da nque'etaxangui ca qauem.

¹³ Qataq ca nañaalec da isheeten aca lavigaxaiste ca saỹauatton, qalaq 'auaconalo caua alogo da lpatanaqa 'anqa'en.

¹⁴ Da qaỹa'alaxalec da qaiquin ca auochaxaua da ña qaỹa'aguet na na'a'q, nache damaye 'eeta'am da qainogoqchettac camaye.

¹⁵ Qaq nache 'eetec nataqa'en aca 'alo maye loquiaxai, da 'eeta'am ana sanme llo'oxo da anactac na auot.

¹⁶ Qataq da qanshetaique da qanllañi acamaye qalaq 'eeta'am da qanshetaique da qaỹa'axaneguet na la'at, huo'otaq da qaỹachalec na nhuaq lauel da qanshetaique da qanllañi na aceite.

¹⁷ Da qaiqueuoc ca lcat qalaq qaira'a ca nqueuogaxanaxat lcat, qaq nache 'eetec ca ỹale da maiche ỹaỹamaxaañi da lataxac ca lỹa ỹale.

¹⁸ Ca ntela'a aca higo lcheyec camaye chec qome ana ala acamaye, qataq ca ntela'a ca na'aco' camaye huo'o da ño'oxonnataguec.

¹⁹ Qataq da 'eetec da qaỹalliguingui na 'etaxat, nache yo'oqtelec naqa'en da nasheguiỹaxac, qaq nache 'eetec da lashiguiỹaxac ca ỹale da yo'oqta naqa'en da lquiyaqteỹaxac.

²⁰ Da nleuaxa qataq aca huachiqui saishet da huo'o ca loga't qataq nache 'eetec da lqopitaxanaqtaic ca ỹale saishet da imeuo,

²¹ Na lcat oro qataq na plata qalaq norec na ichoxot da ỹoqta 'eesa, qaq ca ỹale qalaq ichoxot da lataxac da ño'oxonnataguec.

²² Ca qaica ca ỹaỹaanapec na'aictoxo' da 'eeta'am aca nañiguishe ala da ỹataqta qailaxachigui da qaisoigui, qalaxaye camaye saishet da qanqateeguesop da qaica ca ỹaỹaten.

²³ Ỹataqta 'auchemaxatta qome da lataxac ana 'arelo qaguetapi, qataq ỹataqta 'antela'a ne'ena 'ana'atetpi,

²⁴ Cha'aye de'era nsallaxa saishet da tatec, qataq da lataxac ca nta'a saishet da nache queta.

²⁵ Cha'aye da ivita da ñaxat na 'auaqpi, qataq darala ana lañaxataxai, qataq da qalaỹona't na 'auaqpi maye huaigui na aviaq,

²⁶ nache na 'arelo qagueta llalec chegaqaigui na laue na 'ogoxotpi, qaq na 'arelo quetaq llalec qalaq chegaqaigui aca 'om da 'ausheenaxana ca 'ana'alhua,

²⁷ nache ana'ana 'arelo quetaq ỹataqta qalota na lche' da yaqto' 'auque'etac 'am qataq na 'aỹa'alaqpi qataq 'enauac na 'aro'onataxanaxanecpi.