Proverbios 26 - La'aqtaqa Ñim Lo'onatac 'Enauacna 2013

¹ Ana aloñi saq taiguet da huo'oi naua nta'api, qataq na auot da mashe qanqat na ala na nañiguishec, qaq nache 'eetec ca qaica ca ỹaỹaanapec, saq taiguet da huo'o da llo'oxoyec qanqa'en.

² Nache 'eeta'am ca qoỹo maye nỹec le'ec da choche taỹa'aicra' da huaỹotac, huo'otaq ca mayogotolec maye qaica ca lpata'c, qaq nache 'eetec de'era qauem da saishet da choche anac.

³ Ca caaỹo qaira'a ca nhuaxanaxanaxat da qaỹo'oxoỹaqchet, qataq ca 'ashena qoỹanaguilo caua lqueenaxanaqa'ate, qataq ca nhuaxanaxanaxat qairolec ca qaica ca ỹaỹaanapec da qaiuaxan.

⁴ Saishet da 'auasatta'aguet ca qaica ca ỹaỹaanapec, yaqto' saishet da qoneta'am camaye da qaica ca 'auaỹaanapec.

⁵ 'Aua'aqtaxaatem ye hueta'a ca qaica ca ỹaỹaanapec, yaqto' camaye saishet da ipi'itaxaatega da huo'o na ỹaỹaten.

⁶ Da qaỹachoxoolec ca na'aqtac ca qaica ca ỹaỹaanapec, nache 'eeta'am da qaicheguerec naua nchel huo'otaq da qanque'etaxangui da loquiaxac.

⁷ Qataq 'eeta'am ca sa ra'añeeguelo naua lchel, ca qaica ca ỹaỹaanapec da detaxaiguilo naua ỹaanaxanaxaiqa na'aqtaqa.

⁸ Qataq 'eeta'am da qaicoñera'aguet ca coma' ca npocnaxanaxat, da qaỹo'oxoren ca qaica ca ỹaỹaanapec.

⁹ Qataq da 'eetec ca taxaic da sa nanomeguet aca ỹaxat, nache 'eeta'am ca qaica ca ỹaỹaanapec da detaxaiguilo naua ỹaanaxanaxaiqa na'aqtaqa.

¹⁰ 'Eeta'am ca checna lo'o da ỹareetagui 'enauac na nlectot, ca iỹaxana ca qaica ca ỹaỹaanapec da ỹanem ca lo'onatac ca lma'.

¹¹ Ca pioq ỹe'eguelaxa da chec ca alolaxat, qaq nache 'eetec ca qaica ca ỹaỹaanapec da ỹe'eguelaxa da qaica ca ỹaỹaanapec.

¹² Qataq ỹactec da ishet da qanaquita'a ca nauattoola't da qaica ca ỹaỹaanapec, qaq saq 'ena'am ca qaica ca ỹaỹaanapec maye 'eetega huo'o na ỹaỹaten.

¹³ Da yaqto' sa do'onataxan ca hualaic, nache 'eetega huo'o ca llon netangui ca llec, netangui ca nqa'aic ca llon da dauanaxaatac.

¹⁴ Ca lasom ishet da ncolliiñi da netaguilo caua legaxaistel nache 'eetec ca hualaic da nchemaqtapiguiñi da huetalec ca lmala'.

¹⁵ Ca hualaic ỹauota'a lhuaq da ỹacongui ca nquia'axaqui, qalaxaye saỹañoxot da ỹachaigui na alap ca ỹacona.

¹⁶ Ca hualaic ipi'itaxaatega da ỹataqta ỹaanaxanaxaic, da napacaleguete caua siete shiỹaxau' maye ỹaỹate'n da ltaxaỹaxa'c.

¹⁷ Da qaỹe'egueetaua'a ca ỹaqa'a cotaxac, qalaq 'eeta'am da qaỹacoota'alo naua ltela ca pioq.

¹⁸ Qataq 'eeta'am ca huo'o da aloic da ichecnec ana dalaataxanapec lchecnapi maye 'ettaigui,

¹⁹ nachera da 'eetec ca ỹatenachet ca nauochaxaua ime nache 'eetega da choche daỹactac.

²⁰ Da qaica ca nle' lashec nache 'om ca norec, qataq da qaica ca na'aqtaqa lo'o nache imeuo da cotaxac.

²¹ Qataq chegoqchigui ana 'omchigui poqo da 'eroigui qanqa'en ana poqopi, qataq da qaỹalonaxana na qo'oipaq nache 'eroigui ca norec, qataq chegoqchigui ca nogoqtaxanaxaic da qaỹo'ot ca cotaxac.

²² Naua la'aqtaqa ca na'aqtaqa lo'o' ỹataqta huo'o da lamai'c 'eeta'am ca ama nallec, da qaiuoxonañi qalaq ivitchiguiñi da qanallec.

²³ 'Eeta'am ca lcat plata da qalapaxalec aca taxaqui 'alhua, naua huesotte' la'aqtaqa ca ỹachetac na qauem lhuennataxac.

²⁴ Ca dequiỹaxanaqtaxaatac da detaqtac qalaq no'onaxa't naua la'aqtaqa, qalaxaye da lavilỹaxac ipa'axaatauo da qauem lhuennataxac.

²⁵ Ỹoqo'oye saishet da 'aua'amaqten da huesotte' naqa'en naua la'aqtaqa da 'am detaxaỹot, cha'aye naua lhuennataxaco da'aichiguilo na qauem,

²⁶ cha'aye na'aictoxo' da ỹoxotchiguiñi da lquiỹaxa, qalaxaye da qauem lataxac 'enauac da qaỹaỹaana'a't qome.

²⁷ Ca ỹo'ot aca lshere qalaq maiche tangui acamaye, qataq ca ỹamaqtac aca coma' nache aca'aca coma' maiche ipataxañi camaye.

²⁸ Naua na'aqtaqa saq 'e'n ỹataqta ique'emaqche't ca taaleguete naamaye, qataq ca huesotte' naqa'en naua la'aqtaqa taỹa'a naqa'en da huo'o ca nlaguiñi.