Proverbios 25 - La'aqtaqa Ñim Lo'onatac 'Enauacna 2013

¹ Ne'ena nataqa'en la'aqtacpi so Salomón, maye nataqa'en ỹiyiñi co'ollaxa so leraxanaxanecpi so Ezequías, som nta'a ye Judá, 'eeta':

² Ñim Lo'onatac 'Enauacna huo'o da llo'oxoyec souaxat da huo'o na saqcha'a naqa'en da lataxac, qataq na nta'alpi huo'o da llo'oxoyec da ỹaỹaten ne'ena saqcha'api.

³ Ye lshequitcheguema na piguem, qataq ye lshecchiguiña ana 'alhua, qataq na lhuennataxacpi na nta'alpi, namayepi saishet da qaivi' da qaỹaỹaten.

⁴ 'Anqat qome na mpa'aỹauec lshepaxanaxa ca lcat plata, yaqto' ca lcat lo'o ishet da ỹo'ot aca ỹomaxaqui,

⁵ qataq 'anqateua'a na qauemaicpi maye do'onataxaatacot ca nta'a, yaqto' da lo'onataxanaxac camaye ishet da na'attalec da nalochiguiñi lataxac.

⁶ Saishet qome da 'ana'amaqten da 'auatato'ot ca nta'a, qataq saishet da 'ampa'axanapec da qoueta'a ca lanataqa' na 'amaqtaqaicpi,

⁷ cha'aye no'on da maiche 'am qaỹaviguisheguema camaye, qaq saq 'ena'am da qaỹauota'a da 'ara'aloxo da 'am ỹauaachigui na 'amaqtaqaicpi. Ỹoqo'oye da huo'o ca 'auauaachigui,

⁸ nache saishet da 'auỹalapegue' da 'aua'axateua'a ca huaña da huo'o na qanmit, cha'aye saiuena'a da huo'o ca lỹa shiỹaxaua 'am iqoleguet, huaña, nache sa 'auaỹaten ca qonetec.

⁹ 'Anqoleguete' ca 'am ỹasaqtapeguelec 'arasouaxashet ca 'arỹa, qataq saishet da 'auchoxot ca ỹaqa'a qoỹoxottapiguiñi,

¹⁰ cha'aye sa iuena'a da huo'o ca 'am hua'aqchigui, nache ỹauota'a da 'ara'aloxo, nache da qauem 'ana'aqtaguec saishet da qanqatsheguem.

¹¹ Naua na'aqtaqa ỹaỹamaqchiguiñi maye qanasaxarec da huaqchigui da qaiue'n, naamaye 'eeta'ama aca no'onata manzana, maye chegaqaigui na oro qataq qalapaxalec na plata.

¹² Qataq 'eeta'am nataqa'en aca chiguishaqte huo'otaq aca nqola maye chegaqaigui na ndota't oro, cam ỹaỹaten da na'axaỹaxana ca la'aqtac ca ỹaanaxanaxaic.

¹³ Que'eca namaxashec maye ỹataqta ipacchiguilo naua la'aqtaqa ca na'aco', camaye 'eeta'am na latomaxa ana aloñi ca na'a'q maye napaxaỹañi, cha'aye ỹo'ot da dalaxaic la'añaxac ca na'aco'.

¹⁴ Qataq ca huo'o ca ỹachaxanapec da ỹan, qalaxaye saỹauana da huo'o ca ỹan, camaye 'eeta'am da naueguelec na piguem qataq da anac na la'at qalaxaye qaica ca auot.

¹⁵ Da nhualaxavic ishet da nmooñi da lalemataic ca nta'a, qataq naua huesotte' na'aqtaqa ishet da nlaxaayiñi naua qaramte' nhuennataxaco.

¹⁶ Da 'aulalec ca te'esaq lta'a lli'i qalaq saishet da ỹaguec ca qollec, cha'aye sa iuena'a da ỹaguec ca qollec nache 'auanol.

¹⁷ Da 'anamaqtega ca 'anauochaxaua, qalaq saishet da nache 'avi'eguelaqta'a, cha'aye sa iuena'a da 'am nasamiisop nache 'am ỹaỹemec.

¹⁸ Ca shiỹaxaua maye choche datenataxaalec ca nauochaxaua, camaye 'eeta'am aca nhuaxanaxanaqte qo'oipaq, ỹeelonec qataq aca checna ỹaxarai.

¹⁹ Da qaipe'etega ca saq ñara'ac aloic da qanayeuaigui da qui'ic, qalaq 'eeta'am ca huacagaxaic na lche, huo'otaq da qaiquia'axana aca nhue maye huo'o na lauac.

²⁰ Da qaỹo'onaxaalec ca shiỹaxaua maye daquicotac, damaye 'eeta'am ca lataxa 'euaxaic da qaicorelec ca ncolaxa, huo'otaq da qanqa't naua anogo da huo'o na latomaxa.

²¹ Ca 'am nquiỹatega da ilem na lqouaxa, qalaq 'auquia'axan, qataq da huo'o na laquip qalaq 'anỹomaxan,

²² cha'aye da 'auo'ot de'era nache camaye ishet da na'agui 'anqa'en na lashec da la'aloxo, nache Ñim Nataxala' ỹauo'o da 'ansheetenaguec.

²³ Na quenaquiaxaic maye chegaqa'ague da sheu' ishet da anacot na auot, qataq naua qauema na'aqtaqa ỹo'o't da qauem da nasheguiỹaxac.

²⁴ Qataq na'aictoxo' da qanayeetaña na laỹolec ca pa'asheguem ca nỹec, qalaxaye saq 'ena'am da qanayeetaigui na lauel ca lta'araic nỹec da nauoreua aca 'alo petaxai.

²⁵ Qataq 'eeta'am da qanỹomigui na 'etaxat atom da qailem na naquip, da 'eetec da nvi' ca no'on na'axaỹaxac maye chegaqa'a ca qaỹoqta 'alhua.

²⁶ Ca no'on da lataxac da iviloxol da datato'ot ca qauemaic, camaye 'eeta'am na imalaqta 'etaxat qataq aca nshere maye nshepaxan na le'ec.

²⁷ Qataq saỹaỹamaxañi da sa qaỹala'ac da qanallec ca te'esaq lta'a lli'i, qataq saỹaỹamaxañi da qanmitta'ai da maiche ño'oxoyec.

²⁸ Ca saỹaỹaten da nllañi da lhuennataxac, qalaq 'eeta'am ca nỹecpi maye nlaguiñi qataq qaica ca lpaqtaxat.