Proverbios 24 - La'aqtaqa Ñim Lo'onatac 'Enauacna 2013

¹ Saishet qome da 'auqopitta'a na qauemaicpi, qataq saishet da 'auyaqta'a da 'aualectaigui namayepi,

² cha'aye namayepi nda'a't da iuennatapega da ỹo'ot ca loquiaxac, qataq da detaqtac qalaq nda'a't na qauem.

³ Cha'aye da qano'oxoosheguem ca nỹec qalaq qairolec da naỹaanec, qataq da qalapaxañi ca lo'oxonaxala', qalaq qairolec da nauattonaxanaxac,

⁴ qataq chegoqchigui da nauattonaxanaxac da qaiỹoxoigui ca nỹec na no'on nogoxoshetpi maye ỹataqta huo'o da lyac.

⁵ Cha'aye ca ỹaanaxanaxaic ỹataqta huo'o da la'añaxac, qataq ca huattonaxanaxaic nquictasheguem da la'añaxac,

⁶ cha'aye da huo'o ca alaataxac qalaq qaỹaỹamaxatchiguiñi da qaỹo'ot ca llec, qataq ishet da qaivira'a da nauegaxanaxac da qalota na nqataxac lo'opi.

⁷ Ca qaica ca ỹaỹaanapec sa ỹaỹaten ca llec ca la'aqtac da dataỹot ca nmit na nasouaxashet, cha'aye saishet da naloua'a de'era naỹaanec.

⁸ Ca nache 'eetai' da qauema naua lhuennataxaco, qalaq camaye nache le'enaxat qanqa'en da qauema na lhuennataxaco.

⁹ Na lhuennataxacpi ca qaica ca ỹaỹaanapec qalaq ndotec na nasouaxashetpi, qataq ca sairen ca lỹa qalaq qaica ca isheteguet camaye.

¹⁰ Da 'auqalvi qom huo'o ca qouaigui, qache saq 'amaqtaq da 'ara'añaxac.

¹¹ 'Anca'alaxatec qome ca tata'a da l-leuaxa, qataq 'anca'alaxateeguesop da lchec ca ileetapigui'.

¹² Cha'aye na'aictoxo' da qonapec sa 'auaỹaten de'era, qalaxaye Ñi nmit 'enauacna, Ñimaye ỹaỹateetac damaye qataq Ñim 'am ilotague' ỹaỹateeta de'era, Ñim isheeten qome ca lo'onatac ñi 'oonolec shiỹaxaua.

¹³ 'Am ỹalcolec, qollec qome na te'esaq lli'i maye ỹoqta no'on, cha'aye da lamaicỹaxac da taigui na 'ap qalaq ama naqa'en.

¹⁴ Qaq de'era lamaicỹaxac nache 'eeta'am qome 'anqa'en da naỹaanec qataq da nauattonaxanaxac, qaq da 'auanata damaye nache ishet da no'on da 'icỹaxac, qataq da 'anaquitaxac saishet da nlaguiñi.

¹⁵ Saishet qome da 'oicnapec da 'auo'otec ca qauem ca lma' ca shiỹaxaua ỹo'oxoraic, qataq saishet da 'auotaxanec ca lma' camaye,

¹⁶ cha'aye na'aictaxa da siete da huañi ca no'on da lataxac, qalaxaye nache 'ena'am ishet da qaltaq ñisheguem, qaq nam qauemaicpi qalaxaye nache taỹañicra da lachoxoyec.

¹⁷ Qaq saishet qome da 'antootapeguec qom huañi ca 'am ipa'agueetac, qataq qom quia'aqañi camaye nache saishet da 'antootalec,

¹⁸ cha'aye saiuena'a da ỹauaachigui de'era Ñim Nataxala' nache saỹaỹamaxaren, nache da lalemataic Ñimaye ishet da ca'ai naqa'en camaye.

¹⁹ Saishet qome da 'aualemata souaxat na 'etaxaloxoicpi, qataq saishet da 'auqopitta'a na qauemaicpi,

²⁰ cha'aye ca 'etaxaloxoic saishet da no'on ca loga't, qataq ca qauemaic 'eeta'am aca ncoỹaraxanaxaqui da 'om.

²¹ 'Am ỹalcolec, huo'o naq 'enec 'anqa'en Ñim Nataxala' qataq ca nta'a, qataq saishet da 'aualecta'aguet qome na pa'aguenataxanaxaicpi,

²² cha'aye namayepi nque'elaxatta qome da nlaguiñi, qataq qom ivita da ỹan ca lhuaxanaxanaxac Ñim Nataxala', qataq ca nta'a qalaq saishet da huo'o ca ỹaỹaten.

²³ Qaq 'ena nataqa'en na la'aqtacpi na ỹaanaxanaxaicpi, 'eeta': Saỹaỹamaxañi da qalca'atagui na shiỹaxauapi da hueta'a ca huaña da qanmit na nasouaxashet.

²⁴ Cha'aye ca 'eetega qaica ca ỹasouaxat cam huo'o ca lasouaxashet, nache na nhuo' le'ecpi isheuen camaye qataq na ỹotta'a't shiỹaxauapi ỹo'otan camaye.

²⁵ Qalaxaye ca ỹo'ot ca nhuaxanaguec ca huo'o ca ỹasouaxat, camaye machiguiñi, qataq talec da lta'araic nchoxonnataguec.

²⁶ Naua ỹaỹamaqchiyiñi nasataxaco, qalaq machiguiñi naqa'en ca nỹa.

²⁷ 'Auaỹamaxaañi qome na pa'aỹauec 'aro'onatacpi, qataq 'auo'ot ca 'anaxanqa' maye huauga ca 'ano'onaxa, qaq da ime, nache 'ano'oxoosheguem ca 'arma'.

²⁸ Saishet da 'auasaxalec ca saq 'en 'ara'aqtaxanaxac ca 'arỹa, qataq saishet da saq 'en ca 'aua'axat.

²⁹ Saishet qome da 'arhuennataxa da 'apalaique ca 'arvi', da 'aue'enaxata'aguet ca 'am ỹo'otec co'ollaxa ca 'arỹa.

³⁰ Aỹem satelec ye no'onaxa so hualaic, qataq ye lma' ana lañiguishe uva so qaica ca ỹaỹaanapec:

³¹ nache sela'a da ndotec ana ỹaxat nlaqtelec, qataq ivira'a na lapoxonaxat coma' hua'axauec.

³² Qaq can sela'a de'era nache ỹataqta soxotoigui da ñetoonaxac, qataq de'era sauaachigui aỹem ỹapaxaguen.

³³ Qaq cha'aye 'auo'ocheta qataq taqteguelo 'anqa'en na 'arqaic, qataq 'ansoxoreuo naua 'arhua'q da yaqto' no'on da 'aro'ochaxa,

³⁴ nache da nachoxoyec 'am nata'a da 'am icogaxanapec, 'eeta'am ca cachaxaic, qataq da 'arhuenaxanaxa 'eeta'am ca shiỹaxaua da na'atchigui ca lo'ogoxonaxat.