Proverbios 22 - La'aqtaqa Ñim Lo'onatac 'Enauacna 2013

¹ Ỹataqta ỹactec da huo'o naq naigui da no'on na'aqtaguec ca shiỹaxaua qaq saq 'ena'am ca nsallaxa, qataq da no'on da na'aqtaguec ca shiỹaxaua saq 'ena'am ca qalota oro qataq plata.

² Ca sallaxanec qataq ca choxoraq caamaye nache 'eeta'a't, cha'aye caamaye maiche lo'onataqa Ñim Nataxala'.

³ Ca huo'o na ỹaỹaten da ila'a ca lchec nache naneltaxaneguet, qaq ca qaica ca ỹaỹaanapec qalaq nache queta ime qaq maiche nque'etaxangui camaye.

⁴ Da qaica ca na'amaqchec qataq da huo'o naq 'enec qanqa'en Ñim Nataxala', nachera da chegaqaigui da nsallaxa, ño'oxoyec qataq da nca'alaxa.

⁵ Na qauemaicpi qalaq huetangui ca llec ana ỹaxat qataq ana nqoinapi, qaq ca ntela'a da nachaalataxac qalaq ishet da dashelec anamayepi.

⁶ 'Auapaxaguenec qome ca nogotolec da no'on ñecỹaxac, yaqto' qom ivita da ỹa'axaiqui nache saishet da ỹaxanec.

⁷ Ca sallaxanec ỹo'ot da lalamaxat na choxoraqpi, qaq ca 'aalaxanaxaic qalaq nache na'aco' cam ỹa'aalaxanaxan camaye.

⁸ Ca ỹaañi ca qauem qalaq maiche nqat ca chegaqaigui camaye, nache Ñim Nataxala' irolec ca maiche lhuaxanaxanaxat da nlaxaañi camaye.

⁹ Ca choxonnataxanaxaic, camaye huo'o da nchoxonnataguec, cha'aye da huo'o na aloq qalaq nhuaata'ai' na choxoraqpi.

¹⁰ 'auamaqauec qome ca sancherapec yaqto' imeuo da loquiaxac, qataq imeuo na cotaxacpi qataq da nsheunaxanaxac.

¹¹ Ca nta'a ỹauotec ca huesota da lquiyaqteỹaxac, qataq ishet da nauochaxaua ca no'o'n naua la'aqtaqa.

¹² Ñim Nataxala' ỹataqta nauaatalec da naỹaanec, qalaxaye saipaigui naqa'en na la'aqtacpi ca shepecaic.

¹³ Ca hualaic da nshetaique da sa do'onataxan, nache 'eeta': «Huo'o ñi llon netangui na nqa'aic ishet qome da aỹem ỹalauat.»

¹⁴ Naua la'aqtaqa aca 'alo maye lauañi' ca sa lhua, 'eeta'ama aca ỹataqta qaỹoqchiguingui nshere, aca nshere maye Ñim Nataxala' tangui naqa'en ca ỹauo'o da nhuaxanaguec.

¹⁵ Da nhualoxonaxac nachera da huaqta'agueta naua lhuennataxaco na nsoxoppi, qalaxaye da qanqateua'a damaye nache qairolec ca nhuaxanaxanaxat.

¹⁶ Ca nhuo' na choxoraqpi da yaqto' nquictec da lsallaxa, huo'otaq ca ỹachet ca sallaxanec, nache camaye taỹa'a da choxoraq.

Naua treinta la'aqtaqa so ỹaanaxanaxaicpi

¹⁷ Ỹataqta 'ana'axaỹaxanalo qome naua la'aqtaqa na ỹaanaxanaxaicpi, qataq 'aulotelec de'era 'am sapaxaguenec.

¹⁸ Cha'aye damaye ỹataqta 'onaxaic da 'auachaigui da 'antoonaxac, yaqto' ishet da 'avi'eguelaqtalec da 'anasaqtauec.

¹⁹ Qaq nagui 'am sapaxaguenec damaye, yaqto' ishet da 'aupi'iỹa'a Ñim Nataxala'.

²⁰ Qaq aỹem, 'am sanema naua treinta ỹiyigui'she na'aqtaqa, maye huetaiguilo na nqataxacpi qataq nauattonaxanaxacpi

²¹ da yaqto' 'am sapaxaguenec da 'auauatto'n naua 'eesora na'aqtaqa, yaqto' ishet da ỹataqtegue ca 'arasataxac da huo'o ca 'am inat.

²² Saishet da 'aue'enai' da 'anhuo' ca choxoraq souaxat da lachoxoyec, qataq saishet da choche 'aupataxalec ca lasouaxashet ca qaica ca iueelec da huetaua'a ca nmit na nasouaxashet,

²³ cha'aye Ñim Nataxala' ishet da iueelec camaye, nache Ñimaye deuotaxanec nam hueto'ot ca nhuo' camaye.

²⁴ Saishet qome da 'anauochaxaua ca sancherapec, qataq saishet da 'annaigaxaua ca nogaqaic,

²⁵ cha'aye sa iuena'a da 'aulolec da qauem lataxac, nache 'eco' maiche 'anqoviila't.

²⁶ Qataq saishet qome da 'ampa'axaalec da 'ausheeten, aca lavigaxaiste ca ỹaqa'a shiỹaxaua,

²⁷ cha'aye da qaca aca 'arsheetenaxanaqte, nache ishet da ivira'a da qaiuotaxanec ca 'armala', maye 'aro'ochaxala'.

²⁸ Saishet qome da 'anqochenaxat aca togoshaapec la'anaqtepi na 'alhua, maye ỹa'ayiñi co'ollaxa so hua'au 'arta'alpi,

²⁹ Ca shiỹaxaua ỹaỹamaxatchiguiñi ca lo'onataxanaxac, nache camaye ivitta'a da do'onataxanot na nta'alpi, qataq saishet da na'aco' ca qaica la'amaqchec.