Proverbios 21 - La'aqtaqa Ñim Lo'onatac 'Enauacna 2013

¹ Da ntoonaxac ca nta'a da huetaiguilo naua lhua'q Ñim Nataxala', qalaq 'eeta'am na 'etaxat so tala da jec, nache taigue cam ỹamaxague Ñim Nataxala'.

² Ca shiỹaxaua 'eeta'am da ỹaỹamaqchiguiñi naqa'en 'enauac nam ỹo'otpi, qalaxaye Ñim Nataxala', nacheñi ñi nmit na 'eetapeguecpi camaye.

³ Da qaỹo'ot ca no'on qataq ca nalochiguiñi lataxac, qalaq ỹaỹamaxareeta Ñim Lo'onatac 'Enauacna, qaq saq 'ena'am da qoỹaatapegueuo ana nachetaqtaxanaqtepi.

⁴ Naua na'ai'te ño'oxonnaxaiqa qataq da toonaxac maye na'amqaanaxaic, qataq da lhuennataxac na qauemaicpi damaye ỹo'ot na nasouaxashet.

⁵ Da ỹataqta qaiuennataxaalec na qalapaxañipi nache huo'o ca naigui, qaq da nỹalaqtoc ca qaỹo'ot qalaq taỹa'a da nlaguiñi.

⁶ Da nsallaxa maye qaỹachegoxotaigui da natenataxanaxac, damaye saqaỹauec qataq imeuo naqa'en ca nmitta'a da nleuaxa.

⁷ Na qauemaicpi qalaq nlaxaañi da maiche nloquiaxac, souaxat da saishet da ỹo'ot da nalochiguiñi lataxac.

⁸ Da lataxac ca qauemaic namaqtapigui qataq saq ỹataxalec, qaq na ỹo'otpi ca shiỹaxaua ỹo'oxoraic qalaq ỹaỹamaqchiguiñi.

⁹ Na'aictoxo' da qanayeeta'a aca lallemaqhuo na pa'asheguem ca nỹec, qalaxaye saq 'ena'am da qanayeetaigui ca lta'araic nỹec da nhuoreua aca 'alo maye petaxai.

¹⁰ Ca qauemaic qalaq nacherata da iuennatega da ỹo'ot ca qauem, saishet da ichoxoreetac ca lỹa maye 'eeta'am.

¹¹ Da qaỹo'ot da nhuaxanaguec ca sa lhuanguit, nache ỹo'ot da huo'o na ỹaỹaten ca qaica ca ỹaỹaanapec, qaq da qaỹapaxaguen ca ỹaanaxanaxaic nache huo'o da lauattonaxanaxac.

¹² Ñim nalochiguiñi da lataxac Nacheñi ñi imeteetac da lma'ỹaxac ca qauemaic, ỹoqo'oye ỹauaachigui da nlaguiñi ca lma' camaye.

¹³ Ca saishet da hua'axaỹa da nachoxonnaxac ca choxoraq, qaq camaye nataqa'en saishet da qaỹa'axaỹa da ivita da iỹaxanaique ca ntaunaguec.

¹⁴ Ca nachetaqtaxanaxat maye qoỹoxotchiguiñi da qoỹan, nmooñi naqa'en ca lta'araic nalemataic.

¹⁵ Da qaỹo'ot da nalochiguiñi lataxac, nache machiguiñi naqa'en ca no'on da lataxac, qaq na qauemaicpi qalaq taỹa'a da nlaguiñi qanqa'en.

¹⁶ Qaq ca shiỹaxaua da ca'ai da llecỹaxac da naỹaanataxanaxac, camaye taỹa'a da ỹalectaigui na leuaxaicpi.

¹⁷ Qaq ca ỹagaqnauec da lqopitaxanaqtaic na na'ashaxacpi, qataq na lataxa huo'otaq na coraxat ama na laita, camaye taỹa'a da lachoxoyec.

¹⁸ Ca ỹale qauemaic pa'aiguet da nque'eenaxac ca no'on da lataxac, qataq ca que'elaqtaxanaxaic qalaq pa'aiguet da nque'eenaxac ca ỹaỹamaqchiguiñi da lataxac.

¹⁹ Qataq na'aictoxo' da qanayeetalec ca toolec 'alhua qalaxaye saq 'ena'am da qanayeeta'aguet aca 'alo yeloxoi qataq petaxai.

²⁰ Ca lma' ca ỹaanaxanaxaic qalaq huo'o da nsallaxa, qataq huo'o na coraxat ama na laita qaq ca qaica ca ỹaỹaanapec qalaq nda'a't da imetaxateuo 'enauac na hueto'ot.

²¹ Ca quetegue da no'on nataxac qataq da nchoxonnataxanaxa, qalaq camaye ỹanata da lca'alaxa, naỹamaxa qataq ño'oxoyec.

²² Ca ỹaanaxanaxaic ishet da loxonec ca huaqta'a't nỹecpi maye lalamaxat na 'añaxaicpi, qataq ishet da nlaxaañi da la'añaxac ca qanteetacot.

²³ Ca ỹaỹaten da ilotague' ca 'enapec, qalaq saishet da ivireguet ca nque'eenaxac.

²⁴ Ca ño'oxonnaxaic, na'amqaanaxaic, qataq ca sairen ca lỹa, camaye qailonec da sancherapec, souaxat da ỹagaqnauec da napagaqaanaxac.

²⁵ Qaq ca hualaic qalaq ỹalauat da lyaxa, souaxat da saishet da do'onataxanaxa'n naua lhua'q,

²⁶ cha'aye 'enauaque naua na'axa'te da choche iyaqtapigui'. Qaq ca no'on da lataxac qalaq saishet da ỹachetaigui da lashemataic da huo'o ca ỹan.

²⁷ Ñim Nataxala' ỹaỹemec aca lachetaqtaxanaqte na qauemaicpi, lamaaxa da qauem da qoỹaataigui da qoỹaneuo.

²⁸ Ca saq 'en ca ỹa'axat taỹa'a da qailaxachigui, qaq ca ỹaỹaten da na'axaỹaxanaxac qalaq lhuotta'a ca la'aqtac.

²⁹ Ca qauemaic qalaq 'eetega qaica cara da lataxac, qaq ca no'on da lataxac qalaq ỹaỹamaxatchiguiñi da llecỹaxac.

³⁰ Ỹataqta qaica ca naigui ca naỹaanec, naỹaanataxanaxac, qataq ca no'o'n nqataxac da qaỹataỹa'aguet Ñim Nataxala'.

³¹ Ca caaỹo qalaq qaiqataxanai' da yaqto' lhuotta da huo'o ca loquiaxac, qalaxaye Ñim Nataxala' nacheñi ñi ỹo'ot ca nauegaxanaxac.