Proverbios 20 - La'aqtaqa Ñim Lo'onatac 'Enauacna 2013

¹ Na lataxa ỹo'ot da sancherapec ca ỹale, qataq na no'on lataxa ỹo'ot da cotaxac, qaq ca itaqchet namaye qalaq saishet da ỹaỹateetegue ca ỹo'ot.

² Ca nta'a da denotac qalaq 'eeta'am ca quiyoc da desoqtac, qaq ca inogoqchet camaye, nache huetalec da lchec da nachaalataxac.

³ Qataq ỹo'oxoraq ca ỹale da maiche ivita'a ca cotaxac, qaq ca qaica ca ỹaỹaanapec qalaq ishet da ỹo'ot damaye.

⁴ Da ivita da qana'atsheguem na 'alhua, qalaq ca hualaic saishet da da'araxan, qalaxaye da ivita da qanqat na nañiguishec ala, nache nmittaique namaye qalaxaye sa ỹanata.

⁵ Naua nhuennataxaco saqcha'alo 'eeta'ama ca qaỹoqchiguingui 'etaxat, qalaxaye ca sanqalat ỹaỹaten da ỹanatalo.

⁶ Ỹataqta qalota na 'eetega da no'on da lataxac, qalaxaye saishet da saqalaq da qaỹanata ca ỹoqta ishet da qaipi'iỹa'a.

⁷ ¡Ỹataqta ỹo'oxoraq ca no'on da lataxac, qataq machiguiñi ca llalaqpi da quetegue da no'on lataxac camaye!

⁸ Ca nta'a da nso'ooñi da huaña ca qanmit na nasouaxashet, nache da lmeenaxanaxac camaye ishet da ỹauanalec 'enauac na qauem.

⁹ Qaq ỹoqo'oye qaica ca 'enapec: «Aỹem qui'itta añi iquiyaqte, qataq aỹem qui'itta qaica ca ỹasouaxashet.»

¹⁰ Aca naloqnaxanaqte qataq ca naloqnaxanaxat da saipaigui da huo'o ca qanaloqten, qaq caamaye ỹataqta saishetegueta Ñim Nataxala'.

¹¹ Naua ỹo'otta'ape ca nsoqolec nachenaua naua ỹo'o't da qaỹauatton camaye, da ỹaỹamaqchiguiñi qataq no'on da lataxac.

¹² Naua ntela ỹo'ot da na'axaỹaqchec qataq naua na'ai'te ỹo'ot da nauanaqchec, qaq naamaye maiche lo'onataqa Ñim Nataxala'

¹³ Saishet qome da 'anañaneguet na 'aro'ochaxa yaqto' saishet da 'am choxoraq, qataq ỹataqta 'anlotec yaqto' na 'oq saishet da imeuo.

¹⁴ Ca nmenaxaic qalaq, 'enapec: «¡Ỹataqta qauem ne'ena nmenec!» Qalaxaye da mashe desheenaxana nache ño'oxoreetapigui ca lsheenaxanaxat.

¹⁵ Huo'o na oro qataq qalota na ỹataqta 'onaxaic coma', qalaxaye ỹataqta ỹactec da lyacỹaxac naua la'aqtaqa da detaqa ca ỹaanaxanaxaic,

¹⁶ Ca isheeten ca huo'o ca lasouaxashet maye saqaỹauatton, qalaq camaye 'auotaxaneque caua alogo da lpatanaqa 'anqa'en souaxat da itauan ca saqaỹauatton.

¹⁷ Ca ỹale naman da chectac na nallec maye ỹachegoxotaigui da latenataxanaxac, qalaxaye da qaỹoqtegue nache namaye 'eeta'am da qanallectac na 'alhua lsoche.

¹⁸ Na qalapaxañipi da qaỹo'ot qalaq chegoqchigui qanqa'en naua no'o'n nqataxaco, 'eeta'am da loquiaxac da qaỹo'ot qalaq qaiue'n naua no'oñi naỹaanataxanaxaco.

¹⁹ Ca na'aqtaqa lo'o' sa ỹaỹaten da ỹoxooñi ca qoỹoxottapiguiñi, qaq ỹoqo'oye saishet qome da 'aualectapeeguet que'eca na'aqtaqa lo'o'.

²⁰ Ca isheueetac ca lta'a huo'otaq aca late'e, qalaq camaye taỹa'a da ileu, nache taigui ca ỹataqta chaqaic napalaxa.

²¹ Na hua'auchiguiñi nalamaxatpi maye qaica ca lqalaic da qaỹaconeguet, namayepi da ivita ca loga't qalaq saishet da ỹo'ot ca namaicỹaxac.

²² Saishet qome da 'autaqtega da 'aupalaique ca 'arvi', nacherata da 'aupi'iỹa'a Ñim Nataxala' qaq Ñimaye qome 'am itauan.

²³ Ñim Nataxala' saỹaỹamaxaren da qaỹo'onataxana ana naloqnaxanaqte saq 'en, qataq aca naloqnaxanaxaqui maye saỹaỹamaxañi.

²⁴ Ñim Nataxala' nacheñi ñi ilo'oguelo naua lqauaxaqui' ca ỹale, qaq ỹoqo'oye ca shiỹaxaua saishet da ỹaỹaten ca taỹa'ague.

²⁵ Huo'o da lchec ca ỹale da ỹalaxaraic da huo'o ca ỹachaxanapecot Ñim Lo'onatac 'Enauacna, cha'aye da ime da ỹan ca la'aqtac nache cheta'ague da deuennataxaalec.

²⁶ Ca nta'a ỹaanaxanaxaic camaye ishet da ilagaxattac na qauemaicpi, qataq irolec ana namaicnaxanaqte da ilaxachigui.

²⁷ So saqcha'a lca'alaxa ca shiỹaxaua maye chegoqo'ot Ñim Lo'onatac 'Enauacna nacheso so ỹataqta nmi't naua saqcha'alo lhuennataxaco camaye.

²⁸ Da nchoxonnataxanaxa qataq da 'eesa lataxac, nachera da nlletañi ca nta'a, cha'aye da lo'onataxanaxac da nta'a na'attalec da nsoxoyec.

²⁹ Da ỹo'oxoren na nsoxoppi nachera da la'añaxac, qaq da ỹo'oxoren na ỹa'axaiquipi qalaq nachana ana lapagaxai.

³⁰ Na qauemsat da qanataren qalaq qairolec na nque'emaxapi qataq na nhuaxanecpi, cha'aye de'era nhuaxanaxanaxac nachera da no'oita naqa'en da nvilỹaxac.