Proverbios 2 - La'aqtaqa Ñim Lo'onatac 'Enauacna 2013

¹ 'Am ỹalcolec, 'auaỹamaxatteque qome naua ỹa'aqtaqa, ỹataqta 'oxotoiguilo qome da 'antoonaxac naua ỹamaxasoxonaxaco.

² 'Ana'axaỹaxaachigui qome de'era naỹaanec, qataq ỹataqta 'aneguet da 'arquiyaqteỹaxac da naỹaanataxanaxac.

³ Da 'auỹaxanaique da naỹaanataxanaxac, qalaq 'anmatasheguem da 'ara'añaxac, qataq da 'auỹaxanaique da qaica ca qanqalaate',

⁴ da 'anmitaique damaye qalaq 'eeta'am 'anqa'en, da 'anmitaique aca nlayiguishe plata maye qoỹoxooñi.

⁵ Qaq huaña qome nache 'auaỹaten da 'eetec da huo'o naq 'enec qanqa'en Ñim Nataxala', ¡qataq 'auaỹaten da 'eetec da nauattonaguec Ñim Lo'onatac 'Enauacna!

⁶ Cha'aye Ñim Nataxala', nacheñi ñi ỹan da naỹaanec, cha'aye naua la'aqtaqa nache chegaqaiguilo da nauattonaxanaxac qataq da naỹaanataxanaxac.

⁷ Ñimaye itauan qataq ntela'a ca ỹaỹamaqchiguiñi da lataxac qataq ca qaica ca ỹasouaxat,

⁸ qataq ntela'a da llecỹaxac ca nalochiguiñi da lataxac, qataq npaxattalec ca ỹataqta quetegue Ñimaye.

⁹ Huaña nache 'auaỹaten da no'oitegue lataxac, no'on nataxac, qataq qaica ca qaiỹotauga, qataq da no'on ñecỹaxac,

¹⁰ cha'aye da naỹaanec da taigui añi 'arquiyaqte nache da nauattonaxanaxac ỹo'ot da lamaicỹaxac da 'arquiyaqteỹaxac.

¹¹ Da ntelaqchec 'am ntela'a qataq da naỹaanataxanaxac 'am npaxattalec.

¹² Naamaye 'am nca'alaxateeguesopa ca qauem nqa'aic, qataq na shiỹaxauapi maye qauemaicpi,

¹³ nam ca'ai so no'on nqa'aic qataq quegue so nqa'aic maye napalñi,

¹⁴ qataq nqopita da ỹo'ottac na qauem, qataq ntootalec nam qauem ỹo'otpi,

¹⁵ qataq quetague' so nqa'aic namaqtapigui, qataq dasheueeguesop so ỹaỹamaqchiguiñi nqa'aic.

¹⁶ Qataq nataqa'en 'am nca'alaxateeguesop aca ỹaqa'a 'alo, acam saqaỹauanapega maye amai' naqa'en naua la'aqtaqa,

¹⁷ acam ỹalat co'ollaxa ca lhua maye naloxoua, nache icoua'ai so naỹamaxataxac maye ỹanot co'ollaxa Ñim Lo'onatac 'Enauacna.

¹⁸ Da qaica'ata ca lma' acamaye, qalaq 'eeta'am da qanayeegue ca nqa'aic maye taỹa'a da nleuaxa,

¹⁹ cam inoxoneua'a ca lma' acamaye qalaq saishet da ñe'eguelaq, qataq saishet da ỹe'eguelaxa da quegue so nqa'aic maye huetangui da nca'alaxa.

²⁰ Ỹoqo'oye 'am qoquetegue qome so no'on nqa'aic, qataq 'anapaxaguena da lataxac na no'on shiỹaxaua.

²¹ Cha'aye na no'oitegue da lataxac qataq qui'itta, namayepi nache 'eetai' qome da netalec ana 'alhua,

²² na qauemaicpi qataq na que'emaqtaxanaxaicpi, qalaq qanapogosheguem qome qataq qaỹamaqauec.