Proverbios 19 - La'aqtaqa Ñim Lo'onatac 'Enauacna 2013

¹ Na'aictoxo' da choxoraq ca ỹale qalaxaye huo'o da llo'oxoyec, qaq saq 'ena'am ca qaica ca ỹaỹaanapec qataq nogoqtaxanaxaic.

² Sa ỹaỹamaxañi da sa qaiuennataxaalec ca qoỹeetapeguec, qataq da qalota da nỹalaxa nache ỹo'ot da nsomaxac.

³ Da 'eetec da qaica ca ỹaỹaanapec ca ỹale nachera da ỹo'ot da daqat da nqa'aicỹaxac, ime, nache nmaxalec da lasouaqtac camaye Ñim Lo'onatac 'Enauacna.

⁴ Da nsallaxa naueguela't na qalota auochaxauapi, qaq ca choxoraq qalaq ivira'a ca nauochaxaua ỹalat camaye.

⁵ Ca ỹa'axat ca saq 'en qalaq saishet da saqaỹauo'o ca nhuaxanaguec, qataq ca shepecaic qalaq saishet da qoỹet.

⁶ Ca chetaqtaxanaxaic qalaq qalota na nauochaxauapi, qataq 'enauac da qanmitta'a da auochaxaua ca huo'o na ỹaatac.

⁷ Ca choxoraq qalaq ivira'a ca lqaỹañecpi da ỹo'otan, qaq nache 'eetec nataqa'en na nauochaxauapi da ca'ai camaye. Na'aictoxo' da nachoxoreeta da nmittaique ca na'aqtaxane' qalaxaye saishet da ỹanata.

⁸ Ca huo'o na ỹaỹaten qalaq ỹauotec da maiche nachaalataxac, qataq ca ntela'a da laỹaanataxanaxac camaye ivira'a da ỹaỹamaxañi.

⁹ Ca saq 'en ca ỹa'axat saishet da saqaỹauo'o ca nhuaxanaguec, ca shepecaic qalaq iuatta'aguet da nleuaxa.

¹⁰ Ca qaica ca ỹaỹaanapec saq taiguet da huetangui na no'on nogoxoshetpi, qaq nache 'eetec ca choche nlatac saishet da ilotague' na llalaqpi na nta'alpi.

¹¹ Da qaica ca qanqalaate' ỹo'ot da qalhueneguet da nalemataic, qataq ỹo'ot da ño'oxoyec da sa qaiqocha'a ca nogoqtaxanaxac.

¹² Da lalemataic ca nta'a 'eeta'am ca quiyoc da desoqo, qaq da lqouagaxanaqtaic 'eeta'am na 'aỹa da talec na 'auaqpi.

¹³ Ca ñalec qaica ca ỹaỹaanapec qalaq ỹo'ot da nque'eenaxac ca lta'a. Qaq aca 'alo maye ncotaxai qalaq 'eeta'am aca llo'oxo maye sanme.

¹⁴ Caua nta'al chegoqchiguilo da qaỹaconeguet ca nỹec qataq da nsallaxa, Qaq Ñim Nataxala' qalaq chegoqo'ot aca 'alo sanqalat.

¹⁵ Da nhualaxa ỹo'ot na lta'araic no'ochaxa, qataq ca hualaic ỹataqta huo'o na lqouaxa.

¹⁶ Ca ỹalaxaguet da namaxasoxonaxac qalaq ntela'a da maiche nachaalataxac, qaq ca ỹo'otan da lapaxaguenataxanaxac Ñim Nataxala', qalaq camaye ileu.

¹⁷ Da qaỹa'aalaxanaxan ca choxoraq qalaq 'eeta'am da nacheñi Ñim Nataxala' da qaỹa'aalaxanaxan, ỹoqo'oye Ñim Nataxala' maiche isheeten que'eca ỹan aca na'aale.

¹⁸ 'Anhuogaxa ca 'aỹa'alec da ñaq ishet da 'anlaxanec da lataxac, qalaxaye saishet da 'aualauatec de'era nhuaxanaguec.

¹⁹ Ca ỹaguec da lalemataic qalaq ỹaconeguet da maiche nhuaxanaguec, qaq ca nshetaique da nhuogaxa qalaq ỹe'eraxatoigui da lalemataic camaye.

²⁰ 'Auloteguet qome ca nqataxac qataq 'auaconeguet da 'am qanlaxan, yaqto' ishet da 'avira'a da 'am ỹaanaxanaxaic.

²¹ Ca shiỹaxaua qalota na iuennatega da huotaique da ỹo'ot, qalaxaye nachecata ca 'eetapeguec Ñim Nataxala' maye ishet da qaỹo'ot.

²² Ỹataqta qanaquita'a ca shiỹaxaua da no'on da lataxac, na'aictoxo' da choxoraq qalaxaye saq 'ena'am da shepecaic.

²³ Da huo'o naq 'enec qanqa'en Ñim Nataxala' ỹo'ot da nca'alaxa, qataq ỹo'ot da qaica ca machaqca naqa'en ñi 'oonolec qataq saishet da nque'etaxangui ca qauem.

²⁴ Ca hualaic ỹauota'a na lhuaq da ỹacongui ca lquia'axaqui, qalaxaye saỹañoxot da ỹasaxaigui na alap ca aloq.

²⁵ Da 'auaxan ca sancherapec, nache ỹaỹaanataxanaxan ca qaica ca ỹaỹaanapec, qaq da 'anlaxanec ca ỹaanaxanaxaic nache nquictec da lauattonaxanaxac.

²⁶ Ca sa iyacnapec ca lta'a qataq da ỹo'orauec aca late'e camaye ỹo'ot da na'aloxo qataq qaỹa'aguelec que'eca ñalec.

²⁷ 'Am ỹalcolec da sa 'auaconeguet da 'am qanlaxanec, qalaq 'am qoca'ai na no'on nqataxacpi.

²⁸ Ca ỹale saq 'en ca ỹa'axat ỹa'ashaxanai' ca nalochiguiñi lataxac, qaq ca qauemaic qalaq ỹauota'aisalo naua la'aqtaqa da nanorec ca qauem.

²⁹ Mashe sogote da qaiqataxaatai' da nhuaxanaguec na sancherapecpi, qataq na nhuaxanaxanaxat da yaqto' qaiuaxaalec na l-laq ca qaica ca ỹaỹaanapec.