Proverbios 18 - La'aqtaqa Ñim Lo'onatac 'Enauacna 2013

¹ Ca mataxalaic qalaq nmittaique ca maiche 'eetapeguec, qataq dataỹa'aguet 'enauac na no'on nqataxacpi.

² Ca qaica ca ỹaỹaanapec qaica ca lyaxa da huo'o ca ỹaỹaten, nacherata da ño'oxoreetapigui catai' ỹaỹatenolec.

³ Na qauemsat nache lỹateuo da na'aloxo, qataq da 'amqaanaxac ỹo'ot da qaica ca na'amaqchec.

⁴ Naua la'aqtaqa ca ỹale 'eeta'am na 'etaxat maye qaỹoqchiguingui, qataq 'eeta'am na tala la'auataxa da chegaqangui na naỹaanec.

⁵ Sa ỹaỹamaxañi da qaiueelec ca huo'o ca lasouaxashet, qataq sa ỹaỹamaxañi da sa qaiueelec ca qaica ca ỹasouaxat.

⁶ Naua la'aqtaqa ca qaica ca ỹaỹaanapec qalaq ỹo'ot da cotaxac, qataq ne'enaua la'aqtaqa ỹo'otteua'alo da loquiaxac.

⁷ Naua la'aqtaqa ca qaica ca ỹaỹaanapec qalaq nachenaua na maiche nlaxaayiñi camaye, qataq naua maiche la'aqtaqa nachenaua naua maiche que'emaxama.

⁸ Naua la'aqtaqa ca na'aqtaqa lo'o' ỹataqta huo'o da lamai'c 'eeta'am ca ama nallec, maye ỹataqta ivitchiguiñi da qanallec.

⁹ Ca sa ỹaỹateelec da ỹo'ot ca lo'onatac, camaye 'eco' lqaỹa ca ishet da delaqtaxan.

¹⁰ Da le'enaxat Ñim Nataxala' 'eeta'am aca nalloxolate maye na'atchiguiñi da la'añaxac, qataq nachaca aca ỹe'egueetacot naxa na no'on da lataxac da nmittaique da qantela'a.

¹¹ Ca sallaxanec ipi'itaxaatega da 'eeta'am ca huaqta'a't nỹecpi da lsallaxa, qataq 'eeta'am naqa'en ca qaỹoqotcheguemec npaqtaxanaxat.

¹² Da ime da 'amqaanaxac nache anac da saqaipaigui ca qaỹo'ot, qataq da ime da qaica ca na'amaqchec nache nca'attalec da qaica ca qaiueetac.

¹³ Ỹataqta qaica ca naỹaanataxanaxac qataq ỹo'ot da na'agaxa da hua'auñi da qoỹan ca na'aqtac da saxanaxa da huo'o ca qaỹa'axaỹa.

¹⁴ Ca dalolaxaic qalaq nachaañi naqa'en da maiche la'añaxac, qaq ca qaica ca la'añaxac qalaq ¿negue'tom ca ishet da nauaxaỹaxaasheguem?

¹⁵ Da lquiyaqteỹaxac ca ỹaanataxanaxaic ỹaconeguet da lauattonaxanaxac, qaq da la'axaỹaqchec na ỹaanaxanaxaic qalaq nmitta'ai da naỹaanec.

¹⁶ Ca nachetaqtaxanaxat ỹo'ot da qaỹauatec 'enauac na lasompi, qataq ỹo'ot da ishet da qaiviraua'a ca shiỹaxaua maye 'amaqtaqaic.

¹⁷ Ca hua'auñi da nqoleguete' ca lasouaxashet nache 'eeta'am da 'eesa ca la'aqtac, qalaxaye da nvireuo ca npa'aguenaxaua nache nqoleguete' 'enauac na 'enapec camaye.

¹⁸ Da qaỹauota'a qanallichigui ca qaỹo'ot nachera da 'eetec da ime naqa'en ca cotaxac, qataq huesoguilo naqa'en caua ncotatega't.

¹⁹ Ca nqaỹa maye qainogoqchet ỹataqta qaica ca ivireua'a 'eeta'am ca huaqta'a't nỹecpi maye qaỹapotaua'a. Qataq na cotaxacpi qalaq 'eeta'am ca lapoxot ca nỹec lta'araic.

²⁰ Naua la'aqtaqa ñi 'oonolec nachenaua na 'eco' icomaraqche't, qataq ne'enaua la'aqtaqa ỹo'ot da 'eco' ỹaỹem naqa'en camaye.

²¹ Da nca'alaxa qataq da nleuaxa qalaq chegaqaiguilo ca 'enapec ñi nachaxat, qaq ca qalota da ltaxaỹaxac nache maiche nque'etaxaachigui ca naigui naua la'aqtaqa.

²² Ca ỹanata aca lhua qalaq ỹanata da lamaicỹaxac, qataq ỹaconeguet da lqouagaxanaqtaic Ñim Lo'onatac 'Enauacna.

²³ Da detaqa ca choxoraq qalaq nachoxoreeteueguelo naua la'aqtaqa, qaq ca sallaxanec da ỹasat qalaq sansatte' na la'aqtaqa.

²⁴ Huo'o ca auochaxaua maye ỹauecta'a da nlaguiñi ca nauochaxaua, qalaxaye huo'o ca auochaxaua maye napacalec da lauotaxanaqtaic ca nqaỹa.