Proverbios 16 - La'aqtaqa Ñim Lo'onatac 'Enauacna 2013

¹ Ca ỹale lapaxañi na huotaique da ỹo'otpi, qalaxaye Ñim Nataxala' nacheñi ñi ỹan ca pa'atec la'aqtac.

² Ca ỹale 'eeta'am naqa'en da 'onaxaic 'enauac na ỹo'ottacpi, qalaxaye Ñim Nataxala', nacheñi ñi nmit na nhuennataxacpi.

³ 'Aupa'axano'ot Ñim Nataxala' 'enauac na 'anshetaique da 'auo'ot, yaqto' ca 'alapaxañi da 'auo'ot, qalaq ipacchigui.

⁴ 'Enauac na lo'onatacpi Ñim Nataxala', huo'o da maiche lataxac naqa'en, nataqa'en ỹo'ot ca qauemaic da yaqto' taỹa'a ca na'a'q maye huetoigui ca nhuaxanaguecna.

⁵ Ñim Nataxala' saisheteguet na ño'oxonnaxaicpi, ỹoqo'oye taỹa'a naqa'en da ỹauo'o ca nhuaxanaguec.

⁶ Da qaỹapalaxat ca nasouaxashet qalaq qaỹauota'a da nauotaxanaqtaic qataq da 'eesa lataxac. Qataq da huo'o naq 'enec qanqa'en Ñim Nataxala', nache ỹo'ot da qanayeca'ai na qauem.

⁷ Ñim Nataxala' da ỹaỹamaxareeta da no'on lataxac ca ỹale, nache ivira'a na mpa'aguenaxauapi camaye ishet da nmane' naqa'en.

⁸ Na'aictoxo' da saq 'amaqtaq ca naueguec, qalaxaye maiche na'añaqtegueshec, qaq saq 'ena'am ca qalota naueguec maye chegaqaigui ca sa lataxac.

⁹ Ca shiỹaxaua lapaxañi ca huotaique da llecỹaxac, qalaxaye Ñim Nataxala' nacheñi ñim ỹo'otegue da lqauaxac.

¹⁰ Ca nta'a da detaqa qalaq 'eeta'am da nacheñi Ñim Lo'onatac 'Enauacna, ỹoqo'oye da huo'o ca ỹo'ot lataxac qalaq sa depe'enaxan.

¹¹ Aca nalochiguiñi naloqnaxanaqte, qataq naloqnaxanaxaqui, acamaye lalamaqte Ñim Nataxala', cha'aye 'enauac ana naloqnaxanaqtepi maiche lo'onata Ñimaye.

¹² Na nta'alpi qalaq sa ỹaỹamaxaren na qauem qaỹo'otpi, cha'aye da lo'onataxanaxac da nta'a na'attalec da nalochiguiñi lataxac.

¹³ Na nta'alpi ỹaỹamaxareeta ca no'o'n naua la'aqtaqa, qataq 'eesora naua la'aqtaqa.

¹⁴ Da lalemataic ca nta'a ỹa'axata'a da nleuaxa, qalaxaye naua la'aqtaqa ca ỹaanaxanaxaic ishet da nmanaqchet camaye.

¹⁵ Da lamaicỹaxac ca nta'a chegaqaigui da nca'alaxa, qaq da lqouagaxanaqtaic qalaq 'eeta'am na lo'oc maye chegaqaigui ca auot.

¹⁶ Ỹoqta ỹactec da 'onaxaic da qaỹaconeguet da naỹaanec, qaq saq 'ena'am ca oro, qataq da nauattonaxanaxac, napacalec na lcat plata.

¹⁷ Da llecỹaxac ca no'on da lataxac, qalaq qaỹoqtaique naqa'en na qauem, qaq ca ntela'a da maiche no'on lataxac qalaq maiche ntel-la't.

¹⁸ Da 'amqaanaxac, nca'atalec da nlaguiñi naqa'en ca qaỹo'ot, qataq da ime da pagaqaanaxac nache qataq anac da que'eenaxac.

¹⁹ Ỹataqta ỹactec da 'onaxaic da sa na'amaqten ca ỹale, da ỹalectaigui na choxoraqpi, qaq saq 'ena'am da qanhuanaua'a na lhuotaxanaxatpi na na'amqaanaxaicpi.

²⁰ Ca ỹaỹaten da ilo'ogue ca lo'onataxanaxac qalaq camaye ỹataqta nquictasheguem, qataq ỹataqta machiguiñi ca pi'iỹa'a Ñim Nataxala'.

²¹ Ca ỹaanaxanaxaiqa naua lhuennataxaco qalaq camaye qaỹamata'ac da ỹaanataxanaxaic, qaq naua na'aqtaqa soxoraiqa, qalaq nquigaxatec na qaỹaỹaten.

²² Da nauattonaxanaxac chegaqaigui da lca'alaxa ca hueto'ot damaye, qaq da nhuaxanaguec ca qaica ca ỹaỹaanapec qalaq chegaqaigui da maiche no'oopashaxac.

²³ Ca naỹaanaxanaqchen da deuennataxaatac camaye ỹaỹateeta ca nasaxauec la'aqtac, qataq naua la'aqtaqa saishet da qaiqoleguetai'salo.

²⁴ Naua 'onaxaiqa na'aqtaqa 'eeta'ama na te'esaq lli'i da lamaic, naamaye ỹo'ot da lamaic da achaalataxac, qataq ỹo'ot da la'añaxac da no'ocỹaxac.

²⁵ Huo'o ca nqa'aic maye 'eeta'am da ỹashectec, qalaxaye ca loga't camaye huetaña da nleuaxa.

²⁶ Da lamanaxanaqtaic ca 'onataxanaxaic nachera da ỹa'añaqchet da do'onataxan, qataq na lqouaxa maye nanomtapeeguet nachera na ỹamaq camaye.

²⁷ Ca qauemaic nmitta'ai na qauem, qataq naua la'aqtaqa 'eeta'ama na le'eraxa ca norec.

²⁸ Ca qauem da lataxac qalaq ỹo'ot da loquiaxac, qaq ca na'aqtaqa lo'o' qalaq ỹo'ot da pa'aguenaxac.

²⁹ Ca sancherapec ỹatenachet ca lỹa, qataq ỹashaxaneuga ca nqa'aic qauem.

³⁰ Ca naquiaxaalec ana la'aite qache lhuennataxa da ỹo'ot ca qauem, qataq ca inaigui na alac qache mashe ime da ỹo'ot ca qauem.

³¹ Ana napagaxai nachana ana ỹo'oxoren da nqueroxo, qataq anamaye 'itchiguiñi da laueque ca ỹaỹamaqchiguiñi da lataxac.

³² Ỹataqta huo'o da naigui da nhualaxavic qaq saq 'ena'am da na'añaxac, qataq huo'o da naigui da maiche nllapec ñi 'oonolec, qaq saq 'ena'am da noxonec ca huaqta'a't nỹecpi.

³³ Ca ỹale maiche ỹo'ot ca nalletaxac da yaqto' huo'o ca na'achecỹaxac, qalaxaye Ñim Nataxala' nacheñi ñi ỹan ca pa'atec la'aqtac.