Proverbios 15 - La'aqtaqa Ñim Lo'onatac 'Enauacna 2013

¹ Ca nasataxac huesotta qalaq nmooñi naqa'en ca nalemataic, qaq ca nasataxac quia'aqaic qalaq 'eroigui naqa'en ca nalemataic.

² Naua la'aqtaqa ca ỹaanaxanaxaic qalaq chegaqaiguilo da naỹaanec, qaq naua la'aqtaqa ca qaica ca ỹaỹaanapec qalaq chegaqaiguilo da 'oopashec.

³ Ñim Nataxala' hueta'a 'enauac na qanayeetaña, ilotalec 'enauac na soxoraicpi qataq na qauemaicpi.

⁴ Naua na'aqtaqa soxoraiqa qalaq 'eeta'ama aca qo'oipaq chegaqaigui da nca'alaxa, qaq naua na'aqtaqa quia'aqaiqa qalaq na'aqchet da nhuennataxac.

⁵ Ca qaica ca ỹaỹaanapec ỹo'ota'n naua lqataxaco ca lta'a, qaq ca ilotegueta naua nqataxaco camaye sanqalat.

⁶ Ỹataqta qaica ca iueetac ca lma' ca ỹale maye no'on da lataxac, qaq na laueguecpi na qauemaic qalaq qalota naqa'en da cotaxac.

⁷ Na ỹaanaxanaxaicpi naua la'aqtaqa, qalaq ilagaxatrec da naỹaanec, qaq na lhuennataxaco na qaica ca ỹaỹaanapec, qalaq saishet da nache 'eetec de'era.

⁸ Ñim Nataxala' saisheteguet aca lachetaqtaxanaqte na qauemaicpi, qalaxaye ỹamaateguet da natamnaxac na no'on da lataxac.

⁹ Ñim Nataxala' saisheteguet da qauem lataxac na qauemaicpi, qalaxaye ỹauotec ca quegue da nalochiguiñi lataxac.

¹⁰ Ca ỹaxanec da no'on nqa'aicỹaxac camaye sa qaỹala'ac da qanlaxanec, qaq ca sa ỹaỹamaxaren da qaitaxaỹaua'a qalaq taỹa'a da ileu.

¹¹ Da lmeenaxanaxac Ñim Nataxala' ỹaatec naqa'en da nleuaxa qataq ana huachiqui, qaq nache 'eetec nataqa'en da ỹaatec naqa'en naua lhuennataxaco na shiỹaxauapi.

¹² Ca nogoqtaxanaxaic saishet da ỹauotec ca nlaxanec camaye, qataq saishet da nmittaique da ỹalectaigui na ỹaanaxanaxaicpi.

¹³ Aca nquiyaqte da machiguiñi, qalaq machiguiñi naqa'en da nasheguiỹaxac, qaq aca nquiyaqte sa no'oilec, qalaq daquico naqa'en da nasheguiỹaxac.

¹⁴ Ca ỹaanataxanaxaic qalaq nmitta'a da naỹaanec, qaq na qaica ca ỹaỹaanapec qalaq ỹa'añaqchettac da no'oopashaxac.

¹⁵ Ca huetapoigui da nque'eenaxac qalaq 'enauaque naua na'axa'te da qauema naqa'e'n, qaq ca matapiguiñi, qalaq 'enauaque naua na'axa'te da machiguiñi.

¹⁶ Na'aictoxo' da choxoraq ca shiỹaxaua, qalaxaye huo'o naq 'enec naqa'en Ñim Nataxala', qaq saq 'ena'am da sallaxanec ca shiỹaxaua, qalaxaye nda'a't da nque'eenaxac.

¹⁷ Qataq na'aictoxo' da qanallectac ca nallec huoue, qalaxaye huo'o da nsoxoyec, qaq saq 'ena'am da qanallectac ca chaxaraic lapat, qalaxaye huetaigui da nquiỹaxanaqtaic.

¹⁸ Ca sa lhuanguit da lalemataic, camaye ỹo'otteua'a da loquiaxac, qaq ca hualaxauaic, qalaq ỹo'ot da nlagaxayec.

¹⁹ Da nqa'aicỹaxac ca hualaic qalaq nlaqtegue ana le, qaq da llecỹaxac ca no'on da lataxac qalaq no'oitegue.

²⁰ Ca ñalec ỹaanaxanaxaic machiguiñi naqa'en ca lta'a, qaq ca ñalec qaica ca ỹaỹaanapec qalaq qaica naqa'en ca naigui aca late'e.

²¹ Ca qaica ca ỹaỹaanapec qalaq machiguiñi naqa'en da no'oopashaxac, qaq ca ỹaanataxanaxaic qalaq ỹaỹamaxatchiguiñi da lqauaxac.

²² Da sa qannachigui ca qaỹo'ot, nache saipaigui ca qalapaxañi da qaỹo'ot, qaq da qalota na detaxaỹaua'a camaye nache ishet da qaỹañoxot.

²³ Ỹataqta 'onaxaic da ỹaỹamaqchiguiñi ca nasataxac, lamaaxa da huaqchigui da ỹoqta qaiuen.

²⁴ Da llecỹaxac da nachaalataxac ca ỹaanaxanaxaic qalaq taỹasheguema na pa'asheguem, da yaqto' nca'aleeguesop aca huachiqui maye npa'aỹañi.

²⁵ Ñim Nataxala' ilaxachigui ca lma' na ño'oxonnaxaicpi, qalaxaye no'oitai' naqa'en na lalamaxatpi aca pa'ai.

²⁶ Ñim Nataxala' saisheteguet na lhuennataxacpi na qauemaicpi, qalaxaye ỹamaategueta naua na'aqtaqa 'onaxaiqa.

²⁷ Ca qopitaxanaqtaqaic qalaq maiche nlaxattapiguiñi da lma'ỹaxac, qaq ca saỹaconeguet da choche qaisheeten qalaq nache 'eetai' da nca'altauec.

²⁸ Ca ỹale no'on da lataxac qalaq hua'auñi da deuennataxaalec ca huotaique da nasaxauec la'aqtac, qaq naua la'aqtaqa ca qauemaic qalaq nlaqchiguilo na qauem.

²⁹ Ñim Nataxala' qaỹoqtaique naqa'en na qauemaicpi, qalaxaye hua'axaỹa da natamnaxac ca no'on da lataxac.

³⁰ Da no'on lmeenaxanaxac naua na'ai'te, qalaq machiguiñi naqa'en da nquiyaqteỹaxac, qaq ca no'on na'axaỹaxac qalaq dalaxaic naqa'en da na'añaxac.

³¹ Ca na'axaỹaxana ca nvitaqtaxanaxac maye deca'alaqtaxa'n, qaq camaye ỹalectaigui na ỹaanaxanaxaicpi.

³² Ca sa ỹaconeguet da qanlaxanec, qache sa ỹauotec da nachaalataxac, qaq ca ỹaconeguet da qanlaxanec qalaq ỹaconeguet da naỹaanataxanaxac.

³³ Da huo'o naq 'enec qanqa'en Ñim Nataxala', damaye dapaxaguenataxanec da naỹaanec, qaq da qanshetaique da qaỹaconeguet da ño'oxoyec, qalaq hua'auñi qanqa'en da qaica ca na'amaqchec.