Proverbios 14 - La'aqtaqa Ñim Lo'onatac 'Enauacna 2013

¹ Aca 'alo ỹaanaxanaxai no'oxoosheguem ca lma', qaq aca qaica ca ỹaỹaanapec qalaq nlaxaañi.

² Ca no'oitegue da lataxac qalaq huo'o naq 'enec naqa'en Ñim Nataxala', qaq ca sa ỹaỹamaxañi da lataxac qalaq ỹo'otan Ñimaye.

³ Naua la'aqtaqa ca qaica ca ỹaỹaanapec qalaq chegaqaiguilo da na'amqaanaxac, qaq naua la'aqtaqa ca ỹaanaxanaxaic qalaq npaxattaleguete camaye.

⁴ Da qaica ca nauegaxanaxala'pi huaca, nache qui'itchigui ca laỹe' na ala na trigo, cha'aye da la'añaxac ca nauegaxanaxala'pi nquiguec naqa'en na ala na nañiguishec.

⁵ Ca na'aqtaxanaxanec maye 'eesa saishet da datenataxan, qaq ca na'aqtaxanaxanec maye saq 'en qalaq ỹa'axat ca saq 'en.

⁶ Ca nogoqtaxanaxaic qalaq nmittaique da naỹaanec qalaxaye saishet da ỹanata, qaq ca ỹaanataxanaxaic qalaq qaica ca lqalaic da ỹanata da naỹaanec.

⁷ Qoca'ai qome ca qaica ca ỹaỹaanapec, cha'aye naua la'aqtaqa sa 'auachegoxotaiguilo ca 'arauattonaxanaxac.

⁸ Da laỹaanec ca ỹaanaxanaxaic ỹo'ot da ỹaỹateetegue da lataxac camaye, qaq ca qaica ca ỹaỹaanapec qalaq maiche ỹatenachet da no'oopashaxac.

⁹ Na qaica ca ỹaỹaanapec qalaq lashetac na maiche lasouaxashetpi, qaq na ỹalleppi maye no'on da lataxac qalaq huo'o da nchoxonnataguec.

¹⁰ Añi nquiyaqte ỹauatton da maiche lalamaxat nqui'ic, qataq da lamaicỹaxac saishet da ỹaỹaten ca ỹaqa'a shiỹaxaua.

¹¹ Ca lma' na qauemaicpi qalaq taỹa'a da nlachiguiñi, qaq ca lma' na no'on da lataxac qalaq nquictasheguem.

¹² Huo'o ca nqa'aic maye 'eeta'am da ỹashectec, qalaxaye ca loga't camaye huetaña da nleuaxa.

¹³ Ivira'a da naỹalliguiyec nataqa'en ỹo'ot da lqui'ic añi nquiyaqte, qataq ye loga't da namaicỹaxac, damaye naquicoxo.

¹⁴ Ca qaica ca ỹaỹaanapec qalaq ỹaỹamaxareeta da maiche lataxac, qaq ca no'on da lataxac qalaq machiguiñi naqa'en nam ỹo'otpi.

¹⁵ Ca qaica ca ỹaỹaanapec ỹa'amaqten 'enauac nam qaỹa'axatem, qaq ca huo'o na ỹaỹaten qalaq ilotague' da lqauaxac.

¹⁶ Ca ỹaanaxanaxaic ñi'iỹa'aguet ca qauem qataq ca'ai camaye, qaq ca qaica ca ỹaỹaanapec qalaq qaica ca huotaique.

¹⁷ Ca saq ỹoxonguit da lalemataic qalaq saishet da deuennataxaalec ca ỹo'ot, qaq ca deuennataxaalec ca ỹo'ot qalaq ỹaỹaten da nhualaxauen.

¹⁸ Na qaica ca ỹaỹaanapec qalaq talec da qaica ca ỹaỹaana'a, qaq na ỹaanataxanaxaic qalaq laueguec da lauattonaxanaxac.

¹⁹ Na qauemaicpi qalaq ỹa'aroto naua l-llecte na soxoraicpi, qaq na qauem da lataxac qalaq nachoxoreetacot qataq hueta'a ca nasom na no'on da lataxac.

²⁰ Ca choxoraq qalaq ivira'a na nauochaxauapi da ỹaỹemec camaye, qaq ca sallaxanec qalaq qalota na nauochaxauapi.

²¹ Ca ỹo'otan ca nauochaxaua qalaq huo'o da lasouaxashet, qaq ca ichoxoren na choxoraq qalaq ỹataqta machiguiñi.

²² Ca nmitta'ai da ỹo'ot na qauem qalaq deqat da llecỹaxac, qaq na nmitta'ai da ỹo'ot ca ỹaỹamaqchiguiñi qalaq 'eesa qanqa'en qataq nauotaxat.

²³ 'Enauac na qana'añaxaalec no'onatacpi huo'o ca naigui, qaq na qalota na'aqtacpi qalaq ỹo'ot da nachoxoyec.

²⁴ Da laỹaanec ca ỹaanaxanaxaic nachera da ỹo'ot da llo'oxoyec, qaq ca qaica ca ỹaỹaanapec qalaq laueguec da no'oopashaxac.

²⁵ Ca 'eesa na'aqtaxanaxanec qalaq nca'alaxateeguesop da l-leuaxa ca lỹa, qaq ca saq 'en na'aqtaxanaxanec, qalaq ỹo'otec da l-leuaxa ca lỹa.

²⁶ Da huo'o naq 'enec qanqa'en Ñim Nataxala', nachera da ỹo'ot da 'eesa naqa'en da aquitaxac qataq npaxattalec na ñalaqpi.

²⁷ Da huo'o naq 'enec qanqa'en Ñim Nataxala', nachera da chegaqaigui da nca'alaxa, qataq nca'alaxateeguesop ca shiỹaxaua da loxonaxanaxac da nleuaxa.

²⁸ Ca nta'a da qalota na ilotague', nachera da ỹo'ot da llo'oxoyec camaye, qaq ca llalec ca nta'a da saq 'amaqtaq na ilotague', qalaq nachera da nlaguiñi naqa'en camaye.

²⁹ Ca qaỹoqchiguinguit da lalemataic camaye ỹoqta ỹaanataxanaxaic, qaq ca sancherapec qalaq ỹachaxan da ne'enaxac.

³⁰ Da ỹe'emaqtac da nquiyaqteỹaxac, nache no'oita naqa'en da no'ocỹaxac, qaq da nquiỹaxanaqtaic qalaq ivira'a da iche'c naua npi'ineqa.

³¹ Ca qaica ca naigui naqa'en ca choxoraq qalaq camaye inogoqchet Ñim Lo'onatac 'Enauacna, qalaxaye Ñimaye ỹo'oxoren ca ichoxoren ca choxoraq.

³² Ca qauemaic qalaq nlaxaañi da maiche lle'etaxaloxo, qaq ca ỹale no'on da lataxac qalaq npaxaalec da maiche ño'oxonnataguec.

³³ Añi lquiyaqte ca ỹaanaxanaxaic nache huetanguit da naỹaanec, qalaxaye na qaica ca ỹaỹaanapec saishet da ỹauatton damaye.

³⁴ Naua nalochiyiñi lataxaco ỹo'ot da la'amaqchec ca shiỹaxauapi, qaq da ñe'etaxaloxo qalaq ỹo'ot da la'aloxo ca shiỹaxauapi.

³⁵ Ca nlatac maye sanqalat camaye lauotaxat ca nta'a, qaq ca 'enaqaic qalaq lquiỹaxat camaye.