Proverbios 13 - La'aqtaqa Ñim Lo'onatac 'Enauacna 2013

¹ Ca ñalec ỹaanaxanaxaic ỹaconeguet na lapaxaguenataxanaxacpi ca lta'a, qaq ca saiuooneguet da qaitaxaỹot qalaq saiqocha'a na nqataxacpi.

² Ñi 'oonolec maiche ỹaconeguet da alaỹaxac na la'aqtacpi, qaq na que'elaqtaxanaxaicpi qalaq huo'o da lyaxa da ỹo'ot da loquiaxac.

³ Ca ilo'oguelo naua la'aqtaqa qalaq maiche ntela'a da nachaalataxac, qaq ca qalota na la'aqtacpi qalaq maiche nlaxattapeguela't.

⁴ Ca hualaic huo'o ca nqopittaique qalaxaye saishet da ỹanata, qaq ca 'onataxanaxaic qalaxaye ishet da nquictasheguem.

⁵ Ca no'on da lataxac saisheteguet ca natenataxanaxac, qaq ca qauemaic qalaq ỹo'ot da na'agaxa qataq qauem da na'aqtaguec.

⁶ Naua ỹaỹamaqchiyiñi lataxaco mpaxattaleguete ca ỹale qaica ca ỹasouaxat, qaq na qauemsat qalaq nlaxaañi ca 'etaxaloxoic.

⁷ Huo'o na qaica ca ye qalaq 'eetega sallaxanec, qataq huo'o na sallaxanec qalaq ỹe'enaxat da choxoraq.

⁸ Da lsallaxa ca sallaxanec nachera da nca'alaxatec da nachaalataxac, qaq ca choxoraq qalaq saishet da hua'aqtega ca narenaguec.

⁹ Ca no'on da lataxac 'eeta'am ana ncoỹaraxanaxaqui da 'ettaigui, qaq na qauemaicpi qalaq 'eeta'am aca ncoỹaraxanaxaqui da 'omchigui.

¹⁰ Da 'amqaanaxac ỹo'oteua'a da loquiaxac, qaq da naỹaanec qalaq hueta'aguet ca sa na'amaqten.

¹¹ Da nỹalaqtoc nsallaxa, damaye taỹañecra, qaq ca npottac da laỹonaxanaxac qalaq nquictasheguem da lsallaxa.

¹² Ca aquitaxac maye saipaigui, qalaq daỹalli naqa'en añi nquiyaqte, qaq ca qoỹeetapeguec da ipacchigui qalaq 'eeta'am aca qo'oipaq maye huo'o da lca'alaxa.

¹³ Ca saishet da ilo'oguet ca napaxaguenataxanaxac qalaq taỹa'a da deqat, qaq ca huo'o naq 'enec naqa'en ca namaxasoxonaxac qalaq huo'o ca nsheetenaguec.

¹⁴ Da lapaxaguenataxanaxac ca ỹaanaxanaxaic chegaqaigui da nca'alaxa qataq ishet da nca'alaxateeguesop ca ỹale da loxonaxanaxac da nleuaxa.

¹⁵ Naua qailoteguelo na'aqtaqa ỹo'ot da qaỹauotec ca shiỹaxaua, qaq da llecỹaxac na saipaguelguete naua la'aqtaqa qalaq taỹa'a da nlaguiñi.

¹⁶ Ca huo'o na ỹaỹaten qalaq ỹaỹamaxatchiguiñi da huo'o ca ỹo'ot, qaq na qaica ca ỹaỹaanapec qalaq na'amqaañigui da no'oopashaxac.

¹⁷ Ca na'aqtaxanaxanec qauemaic ỹo'ot na cotaxacpi, qaq ca no'on na'aqtaxanaxanec qalaq ỹo'ot da nlagaxayec.

¹⁸ Ca ỹo'otan na nqataxacpi qalaq taỹa'a da lachoxoyec qataq qaica ca llo'oxoyec, qaq ca ỹasateguet da qaitaxaỹaua'a qalaq ỹaconeguet ca ño'oxonnataguec.

¹⁹ Da ipacchigui ca qoỹeetapeguec qalaq ỹo'ot da namaicỹaxac. Qaq na qaica ca ỹaỹaanapec qalaq saishet da ca'ai na qauem.

²⁰ Ca sa iỹotec na ỹaanaxanaxaicpi qalaq nataqa'en ỹaanaxanaxaic, qaq ca sa iỹotec na qaica ca ỹaỹaanapec qalaq taỹa'a da deqat.

²¹ Na qauemsat qalaq ca'attapiguiñi' na 'etaxaloxoicpi, qaq na no'on da lataxac qalaq nsheetenaxat da ỹaỹamaqchiguiñi.

²² Ca ỹale no'on da lataxac qalaq no'onaxata'aguet na laualpi na lalamaxatpi, qaq da lsallaxa ca 'etaxaloxoic qalaq talec ca no'on da lataxac.

²³ Ca no'onaxa ca choxoraq qalaq saqoue na qanallec, qalaxaye qalota na daqat namaye souaxat da qaica ca nalochiguiñi da lataxac.

²⁴ Ca saishet da nlaxanec ca llalec qache saishet da ỹauotec, qaq ca ỹauotec ca llalec qalaq nlaxanec da lataxac camaye.

²⁵ Ca no'on da lataxac qalaq ỹataqta comaraxaic da deque'e, qaq ca qauemaic qalaq nda'a't na lqouaxa.