Proverbios 12 - La'aqtaqa Ñim Lo'onatac 'Enauacna 2013

¹ Ca ỹauotec da napaxaguenataxanaxac camaye ỹauotec da naỹaanec, qaq ca saiuooneguet da qaiviraxato'ot camaye qaica ca ỹaỹaanapec.

² Ñim Nataxala' ỹaỹamaxareeta ca ỹale soxoraic, qaq ca 'etaxaloxoic qalaq Ñimaye ỹauo'o ca nhuaxanaguec.

³ Da qauem saishet da nache 'eetai' da na'attañi naqa'en ca shiỹaxaua, qaq ca no'on da lataxac qalaq nache 'eetai' da na'attañi qaica ca iraxanai'.

⁴ Aca 'alo no'on da lataxac acamaye ỹo'ot da llo'oxoyec ca lhua, qaq aca qauem da lataxac qalaq ivitta'a da nlachiguiñi naqa'en ca lhua.

⁵ Na shiỹaxauapi no'on da lataxac lhuennataxat da ỹo'ot ca nalochiguiñi lataxac. Qaq na qauemaicpi qalaq lhuennataxat da natenataxanaxac.

⁶ Naua la'aqtaqa ca qauemaic 'eeta'ama aca nqoina maye dalaataxan, qaq naua la'aqtaqa ca no'on da lataxac qalaq deca'alaqtaxa'n.

⁷ Na qauemaicpi qalaq huañi, nache imeuo, qaq na llalaqpi ca no'on da lataxac qalaq nache 'eetai' da na'attañi.

⁸ Ca ỹale qaỹo'oxoren souaxat da huo'o na laỹaanec, qaq ca qauema naua lhuennataxaco qalaq nda'a't da no'otanaguec.

⁹ Qaq ỹactec da no'on ca ỹale da no'otanec qalaxaye huo'o na lamaxashecpi, qaq saq 'ena'am ca na'amaqteetai' da 'eetega sallaxanec qalaxaye qaica ca aloq.

¹⁰ Ca no'on da lataxac ỹaỹaten da ntela'a na na'atetpi, qaq ca qauemaic qalaq sa ỹaỹaten da dechoxonnataxan.

¹¹ Ca do'onataxaatapeguelec ca na'alhua qalaq sa qoue na aloq, qaq ca imelec da lqueuoxoc qalaq huetague' na qaica ca naigui.

¹² Na qauem qoỹeetapeguec nachena na loxonaxanaxat na qauemaicpi, qaq na no'on da lataxac qalaq ñaxatec, nache huo'o da alaỹaxac.

¹³ Ca qauemaic qalaq lpachigui da maiche latenataxanaxac, qaq ca ỹale no'on da lataxac qalaq qaica ca nqalanaxac da huo'o ca huaigui.

¹⁴ Ñi 'oonolec ỹaconeguet ca alaỹaxac na maiche la'aqtacpi, qataq ỹaconeguet da lashiichiỹaxac cam ỹo'ottac.

¹⁵ Ca qaica ca ỹaỹaanapec ipi'itaxana da ỹaỹamaqchiguiñi 'enauac na ỹo'ottacpi, qaq ca ỹaanaxanaxaic qalaq iloteguet na nqataxacpi.

¹⁶ Ca qaica ca ỹaỹaanapec qalaq saqaỹaloq da ỹachaxan da lalemataic, qaq ca huo'o na ỹaỹaten qalaq saishet da qochetega ca mpa'aguenataguec.

¹⁷ Ca ỹoqta 'eesa ca ỹa'axat qalaq ỹa'axat ca ỹoqta 'eesa lataxac, qaq ca saq'en qalaq ỹa'axat ca saishet da 'eesa.

¹⁸ Huo'o na shiỹaxaua deque'emaqtaxa'n naua la'aqtaqa, qaq naua la'aqtaqa ca ỹaanaxanaxaic qalaq datannaxa'n.

¹⁹ Ca 'eesora naua la'aqtaqa qalaq qaỹoqtec da nachaalataxac, qaq ca shepecaic qalaq saqaỹaloq da imeuo.

²⁰ Na lhuennataxacpi ca qauemaic qalaq nda'a't da natenataxanaxac, qalaxaye huo'o da ntonaxac na ỹo'ottac da nlagaxayec.

²¹ Ca ỹale no'on da lataxac qalaq saishet da nque'eteetapigui na qauemsat, qaq ca qauemaic qalaq talec 'enauac na sa ỹaỹamaxañesat.

²² Ñim Nataxala' ỹataqta ỹaỹemec na shepecaicpi, qalaxaye ỹaỹamaxareeta na ỹo'ottac na 'eesa lataxac.

²³ Ca qaica ca nqalaate' saishet da ño'oxoreetapigui da laỹaanec, qaq ca qaica ca ỹaỹaanapec qalaq ño'oxoreetapigui da no'oopashaxac.

²⁴ Ca do'onataxaatac qalaq ishet da damaxasoxonapec, qaq ca hualaic qalaq choche qailattac.

²⁵ Da qui'icỹaxac damaye ỹaquicoqchet ca ỹale, qaq naua no'o'n na'aqtaqa qalaq ỹo'ot da namaicỹaxac.

²⁶ Ca no'on da lataxac ishet da ỹaueca'aguet ca 'eeta'am lỹa, qaq na qauemaicpi qalaq taỹa'a da iqataqchet da maiche llecỹaxac.

²⁷ Ca 'ipiaxaic maye hualaic saishet da huo'o ca ỹachiguiñi, qaq ca hualaxaunaxaic qalaq ishet da ỹachiguiñi da nsallaxa.

²⁸ Da llecỹaxac da nalochiguiñi lataxac chegaqaigui da nca'alaxa, qaq se'eso nqa'aic qaica ca nleuaxa.