Proverbios 11 - La'aqtaqa Ñim Lo'onatac 'Enauacna 2013

¹ Ñim Nataxala' sa ỹaỹamaxaren aca naloqnaxanaxaqui sa naloguiñi, qalaxaye ỹaỹamaxareeta aca naloqnaxanaxaqui maye nalochiguiñi.

² Da 'amqaanaxac ỹo'ot da qaica ca ño'oxoyec, qaq da naỹaanec qalaq hueta'aguet na qaica ca la'amaqchec.

³ Na no'on da lataxac qalaq taỹa'a da no'oitegue da llecỹaxac, qaq na saq ỹataxalec da lataxac qalaq ilaxachigui da maiche lle'etaxaloxo.

⁴ Da nsallaxa qaica ca naigui da ivita ca na'a'q da qanmit 'enauacna, qalaxaye ca ỹaỹamaqchiguiñi lataxac nca'alaxateeguesop da l-leuaxa ca shiỹaxaua.

⁵ Da ỹaỹamaqchiguiñi lataxac ỹaỹamaxaañi da llecỹaxac ca no'on da lataxac, qaq ca qauemaic qalaq maiche cañe' na qauem maye ỹo'ottac.

⁶ Da ỹaỹamaqchiguiñi lataxac huesochiguiñi naqa'en ca ỹale no'on da lataxac, qaq da nqopitaxanaqtaic qalaq icoñerai' ca saq 'e'n naua la'aqtaqa.

⁷ Ca qauemaic da ivita da ileu, qalaq lỹachiguiñi' da naquitaxac qataq nam tatapigui lauelpi.

⁸ Ca no'on da lataxac nca'aleeguesop da nque'eenaxac, qaq da nque'eenaxac camaye pa'aiguet da talec ca qauem da lataxac.

⁹ Naua la'aqtaqa ca qauemaic ique'emaqchet ca lỹa, qaq ca no'on da lataxac qalaq deca'alligui da lauattonaxanaxac.

¹⁰ Ca no'on da lataxac da ivita da qaica ca iueetac, nache machiguiñi naqa'en ca netaña ca huaqta'a't nỹecpi, qaq ca qauem da lataxac da ileu qalaq qantootapeguec.

¹¹ Da nchoxonnataguec ca no'on da lataxac ỹo'ot da nquictauec naqa'en ca huaqta'a't nỹecpi, qaq naua la'aqtaqa na qauemaicpi qalaq nlaxaañi camaye.

¹² Ca qaica ca ỹaỹaanapec qalaq quetapeguelec ca nauochaxaua, qaq ca ỹaanataxanaxaic qalaq ñe'emaxatta.

¹³ Ca na'aqtaqa lo'o' qaica ca ỹoxottapiguiñi, qaq ca shiỹaxaua maye npe'et qalaq choche ñe'emaxatta.

¹⁴ Ca huaña da sa qaỹaỹaten da qaỹaueca'aguet na shiỹaxauapi nache namayepi ishet da taỹañicra, cha'aye da la'añaxac namayepi chegoqchigui na qalota maye ỹaỹaten da lqataxac.

¹⁵ Ca ỹa'aalaxanaxan ca shiỹaxaua maye sa qaỹauatton nache camaye maiche na'aqcheela't, qaq ca ivita'aguet da na'aalaxanaxac qalaq camaye lactapiguiñi.

¹⁶ Aca 'alo choxonnataxanaxai acamaye huo'o da ño'oxonnataguec, qaq ca ỹale 'onataxanaxaic qalaq huo'o da lsallaxa.

¹⁷ Ca choxonnataxanaxaic, camaye maiche no'onaxaala't, qaq ca sancherapec qalaq maiche nque'emaqcheela't.

¹⁸ Ca qauemaic ỹaconeguet ca nsheetenaguec maye saq'en, qaq ca ỹaỹamaqchiguiñi ca lo'onataxanaxac camaye ỹoqta 'eesa ca nsheetenaguec.

¹⁹ Ỹoqo'oye da qanayectegue da ỹaỹamaqchiguiñi lataxac qalaq huo'o da nca'alaxa, qaq da qanayectague' da qauem qalaq taỹa'a da nleuaxa.

²⁰ Ñim Nataxala' ỹaỹemec na qauema naua lhuennataxaco, qalaxaye ỹaỹamaxareeta na ỹaỹamaqchiguiñi da lataxac.

²¹ Qaq ỹoqta 'eesa da ca qauemaic saishet da sa qaỹauo'o ca nhuaxanaguec, qaq na no'on da lataxac qalaq nca'alec.

²² Aca 'alo 'onaxai qalaxaye qaica ca ỹaỹaanapec, nache acamaye 'eeta'am aca chiguishaqte oro da netagui na lmic aca cos.

²³ Naua 'eetapegueco na no'on da lataxac naamaye ivira'a da ỹaỹamaqchiyiñi, qaq da naquitaxac na qauemaicpi qalaq taỹa'a da qauem.

²⁴ Ca shiỹaxaua sa naloqnañi na ỹan, nache nataqa'en ỹactec ca ỹaconeguet, qaq ca shemataqaic qalaq taỹa'a da lachoxoyec.

²⁵ Ca choxonnataxanaxaic qaica ca iueetac, qataq ca chetaqtaxanaxaic nataqa'en huo'o ca ỹaconeguet.

²⁶ Qaq ca imattega't na ala na trigo, qalaq na shiỹaxauapi isheuen camaye, qaq ca imen namaye qalaq qaichoxoren.

²⁷ Ca ỹo'ottac ca ỹaỹamaqchiguiñi qalaq camaye qaỹaỹamaxareeta, qaq ca nmitta'ai da ỹo'ot na qauem camaye talec na qauem.

²⁸ Qaq ca pe'etega da maiche lsallaxa qalaq naañi 'eeta'am ana deqaqta laue ana qo'oipaq. Qaq ca no'on da lataxac qalaq ñaxatec 'eeta'am ana lcoue ana qo'oipaq.

²⁹ Qaq ca maiche nlaxaañi ca lma' nache qaica ca no'ono'ot camaye, qataq ca qaica ca ỹaỹaanapec qalaq choche l-latac ca ỹaanaxanaxaic.

³⁰ Da ỹaỹamaqchiguiñi lataxac chegaqaigui da achaalataxac, qaq da loquiaxac qalaq ilaxachigui da achaalataxac.

³¹ Ca no'on da lataxac da ỹaconeguet ca nsheetenaguec da ñaq hueta'a ana 'alhua, qaq nache 'eetec nataqa'en ca qauemaic qataq ca 'etaxaloxoic.