Proverbios 10 - La'aqtaqa Ñim Lo'onatac 'Enauacna 2013

Naua ỹaanaxanaxaiqa la'aqtaqa so Salomón

¹ Naua la'aqtaqa so Salomón, 'eeta': Ca ñalec ỹaanaxanaxaic, machiguiñi naqa'en ca lta'a, qaq ca ñalec qaica ca ỹaỹaana'a qalaq ỹo'ot da nque'eenaxac aca late'e.

² Da nsallaxa maye chegaqaigui da ncachaxac qaica ca naigui, da no'on nataxac qalaq ishet da huo'o ca isoueeguesop da nleuaxa.

³ Ñim Nataxala' saishet da iqouat naqa'en ca no'on da lataxac, qalaxaye ỹo'otec da iqouat ca qauemaic.

⁴ Ca sa qallegueme da do'onataxan qalaq taỹa'a da choxoraq, qaq ca ỹaguec da lo'onataxanaxac qalaq taỹa'a da sallaxanec.

⁵ Ca deqataxan da nvi' ye cotap qalaq ỹaanaxanaxaic, qaq ca do'ocheta da huo'o da no'onataxanaxac qalaq taỹa'a da huo'o da la'aloxo.

⁶ Ca ỹale no'on da lataxac camaye talec da na'achecỹaxac, cam qauemaic qalaq ipa'axaañi da nloquiaxanataguec.

⁷ Ca ỹale no'on da lataxac da qaiuennate qalaq huo'o da nchoxonnataguec, ca qauemaic qalaq saqaỹaloq da qaicoua'ai.

⁸ Ca ỹaanaxanaxaic ỹaconeguet ca namaxasoxonaxac, qaq ca qauema naua la'aqtaqa qalaq taỹa'a da nlachiguiñi.

⁹ Ca ilotague' da llecỹaxac camaye qaica ca ñe'etaique, qaq ca qauem da llecỹaxac qalaq qauem ca loga't.

¹⁰ Qaq ca naquiaxaatalec ana la'aite qalaq taỹa'a ca qauem, qaq ca qaica ca ỹaỹaana'a qataq taxaỹaxaic qalaq taỹa'a da nlachiguiñi.

¹¹ Naua la'aqtaqa ca no'on da lataxac qalaq chegaqaiguilo da nca'alaxa, qaq ca qauemaic qalaq ipataxañi na qauemsat.

¹² Da nquiỹaxanaqtaic ỹo'oteua'a da loquiaxac, da nsoxoyec qalaq ỹapalaxat 'enauac na nasouaxashetpi.

¹³ Naua la'aqtaqa ca ỹaanaxanaxaic chegaqaiguilo da naỹaanec, qaq ca qaica ca ỹaỹaana'a qalaq taỹa'a da qaiuaxaalec na l-laq ca nhuaxanaxanaxat.

¹⁴ Ca ỹaanaxanaxaic camaye ỹaỹamaxatteque naua lauattonaxanaxaco, qaq naua la'aqtaqa ca qaica ca ỹaỹaana'a qalaq huo'o da lchec.

¹⁵ Da lsallaxa ca sallaxanec nachera da npaxattalec, qaq ca choxoraq qalaq nlaxaañi da lachoxoyec.

¹⁶ Qaq da nca'alaxa nachera da nsheetenaxat ca no'on da lataxac, qaq da ñe'etaxaloxo nachera da nsheetenaxat ca qauemaic.

¹⁷ Ca ilotelec ca napaxaguenataxanaxac, camaye quetegue da no'on llec da achaalataxac, qaq ca saỹaconeguet damaye qalaq taỹa'a da deqat.

¹⁸ Ca saq 'e'n naua la'aqtaqa camaye ỹoxottañi da lquiỹaxa, qataq qaica ca ỹaỹaana'a ca ỹa'axatec ca saq 'en.

¹⁹ Ca qalota na la'aqtacpi qalaq qalota da lsomaxac, qaq ca ỹaỹaten da ñe'emaxat camaye ỹaanaxanaxaic.

²⁰ Naua la'aqtaqa ca no'on da lataxac qalaq 'eeta'ama ca no'on plata, qaq naua lhuennataxaco ca qauemaic qalaq qaica ca naigui.

²¹ Naua la'aqtaqa ca ỹaanaxanaxaic qalota ca ỹapaxaguen, qaq ca qaica ca ỹaỹaana'a qalaq ilem da qaica ca ỹaỹaanapec.

²² Da lchoxonnataxanaxa Ñim Nataxala' ỹo'ot da nsallaxa, damaye saishet da ỹo'ot ca naquicoxo.

²³ Ca qaica ca ỹaỹaana'a qalaq machiguiñi da ỹo'ottac na qauemsat, qaq ca ỹaanaxanaxaic qalaq machiguiñi naqa'en da naỹaanec.

²⁴ Cam ñe'etapeeguet ca qauemaic qaq nacheca ca naỹa'a camaye, qaq ca no'on da lataxac qalaq ipacchiguilo naua no'o'n lhuennataxaco.

²⁵ Da ỹoxogue ca la'at lta'araic nache imeuo ca qauemaic, qaq ca no'on da lataxac qalaq nache 'eetai' da nachattañi.

²⁶ Ca ỹamaq ca na'aqtaxanaxanec hualaic qalaq 'eeta'am da maiche ñe'euai' naqa'en naua lhue qataq da taiguilo naua la'ai'te ca lmala'q.

²⁷ Da huo'o naq 'enec qanqa'en Ñim Nataxala' ỹo'ot da logoraic da achaalataxac, qaq naua nachattaiguilo vi'iye ca qauemaic qalaq sa qaỹarec.

²⁸ Ca no'on da lataxac qalaq taỹa'a da machiguiñi, qaq ca qauem da lataxac qalaq taỹa'a da nlaguiñi.

²⁹ Ñim Nataxala' npaxattalec ca ỹo'ottac ca ỹaỹamaqchiguiñi, qaq ca ỹo'ottac ca qauem qalaq ilaxachigui.

³⁰ Ca no'on da lataxac qalaq saishet da huañi, qaq na qauemaicpi qalaq saishet da nache 'eetai' da huetalec ana 'alhua

³¹ Naua la'aqtaqa ca no'on da lataxac qalaq chegaqaiguilo da naỹaanec, qaq ca qauema naua la'aqtaqa qalaq taỹa'a da qaicheguec na lachaxat.

³² Ca no'on da lataxac qalaq no'oñi naua la'aqtaqa, qaq ca qauemaic qalaq qauema naua la'aqtaqa.