Proverbios 1 - La'aqtaqa Ñim Lo'onatac 'Enauacna 2013

Naua la'aqtaqa so ỹaanaxanaxaic

¹ Naua la'aqtaqa so Salomón, som llalec so nta'a David, maye nta'a ye Israel,

² naamaye qoỹilyiñi da yaqto': Qaỹa'axat da llec da naỹaanec, qataq naua napaxaguenataxanaxaco, yaqto' qaỹaỹateeteguelo naua na'aqtaqa maye ỹataqta huo'oi naua naiguilo,

³ yaqto' qaỹaconeguet da napaxaguenataxanaxac, naỹaanataxanaxac, no'on nataxac, no'oitegue nataxac, qataq da nalochiguiñi ñecỹaxac,

⁴ yaqto' sa nqalat qanqa'en na nsoxoppi maye saxanaqca ca ỹaỹaten, qataq qoỹanem da lauattonaxanaxac qataq nlotec.

⁵ Ca ỹaanaxanaxaic da na'axaỹaxanalo naamaye nache nquictec da laỹaanec, qataq ca ỹaanataxanaxaic, nquictec da laỹaanataxanaxac,

⁶ da yaqto' qaỹaỹateete' naua la'aqtaqa ca ỹaanaxanaxaic, qataq naua lleco naua la'aqtaqa, qataq na laloqnaxanaxatpi, huo'otaq naua ỹoxottrañi, la'aqtaqa.

⁷ Da naỹaanec, damaye chegoqchigui da huo'o naq 'enec qanqa'en Ñim Nataxala', cam qaica ca ỹaỹaana'a qalaq ỹo'otan da naỹaanec qataq da napaxaguenataxanaxac.

Da nqataxac maye taalec na nsoxoppi

⁸ 'Am ỹalcolec, ỹataqta 'ana'axaỹaxana qome ca lqataxac ca 'arta'a, qataq saishet da qoca'ai ca lapaxaguenataxanaxac aca 'arate'e,

⁹ cha'aye 'eeta'ama ca 'onaxaic 'ano'otaxat: 'eeta'am aca ỹataqta 'onaxai nqola, huo'otaq ca 'onaxaic llo'oxoraxat na 'arqaic.

¹⁰ Na 'etaxaloxoicpi da huotaique da 'am ỹatenachet, qalaq saishet qome da 'auca'ategue, 'am ỹalcolec.

¹¹ Da huo'otaq 'am 'enapega 'eeta': «'Aỹala, qomi' 'auca'ateguelo, cha'aye sauoqtaique da sauoqo'o ca secachaqot, qataq salauataq ca qaica ca ỹauotaique.

¹² Ñemataqchiguiñi qome na 'amaqtaqaicpi shiỹaxauapi, 'eeta'am ñaqa'enaq da ivita da ileu, da nmichiguiñi da tangui aca huachiqui.

¹³ Yaqto' ishet da ỹataqta qomi' sallaxanaqa, ỹataqta ñelaxataqchiguilo qome naua qarma'ate ca qarcachaxatpi.

¹⁴ 'Auanac qome, qomi' 'aualegoiguilo, yaqto' 'am ñeuanaqta'ai' da ñecolaxataqchigui aca qorom.»

¹⁵ Qalaxaye 'am ỹalcolec, saishet qome da 'auca'ategue namayepi, qataq saishet da qoquegue de'era qauem nqa'aicỹaxac camayepi,

¹⁶ cha'aye namayepi ỹataqta huo'o da lỹalaxa da ỹo'ot ca qauem, qataq iỹalata'a da icoldec naua ntago'q,

¹⁷ Cha'aye qaica ca naigui da qalapaxañi aca nqoina, da mashe ilota'a ca qoỹopi,

¹⁸ qaq ỹoqo'oye da lapaxañi aca lqoina ne'ena shiỹaxauapi, qalaq 'eeta'am da maiche nqoviila't namayepi, qaq ỹataqta huetalec naqa'en da lchec da maiche nachaalataxac.

¹⁹ Qaq 'era da 'eetec ye loga't na qopitaxanaqtaqaicpi: Da maiche lqopitaxanaqtaic, namayepi nachera da ỹalauat.

Da deỹaxan da naỹaanec

²⁰ Naua nqa'aico qataq naua naponaqa'ate, nache huañalo da qaỹa'axaỹa de'era naỹaanec.

²¹ Da deỹaxa'n naua na'aqtaqa qalaq huañalo naua naponaqa'ate, naua ñeguereuo na huaqta'a't nỹecpi nache huaña da qaỹa'axaỹa, 'eeta':

²² «Qami' nsoxoppi maye qami' 'enaqaicpi, 'enaxanaxaicpi maye qaica ca qauaỹaañiỹa'a, ¿Che laguio' qaq qaỹa'axañiiñi da qoquiitalec da qaica ca qauaỹaañiỹapec? Qataq ¿che laguio' da qaỹa'axañiiñi da qoquiitalec da qare'enaxanaxaqui, qataq ỹataqta qauo'otañi da naỹaanec?

²³ Qana'axaỹaxañiỹalo qome naua iviraqtaxanaxaco, yaqto' qami' sanema da iquiyaqteỹaxac, qataq qami' sanema da qauauattoñi na iuennataxacpi.

²⁴ Aỹem qami' seỹaxaategalo naxa, qataq qami' sheetegalo da aỹem qauanaiua'a, qalaxaye qami' saishet da aỹem qaualaqaiguet.

²⁵ Nachaqrata da sa qauacoñeeguet na iqataxacpi, qataq saishet da qauacoñeegueta naua iviraqtaxanaxaco.

²⁶ Qaq ỹoqo'oye aỹem huo'o ca na'a'q, qaq choche qami' se'eeta'ape, qom qami' nvitalo ca sa ỹaỹamaxañi. Nache qami' se'enai'salo qom qami' ỹalaua't da qarcolanqai.

²⁷ Qom qami' nvitalo ca qarcolanqai qataq ca lqalaicpi, nache sa qauaỹaañi ca qoñeetec souaxat da qaraquicoqoi, maye 'eeta'am aca daua'ache da nlaxaañi 'enauacna.

²⁸ Qaq que'eca na'a'q aỹem qauỹaxañeetega qome, qalaxaye saishet da qami' sasategueta, qataq aỹem qanmicheetaique qalaxaye saishet da aỹem qauanachiỹa,

²⁹ cha'aye qauo'otañi da naỹaanec, qataq qaica ca 'enec qanqa'eñi Ñim Nataxala'.

³⁰ Qataq saishet da qauacoñeeguet na iqataxacpi, qataq qauo'otañi' naua iviraqtaxanaxaco.

³¹ Qalaxaye maiche qanque'etaxañiigui qome ca naigui da qauem qano'onataxaqui. Qataq qami' nlaqchiguilo qome ca qauem qarhuennataqai.

³² Na 'enaqaicpi qalaq maiche ỹalauat qome da ne'enaxac, ca qaica ca ỹaỹaana'a qalaq maiche ilaxachigui qome da qaica ca ỹoqocha'a,

³³ Qalaxaye ca aỹem na'axaỹaxana, qalaq huo'o qome da l-lagaxayec, qataq saishet da ñe'etaique ca qauem.»