Oseas 8 - La'aqtaqa Ñim Lo'onatac 'Enauacna 2013

Da nhuaxanaguec na Israel le'ecpi souaxat nam saq 'en atamnaxala'pi

¹ e'Auashiiyigui qome aca nasheere, cha'aye mashe anacta na vi'ic da naỹa na lma' Ñim Nataxala', souaxat da sa qaipaguelec da ñaỹamaxataxac, qataq qaỹataỹa'agueta naua ỹamaxasoxonaxaco.

² Qaq nagui, namayepi ỹa'alaqtai' da aỹem iỹaxaatacot, 'eeta': «Qomi', 'am sauattonaq da 'Am Natamnaxala' na Israel le'ecpi.»

³ Qalaxaye na Israel le'ecpi saishet da ỹaconeguet da no'on, ỹoqo'oye na npa'aguenaxauapi icanapec qome namayepi.

⁴ Qataq namayepi ỹauo'o co'ollaxa na lta'alpi, qalaxaye saishet da aỹem ipacapegue', qataq ỹauo'o na lataxala'pi maye saishet da sauatton. Qataq ỹo'ot nam natamnaxala'pi ỹachegoxotaigui na lalamaxat plata qataq na oro, nache ỹo'ot da maiche nlaguiñi namayepi.

⁵ Qaq qami' maye qarmaye na Samaria, aỹem ỹataqta seqaiga ñim ne'enaqtac huaca llalec, maye qanatamñeetacot. Nache aỹem ỹataqta 'eroigui da ỹalemataic da qami' salemataỹalo. ¿Chaq laguio' da qaviyiỹa da qami' qui'itte'?

⁶ Cha'aye ñi'iñi huaca llalec ñimaye lalamaxat na Israel le'ecpi, ñimaye le'enaqtac som ỹaỹaten da le'enaqtaxanaxac, qaq ñimaye saishet da nacheñi Ñim Lo'onatac 'Enauacna. Qaq ỹoqo'oye ñi'iñi huaca llalec, maye netaña ye Samaria, ñimaye dolagui qome.

⁷ Qaq cha'aye namayepi ỹaañi co'ollaxa na la'at, nache lqateguishec qome ca la'at lta'araic, nache ca lanaxanaqa' qaica ca ñaxaalec, qataq qaica ca lqateguishec trigo maye chegaqaigui na 'ayiiña, qaq da huo'o ca lqateguishec, nache chec qome nam chegaqauecpi.

⁸ ¡Huaña qome, nache 'eco' qanallec na Israel le'ecpi! Nache na ỹotta'a't shiỹaxauapi da ilota'a namayepi, qalaq 'eeta'am naqa'en ca nogoxoshet maye qaica ca naigui,

⁹ cha'aye namayepi tasheguema ye Asiria, 'eeta'am na 'ashena no'onaxa le'ec maye huegaqaic. Qaq na Efraín qalaq desheenaxata'a ana quisheguetaxaipi.

¹⁰ Qaq na'aictaxa da ỹanem na nme nam ỹotta'a't shiỹaxauapi, qalaxaye nache 'ena'am selagaxattac qome namayepi, nache huo'oi qome caua na'axa'te da nque'etaxangui da lque'eenataxanaxac na nta'alpi qataq nam nataxala'pi.

¹¹ Cha'aye na Efraín, qalota ana no'oxoosheguem nca'atoxonaxalatepi, maye ỹo'ot da huo'o naqa'en nam lasouaxashetpi namayepi.

¹² Qaq cha'aye na'aictaxa da qalota nam sereñi ỹapaxaguenataxanaxacpi da sanem, qalaxaye ỹataqta qaica ca naigui naqa'en namayepi.

¹³ Qaq namayepi nqopita da aỹem ỹanot ana lachetaqtaxanaqtepi, nache namayepi chec na lapat nam nachetaqtaxanaxat, qalaxaye Aỹem Nataxala' sa saỹamaxaren da ỹo'ot namayepi. Qaq Aỹem seuennate qome nam qauem maye ỹo'otpi, nache sauo'o ca nhuaxanaguec souaxat na lasouaxashetpi, qataq she'eguelaxata qome ye Egipto.

¹⁴ Qaq nam Israel le'ecpi, no'oxoosheguem na lma' lta'araicpi, qalaxaye icoua'ai Ñim Lo'onatac da nachaalataxac. Qataq na Judá le'ecpi, qalota na no'oxoosheguem huaqta'a't nỹecpi maye huo'o na lpaqtaxatpi, qalaxaye aỹem, ñamaxa qome ca norec da yaqto' ỹavic ñaqa'en na lma' lta'araicpi.