Oseas 6 - La'aqtaqa Ñim Lo'onatac 'Enauacna 2013

Na Israel le'ecpi detaxaỹa da ỹe'eguelaxa Ñim Nataxala'

¹ Ña qauanaqui, nache she'eguelaxasaxa Ñim Nataxala', cha'aye Ñimaye qomi' nlaxatchiyiñi co'ollaxa, qalaxaye ishet da qaltaq qomi' no'oite' naqa'en, qataq qomi' ique'emaqche't, qalaxaye ishet da qaltaq qomi' natare'n.

² Nache sa qaỹaloq qome da qomi' no'oite' naqa'en, qataq sa qaỹaloq qome da qomi' nauaxaỹaxaayeshegue'm da yaqto' ñachaataqto'ot Ñimaye.

³ ¡Sauoqo'o qome ca qana'añaxataxac da sauattonaq Ñim Nataxala'! Cha'aye Ñimaye 'eesa qome da anac, 'eeta'am da nnoxoosheguem añi nala'. Qataq 'eesa qome da qomi' naỹalo, 'eeta'am na auot da talec ana 'alhua, nam auot maye huaigui ye latomaxa qataq ye nauoxo.

⁴ Qaq Ñim Nataxala', 'eeta': ¿Ca sheeteco', 'am Efraín? Qataq ¿ca sheeteco', 'am Judá? Cha'aye da qarauotaxanaqtaiqui da sheeta, qalaq 'eeta'am na sheue ye nte'eta, qataq na 'aỹa da ña nte'etom nache quiguiñi.

⁵ Ỹoqo'oye chegoqchigui ñaqa'en co'ollaxa som ỹa'aqtaxanaxanecpi, da qami' selaxachiguilo, qataq naua ỹa'aqtaqa da qami' salaua't. Qaq da nalochiguiñi ỹo'onataxanaxac, 'eeta'am ca nqashelgaxa maye dalaataxanapec.

⁶ Cha'aye aỹem ñeshetaique da aỹem qauauochec, qaq saishet da nachena nam qarachetaqtaxanaxache da ñeshetaique da aỹem qandoitapegueua'a. Qataq ñeshetaique da aỹem qauauattoñi da aỹem Qanatamnaxala'ai, qaq saishet da choche aỹem qaỹa'añeetacot anam nachetaqtaxanaqte qaỹavigaxatta.

⁷ Qalaxaye qami', qoñeeta'am so Adán, da saishet da qaupaquiitelec da ñaỹamaxataxac, nache saishet da aỹem qaualaqaiguet.

⁸ Qaq nam netaiguipi ye huaqta'a't nỹecpi ye Galaad qalaq nda'a't na qauemaicpi, qataq 'enauac nam lapiaqa'pi no'onaña na ntago'q.

⁹ Qaq so nqa'aic maye taỹa'a ye Siquén, qalaq hueta'a na ntaxaỹaxanaxanecpi maye 'eeta'am nam cachaxaicpi da nauaata'aguet na shiỹaxauapi, qaq huaña da decache qataq da dalaataxan.

¹⁰ Qaq huaña ne'ena na'alhua na Israel da sauaachigui nam ỹataqta qauem, qataq na Efraín da nquisheshe, nache na'aqchet na Israel le'ecpi.

¹¹ Qaq nataqa'en 'am Judá, mashe sauo'o ye laloxoqui ca 'anhuaxanaguec, qom ivita da ñe'eguelaxaala't nam ỹalamaxat nhuo' Israel le'ecpi.