Oseas 5 - La'aqtaqa Ñim Lo'onatac 'Enauacna 2013

Da nhuaxanaguec na Israel le'ecpi

¹ «Ña qana'axaỹaxañiỹa de'era qami' ntaxaỹaxanaxanecpi, qataq qami' nhuo' Israel le'ecpi, qataq qami' nta'alpi, cha'aye qami' naỹa'alo ca qanhuaxanaguiiqui, souaxat da 'eco' qami' nqoina co'ollaq huaña ye Mispá, qataq 'eco' qami' naleguec co'ollaq huaña ye Tabor,

² qataq qoñeeta'am aca nshere maye qaỹoqchiguingui co'ollaq huaña ye ca'amegue ye Sitín. Ỹoqo'oye sauo'o qome ca qanhuaxanaguiiqui.

³ Qaq aỹem, ỹataqta sauatton na Efraín, qataq na Israel saishet da sa sauatton. Qalaxaye na Efraín, quegue da nquisheguetaxac, qaq na Israel, qalaq ỹataqta nshepaxanaqcheela't».

⁴ Nache namayepi saishet da ỹe'eguelaxa Ñim Lo'onatac 'Enauacna, souaxat nam qauem maye ỹo'ottac, cha'aye namayepi huetaigui da lquisheguetaxac, nache sa ỹauatton Ñim Nataxala'.

⁵ Qaq de'era na'amqaanaxac na Israel, nachera qome da maiche que'emaxam namayepi, qaq na Efraín qalaq maiche pogolaxaisop qome na qauem maye ỹo'ottac namayepi, qaq na Judá le'ecpi nache l-llañe' namayepi qom huañi.

⁶ Qaq namayepi lỹatac qome ana lalo qaguetapi, qataq ana huacapi da nmittaique Ñim Nataxala', qalaxaye saishet qome da ỹanata, cha'aye Ñimaye ca'ai namayepi.

⁷ Qaq souaxat da namayepi ca'ai Ñim Nataxala', qataq na llalaqpi ỹaqa'a na lta'alpi, nache namayepi qataq na na'alhuapi, nlaguiñi qome huaigui ca 'oonolec ca'agoxoic.

Da nhuaxanaguec na Israel qataq na Judá le'ecpi

⁸ ¡Ña qauashiiyigui ana nasheere qom huaña ye Guibeá! ¡Qataq ana nasheerepi qom huaña ye Ramá! ¡Qataq qauauoi ca qara'alaxaqui maye la'anaxat ca alaataxac qom huaña ye Bet Avén! ¡Yaqto' ỹe'elaq nam chegoxoguetpi so Benjamin!

⁹ Qaq aỹem sa'aqtaxanem nam nalamaxat nhuo' Israel le'ecpi, da ỹataqta 'eesa cam naỹa'a namayepi, qaq na Efraín ỹataqta nlachiguiñi qom nvita ca nhuaxanaguec.

¹⁰ Qaq nam nataxala'pi ye Judá namayepi 'eeta'am ca decachetega na 'alhua, da napacalec naqa'en naua ỹoqta loga'te na npaxateua'a 'alhua, qalaxaye namayepi ỹataqta imalec qome ñaqa'en da ỹayeloxo.

¹¹ Nache na Efraín, qaica qome ca nyacnataguec qataq qaica ca naigui qanqa'en, souaxat da maiche quegue nam atamnaxala'pi maye qaica ca naigui.

¹² Qaq ỹoqo'oye ñelaxaañi qome ye Efraín, sheeta'am catai' nogoxot lalaxat da ichec na nogoxot, qataq ca naqui'c qom ñelaxaañi na nhuo' le'ecpi ye Judá.

¹³ Nache ye Efraín qom ila'a da lalolaxa, qataq ye Judá qom ila'a da lque'emaxa, huaña qome nache ye Efraín, nqo'ona so 'amaqtaqaic nta'a ye Asiria, da iỹaxanaique ca ntaunaguec, qalaxaye somaye saishet qome da no'oita naqa'en, qataq saishet da nataren na lque'emaxa.

¹⁴ Cha'aye aỹem sheeta'am qome ca llon da seloquiaxan ye Efraín, qataq catai' llon llalec da seloquiaxan ye Judá, qaq nache aỹem qome da secolaxattac, ime nache ashec, nache sache qome ca ỹoxonec, nache qaica ca ishet da deuotaxanec.

¹⁵ Qaq ime qome, nache she'eguelaxa ye ima', choche ivitta'a qom nauattoola't namayepi da huo'o da lasouaxashet, nache aỹem nmitaique. ¡Qaq qom huetaigui ca lta'araic lhuogoxo, nache aỹem nmittaique qome!