Oseas 4 - La'aqtaqa Ñim Lo'onatac 'Enauacna 2013

Ñim Nataxala' dataỹa'aguet na Israel le'ecpi

¹ Qami' Israel le'ecpi, ña qana'axaỹañiỹa da la'aqtac Ñim Nataxala', cha'aye Ñimaye npa'aguene' nam netalecpi ne'ena 'alhua, cha'aye namayepi mashe qaica ca 'eesa, qataq qaica ca lchoxonnataxanaxa, qataq mashe saỹauatton Ñim Lo'onatac 'Enauacna.

² Nacherata da ỹapacauec na saq 'en maye ỹan la'aqtacpi, qataq da latenataxanaxac, lalaataxanaxac, lcachaxac, qataq da lauatapiguiñi' ana sa lhua, qataq da qaica ca iren.

³ Ỹoqo'oye ne'ena 'alhua huo'o qome da nasouaxac, nache qaica ca la'añaxac 'enauac nam netalecpi namaye, qataq nataqa'en ileu qome na huauec shiguiỹacpi, qataq na maỹopi maye hueto'ot na piguem, qataq na nỹaqpi maye huetangui aso auaxai.

⁴ ¡Qaq nache qaica qome ca nhuogaxa ca lỹa huo'otaq da ỹauo'o ca lasouaxashet! Cha'aye Aỹem, nachecata ca ntaxaỹaxanaxanec da lasouaxashet ñaqa'en de'era.

⁵ Nache 'am qouañi qome, qouaigui ca na'a'q, qataq ca pe, nache qocañi' ca na'aqtaxanaxanec da qouañi qataq ñelaxaañi aca 'arate'e.

⁶ Qaq cha'aye nam ỹalamaxat nhuo' le'ecpi qaica ca lauattonaxanaxac ỹoqo'oye ishet da nlaguiñi. Qaq 'am souaxat da sa 'auaconeguet de'era nauattonaxanaxac, nache ñeqat da 'am ỹa'aqtaxanaxanec. Qataq cha'aye 'aucoua'ai na lqataxacpi Ñim 'Anatamnaxala', nache Aỹem nataqa'en secoua'ai qome nam 'aỹa'alaqpi.

⁷ Qataq co'ollaq nquictauec da qalota nam ntaxaỹaxanaxanecpi, nache nataqa'en ỹataqta nquictauec nam aỹem hueto'ot lasouaxashetpi, ỹoqo'oye da llo'oxoyec namayepi, nmeneguet qome ñaqa'en da qaica ca la'amaqchec namayepi.

⁸ Qataq ỹachegoxottapigui na lasouaxashetpi nam ỹalamaxat nhuo' le'ecpi da lquia'axac namayepi, ỹoqo'oye ỹayeeta'a da nache ỹo'ottac na qauem nam shiỹaxauapi maye ỹalamaxatpi.

⁹ Qaq ne'ena nhuo' le'ecpi, nache 'eeta'am ñaqa'en qome na ntaxaỹaxanaxanecpi, da sauo'o ca nhuaxanaguec, souaxat dam qauem lataxac namayepi.

¹⁰ Qaq na'aictaxa qome da sa qoue da lquia'axac qalaxaye saishet da icoma', qataq da ỹapacauec da lquisheguetaxac, qalaxaye qaica qome ca llalec, souaxat da ca'ai Ñim Nataxala'.

Na ne'enaqtacpi maye natameetacot na Israel le'ecpi

¹¹ De'era quisheguetaxac qataq na lataxa, ỹo'ot da deqat da no'on nataxac.

¹² Na ỹalamaxat nhuo' le'ecpi, inattac nam natamnaxala'pi 'epaq, qaq ne'ena 'epaqpi ỹasateguet namayepi nache ỹaueeguet da lquisheguetaxac, qataq ca'ai Ñim Nataxala' souaxat de'era lquisheguetaxac.

¹³ Qataq tasheguema na pa'asheguem ana qasoxonaxapi, qataq ana lcomaraxalatepi, da ỹo'ot nam lachetaqtaxanaxatpi, qataq da ỹavigaxat na lchenaxanaxatpi, qataq huo'ot naqa'en na lpaqal ana qo'oipaqpi rooblepi, 'aalamopi qataq ana enciinapi. Qaq ỹoqo'oye ana llalepi ncogagui qome da lquisheguetaxac, qataq ana latelpi lauatapiguiñi' qome nam sa lhuapi.

¹⁴ Qalaxaye Aỹem saishet qome da sauo'o ca nhuaxanaguec ana llalepi souaxat da lquisheguetaxac, qataq ana latelpi souaxat da lauatapiguiñi' nam sa lhuapi, cha'aye maichena namayepi da nquishestague' ana quisheguetaxaipi qataq da ỹo'ot ana lachetaqtaxanaqtepi, nache nquisheshigui da la'amqaanataxanaxac. Qaq 'era da 'eetec na nhuo' le'ecpi, da taỹañecra souaxat da qaica ca laỹaanataxanaxac.

¹⁵ Qaq 'am Israel, da 'anquishishi, qaq no'on da saishet da ivira'a ye Judá, da huo'o ca lasouaxashet. Qaq saishet qome da qanqo'oñiỹa ye Gilgal, qataq da qa'aisheguema ye Bet Avén, qataq da qaỹa'añi ca qara'aqtaqui da qoñeeta': «Nca'altauec Ñim Nataxala'.»

¹⁶ Cha'aye na Israel, 'eeta'am aca huegaqai huaca llale. Qaq ¿peta'a isheto' da ilo'ogue Ñim Nataxala', da 'eeta'am naqa'en ca qagueta llalaqpi da huaña ca no'on 'auaqpisat?

¹⁷ Qaq na Efraín ye ỹataqta nañaneguet da ỹa'amaqten nam ne'enaqtacpi. Qaq qaua'aqaita'a qome.

¹⁸ Cha'aye 'enauac namayepi da taxaicpi, nache taỹa da nquisheguetaxac, qataq nam lataxala'pi namayepi ỹauotec nam ỹo'ot da ncoxo.

¹⁹ Ỹoqo'oye anac qome ca la'at, nache ỹache namayepi, nache huo'o qome da la'agaxa souaxat da natameetacot nam saq 'en atamnaxala'pi.