Oseas 2 - La'aqtaqa Ñim Lo'onatac 'Enauacna 2013

¹ Huaña qome nache qoñiỹapega na qarqaỹaipi, qoñeeta': «Nhuo' le'ecpi maye lalamaxat Ñim Lo'onatac 'Enauacna», qataq ana qarqaỹaipi: «Nchoxonnatapi.»

Da 'eetec da sa ỹalaq so nhuo' Israel le'ecpi

² Qaq Ñim Nataxala' 'eeta': ¡Ña qaviraxachiỹo'ot qome aso qarachi'i, cha'aye asomaye saishet da ihua, qataq asomaye saishet da aỹem lhua! ¡Qoñiỹapega da ỹaxaañi da ỹachaxaatac da lquisheguetaxac! ¡Qataq ỹaxaañi da nachaxaatega nam nquisheshaxauapi!

³ Cha'aye da saishet da ỹaxaañi de'era, nache so'orauec qome, qataq saleeta'ague ñaqa'en 'eeta'am so na'a'q co'ollaq ñiguiñi. Huaña nache 'eeta'am ñaqa'en ca toolec 'alhua, qataq ca deqaqta 'alhua, huaña nache ilem ñaqa'en na laquip.

⁴ Nache saishet da sechoxonnai' qome ca llalaqpi, cha'aye chegaqaigui da lquisheguetaxac.

⁵ Cha'aye quisheguetaxai aso late'e, nache iqataqchet da llo'oxoyec, souaxat da 'enapec: Aỹem, seca'ategue qome na iquisheguetaxauapi maye ỹo'ot na anoq, ỹaquip, qataq aỹem ỹanem na no'oxonecpi, lino, qataq na coraxatpi, qataq nam ỹotta'a't qanỹomiguipi.

⁶ Qaq ỹoqo'oye sapogui qome nam llecpi sauota'a ana ỹaxat, qataq sauo'o ca npaqtaxanaxat da sapoua'a, yaqto' saishet da ỹanata nam llecpi.

⁷ Qataq icaateguiñi' qome nam nquisheshaxauapi, qalaxaye saishet da ivi', qataq nmittaique, qalaxaye saishet da ỹanata. Huaña, nache 'eeta': «Aỹem she'eguelaxa ca hua'auchiguiñi ihua, cha'aye co'ollaq sooto'ot, nache ỹataqta saỹamaqchiguiñi, qaq saq 'ena'am nagui.»

⁸ Qalaxaye acamaye saishet da ỹauattooteguet da nachaỹem da saata'am na trigo, lataxa qataq na aceite, qataq da nachaỹem da nquicapeguec ñaqa'en na plata qataq na oro, maye do'onataxana da ỹo'ot na saq 'en natamnaxala'pi.

⁹ Qaq ỹoqo'oye qom ivita ca laloxoqui da qanqat na ala na nañiguishecpi, nache aỹem ñe'eguelaq qome, nache sacona na maiche ỹalamaxat trigo, lataxa qataq na ña'asaite, qataq sacona na maiche ỹalamaxat qagueta laue qataq na lino, maye sami' co'ollaxa da yaqto' napogoñi ñaqa'en.

¹⁰ Qataq na nquisheshaxauapi ỹauaachigui qome ñaqa'en da aloic asomaye. ¡Nache qaica ca nca'alaxateeguesop da ihuaqỹaxac!

¹¹ Huaña qome nache tachiguiña ñaqa'en da lamaicỹaxac, qataq da ỹo'ottac na lquia'axac da dalaxaic ñi ca'agoxoic, qataq ye na'a'q mataxaqui, qataq 'enauac na laỹe la'ashaxacpi.

¹² Qataq qaiquesoq ñaqa'en ana lañiguishe uva qataq ana higo, maye da detaxaỹa naxa, nache 'enapec: «Ne'enapi maiche ñesheetenaxatpi, maye aỹem ỹanem nam ñequishishaxauapi.» Nache so'otec da ñaxaalec ñaqa'en ana huoue, yaqto' chec na shiguiỹacpi maye huauec.

¹³ Qataq sauo'o ca nhuaxanaguec souaxat soua na'axa'te da ỹaatacot na ỹaqa'a atamnaxala'pi na lchenaxanaxat, qataq ỹaañi na no'otaxatpi, nchiguishaqtepi qataq ana lqolapi, nache ca'attague' na nquisheshaxauapi, nache aỹem icoua'ai. 'Era da ỹa'aqtac, Aỹem Nataxala'.

Ñim Lo'onatac 'Enauacna ỹauotec som lalamaxat Israel le'ecpi

¹⁴ Qaq ỹoqo'oye aỹem ñemanaqchet qome, nache sauega ye toolec 'alhua, nache sechettac da setaxaỹot, yaqto' ỹoxonec da lquiyaqteỹaxac.

¹⁵ Huaña, nache she'eguelaxatot qome aye lañiguishe uva, qaq ye ca'amapega't ye Acor, nache llegueuo qome ñaqa'en da naquitaxac. Huaña qome nache do'onaxaatac, 'eeta'am co'ollaq ñaq qa'añole, 'eeta'am da 'eetec so na'a'q co'ollaq ca'ai ye Egipto.

¹⁶ Qaq huaña qome nache da aỹem detaxaỹa qalaq saishet da 'eeta': «'Am ỹataxala'.» Nacherata da 'eeta': «'Am ihua.» 'Era da ỹa'aqtac Aỹem Nataxala'.

¹⁷ Huaña qome nache ñeqateeguesop na alap da le'enaxat na saq 'en atamnaxala'pi, nache saishet qome da qaltaq ỹe'eguelaxa da nasaqtapeguec.

¹⁸ Qaq que'eca na'a'q, ñeqouaguec qome na Israel le'ecpi, da naỹamaxate' ñaqa'en na shiguiỹacpi maye huauec, qataq na maỹopi, qataq na na'araxanaqpi. Huaña qome nache ñeqateeguesop ne'ena 'alhua, na nchecnecpi, ỹeelonecpi, qataq ca alaataxac, yaqto' ne'ena ỹalamaxatpi nhuo' le'ecpi ỹataqta amata da nmataxac.

¹⁹ Qaq ỹataqta nache 'eetai' qome da 'am ihua, qataq ỹataqta itchiguiñi da 'am ihua qome, nache ipacchigui da lataxac da aỹamaxataxac, cha'aye ỹataqta 'am sauotec.

²⁰ Huaña nache 'am saroneguet, nache ỹataqta 'am ñalemaqte', huaña qome nache aỹem 'auauatton da Aỹem Nataxala'.

²¹ Qaq Aỹem Nataxala', shenapec: Que'eca na'a'q, aỹem sasateguet qome na piguem, qaq na piguem qalaq ỹasateguet qome ana 'alhua,

²² qaq na 'alhua qalaq ỹasateguet qome na trigo, qaq na lataxa qalaq ỹasateguet na aceite, qaq naamaye qalaq ỹasatreguet qome ye Jezreel.

²³ Nache na ỹalamaxat nhuo' le'ecpi sanalec qome na 'alhua, da yaqto' ỹalamaxat, nache talec ñaqa'en da ichoxonnataxanaxa aso Lorrujama, qataq so Loamí, nache sheeta': «Maiche 'am ỹalamaxat.» Qaq da aỹem detaxaỹa, nache 'eeta': «'Am Ñatamnaxala'.»