Oseas 13 - La'aqtaqa Ñim Lo'onatac 'Enauacna 2013

Da 'eetec da nlachiguiñi ye Israel

¹ Qaq nam shiỹaxauapi ye Efraín naxa da detaqa, nache na laỹepi nhuo' le'ecpi maye chegoxoguet so Israel, ỹataqta huo'o naq 'enec naqa'en namayepi. Qalaxaye ye Efraín ilem na lasouaxashetpi, souaxat da natameetacot so Baal.

² Qaq namayepi ñaq queto'ot nagui da ỹo'ottac nam lasouaxashetpi, cha'aye nqatel na lcat plata, nache ỹo'ot na natamnaxala'pi maye maiche lo'onatac na lcat lo'opi. Ime, nache 'eeta': «Ña qaỹa'añem na qarachetaqtaxanaxachi». Nache na shiỹaxauapi napigoxoi' nam natamnaxala'pi, maye 'eeta'am na huaca llalec da lataxac.

³ Qaq ỹoqo'oye namayepi 'eeta'am na sheue ye nte'eta, qataq 'eeta'am na 'aỹa, da ña nte'etom nache qaica, qataq 'eeta'am na 'auaqpi da ỹache na la'at lta'araic, qataq 'eeta'am na nmala'q da quisheguemgue ca lliguisheguem da huaỹoxoosheguem.

⁴ Qaq Ñim Nataxala', 'eeta': Aỹem Nataxala', Aỹem maye Aỹem 'Anatamnaxala', chegoqta'a co'ollaq qonetaña ye Egipto; saishet qome da 'auauo'o ca lỹa 'anatamnaxala', cha'aye qaica ca lỹa 'arca'alaxaqui nachaỹemta.

⁵ Qaq aỹem 'am selotague' co'ollaq huaña ye toolec 'alhua, yem 'alhua maye ỹataqta deqaqta.

⁶ Qalaxaye co'ollaq mashe ỹaguec na qo'oqoi, nache naua qarquiyaqtelli' nlaxaguilo da qana'amqaanaxaqui, huaña nache Aỹem qaucoviỹa'ai.

⁷ Qaq ỹoqo'oye Aỹem sheeta'am qome ca llon, qataq sheeta'am ca quiyoc da huetaua'a na laỹe ca nqa'aic, da soicnapec namayepi.

⁸ Qataq ñauaneguet qome namayepi da seloquiaxan, sheeta'am aca oso da deqa't caua llalqa, nache ỹataqta secolaxattac añi lquiyaqte, qaq huaña nache sheeta'am ca llon da sachec namayepi, huo'otaq ca huauec shiguiỹac da ỹataqta secolaxattac namayepi.

⁹ Qaq 'am Israel, 'am ñelaxaañi qome nache qaica ca 'am itauan.

¹⁰ Qaq ¿hua'ague ca hueta'ague cam 'arta'a, da yaqto' nca'alaxatec na 'aralamaxat huaqta'a't nỹecpi? Qataq ¿ca hueta'ague cam 'arataxala'pi, maye 'auỹaxanot co'ollaxa da ỹauo'o ca 'arta'a qataq 'arataxala'pi?

¹¹ Qaq ỹataqta salemata co'ollaq 'am sanem som 'auỹaxaataique 'arta'alpi, qataq ỹataqta salemata co'ollaq ñeqat somayepi.

¹² Qaq nam qauem maye ỹo'ot co'ollaxa so Efraín nanettañi, qataq nam lasouaxashetpi qoỹettañi.

¹³ Qaq na Israel nvita qome ca nqui'ic, 'eeta'am aca 'alo da deco'o, qalaxaye namayepi 'eeta'am ca nogotolec da sanaỹamaq, nache saishet da maiche naỹamaxaañi da ñiguiñi.

¹⁴ Qaq namayepi, ¿peta'a ñeca'alaxateeguesop qome da la'añaxac añi huachiqui? Qataq ¿peta'a ñeca'alaxateeguesop qome da nleuaxa? Qaq 'am nleuaxa ¿Hueta'ague ca 'ara'añaxac? 'Am huachiqui ¿Hueta'ague cam qauem 'aro'onataxanaxac? ¡Aỹem saishet da sechoxoreetac qome ne'ena shiỹaxauapi!

¹⁵ Qaq na Israel, na'aictaxa qome da dasovi da 'eeta'am aca huoue, qalaxaye anac qome ca la'at maye chegaqa'ague da nala' lliguisheguem, cam lta'araic la'at maye chegoqtelec ye toolec 'alhua, nache deqaqa naqa'en ana laỹe'pi na 'etaxat qataq na npaxaatasheguem 'etaxat. Qataq na npa'aguenaxauapi namayepi deuotaxanec qome na logoxoshetpi, qataq nam ỹataqta no'on no'otaxatpi.

¹⁶ Qaq na nhuo' le'ecpi ye Samaria qalaq talec qome ca nhuaxanaguec, souaxat da dataỹa'aguet Ñim Natamnaxala'. Qataq qairolec ca ỹeelonec da qaỹalauat, na llalaqpi qalaq qaiuaxaneguet qome na 'alhua da qaỹalauat, qataq ana hualaxaipi qaipeleca'ague qome ana da'am.