Oseas 11 - La'aqtaqa Ñim Lo'onatac 'Enauacna 2013

Ñim Lo'onatac 'Enauacna ỹataqta ỹauotec so lalamaxat nhuo' le'ecpi

¹ Co'ollaq ñaq saxanaxa da ỹe na Israel le'ecpi, nache Aỹem ỹataqta ỹauotaxat, qataq sachegoxotchiguiña co'ollaxa ye Egipto da seỹaxana na ỹalaqpi.

² Qalaxaye co'ollaq ỹapac da seỹaxaatega, nache lamaxa nquictauec da aỹem ca'ai. Nache namayepi ỹaatacot ana lachetaqtaxanaqte nam saq 'en atamnaxala'pi, qataq ỹavigaxattac na lchenaxanaxat da ỹanot nam ne'enaqtacpi.

³ Qaq na'aictaxa 'enauac de'era, Aỹem sapaxaguenec da lqueuoxoc na chegoxoguetpi so Efraín, qataq sauecta'aguet co'ollaxa, ñasoqta'a na lhuaq namayepi, qalaxaye saishet da ỹaỹaaneguet da Nachaỹem da selotague' namayepi.

⁴ Qaq Aỹem serolec co'ollaxa da huesotta ỹauotaxanaqtaic da ñaueguela't namayepi, qataq ñesoxouo, 'eeta'am ca nogotolec maye ñaq lleptac, nache ñeqateeguesop na qapa'atta maye npeetague' namayepi, nache sanem na aloq da sequia'axaatac.

⁵ Qaq namayepi saishet qome da qaltaq ỹe'eguelaxa ye Egipto, cha'aye na asiiriopi choche ỹamaqtac qome namayepi, souaxat da namayepi saishet da aỹem ñe'eguelaxa.

⁶ Nache qairolec qome ca ỹeelonec, da qailaxachigui na huaqta'a't nỹecpi maye lalamaxatpi, qataq qailaxachigui na lpaqtaxatpi namayepi, qataq qanlaxaañi na maiche lapaxañi lataxacpi namayepi.

⁷ Ne'ena ỹalamaxat nhuo' le'ecpi ỹataqta lhuennataxa da Aỹem dataỹa'aguet, ỹoqo'oye na'aictaxa da iỹaxaatega da ỹe'enaxat, qalaxaye saishet da ỹoqta 'eesa da Aỹem ỹo'oxoreetac.

⁸ 'Am Efraín, ¿ca sheetectaxa da 'am sheca'ai? 'Am Israel, ¿ca sheetectaxa da 'am salat? ¿Isheto' peta'a da 'am selaxachigui da 'eeta'am so huaqta'a't nỹecpi ye Admá, huo'otaq da 'eeta'am da sheetec co'ollaxa so huaqta'a't nỹecpi ye Seboyin? ¡Da iquiyaqteỹaxac ỹataqta Aỹem iraxanapec, souaxat da ichoxonnataxanaxa da qoneta!

⁹ Ỹoqo'oye saishet da 'am serolec da ỹayeloxo, qataq saishet da she'eguelaxalec da ñelaxaañi ye Efraín, cha'aye Nachaỹem maye Ỹo'onatac 'Enauacna, qaq saishet da choche aỹem shiỹaxaua. Qataq Nachaỹem maye Aỹem Qui'itta, qami' salectaiguilo, qaq saishet da 'am ñanaỹa da 'am selaxachigui.

¹⁰ Qaq namayepi qome, ca'attague' qome Ñim Nataxala', qaq Ñimaye desoqo qome, 'eeta'am ca llon. Qaq qom desoqo Ñimaye, nache na lalamaxatpi iviloxol qom anac, chegoqta'ague da nala' lliguisheguem.

¹¹ Qaq 'eeta'am ca qoỹo da iviloxol qom anac chegaqa'a ye Egipto, qataq 'eeta'am ca qoto' qom anac chegaqa'a ye Asiria, nache Aỹem, sanaiguilo qome naua lma'ate namayepi. Qaq 'era da ỹa'aqtac Aỹem Nataxala'.

Da lasouaxashet na Israel le'ecpi

¹² Na Efraín qalaq aỹem coleesop naqa'en na latenataxanaxacpi, qaq na Israel le'ecpi qalaq aỹem coleesop naqa'en nam saq 'enpi. Qaq na Judá, qalaq ca'ai Ñim Lo'onatac 'Enauacna, qaq nagui ỹataqta ỹalaxaguet nam ỹaqa'a atamnaxala'pi.