Números 8 - La'aqtaqa Ñim Lo'onatac 'Enauacna 2013

Da lataxac da qaỹe'eraxatoigui aso ncoỹaraxanaxaquipi

¹ Ñim Nataxala' 'enapega so Moisés, 'eeta':

² «Qonapega ñi Aarón, da ivita da ỹe'eraxatoigui ñeua siete ncoỹaraxanaxaquipi, nache natatec naqa'en.»

³ Nache so Aarón ipacchigui da lamaxasoxonaxac Ñim Nataxala' maye ỹamaxalec co'ollaxa so Moisés, nache natatec naqa'en asa'aso ncoỹaraxanaxaquipi.

⁴ Qaq asa'aso ncoỹaraxanaxaquipi chegaqaigui na oro, qataq qairota'a aso ntoqnaxanaqte co'ollaq qaỹo'ot chegoqchiguiña qanqa'en na pa'aguiñi, nache ivitta'alo naua lsheeneqa aso lauoxopi. Qataq qaỹe'enaxatchigui da lataxac maye Ñim Nataxala' ỹachaxana co'ollaxa so Moisés.

Qaiỹotauga na leviitapi da lalamaxat Ñim Nataxala'

⁵ Nache Ñim Nataxala' 'enapega so Moisés, 'eeta':

⁶ «'Auỹotauga qome na leviitapi maye ỹalectaigui na laỹe Israel le'ecpi, nache 'auqui'itaxatta qome da lataxac.

⁷ Da lataxac da yaqto' qui'itta namayepi, 'eeta': 'Am 'auquetegaxaalec qome ca 'etaxat maye ishet da qui'itta naqa'en namayepi, qaq da ime, nache namayepi namarec 'enauac ana laso na lo'oc, qataq iỹoi' 'anqa'en naua alogo, nache namayepi ỹataqta qui'itta.

⁸ Qaq da ime, nache namayepi ỹacona ca 'oonolec huaca llalec, qataq ca laỹolec na ỹataqta no'on 'ayiiña, maye qairaqneguet na aceite, nache qaỹo'ot ca nachetaqtaxanaxat chegaqaigui na ala na nañiguishec, qaq 'am qalaq 'auacona ca lỹa huaca llalec, da yaqto' nachetaqtaxanaxat sa imauaq da qaỹavigaxat.

⁹ Nache nquigueua'a 'anqa'en na leviitapi ye sa qaỹapeque ñi npe'l maye naỹonqa', qataq 'alaỹona't 'enauac na Israel le'ecpi.

¹⁰ Qaq da mashe hueta'a na leviitapi ye lanataqa' Ñim Nataxala', nache na Israel le'ecpi ỹashel-lec 'anqa'en na lqaic qome namayepi.

¹¹ Nache ñi Aarón ỹanot qome Ñim Nataxala' na leviitapi, da yaqto' lachetaqtaxanaxat na Israel le'ecpi, nache namayepi ỹataqta qaiỹotauga da yaqto' do'onataxanot Ñim Nataxala'.

¹² Ime, nache na leviitapi ỹashel-lec na lqaic ca huaca llalaqpi, nache ca 'oonolec que'eca huaca llalaqpi, ỹaneuo da yaqto' qaỹapalaxat na lasouaxashetpi, qaq ca lỹa qalaq ỹanot Ñim Nataxala' da lachetaqtaxanaxat sa imauaq da qaỹavigaxatta.

¹³ Ime, nache na leviitapi nachaateua'a 'anqa'en ñi Aarón qataq ñeua llalqa, nache namayepi 'aỹa'anot Ñim Nataxala' da yaqto' nachetaqtaxanaxatpi.

¹⁴ Qaq 'era da 'eetec da 'auỹotauga na leviitapi, da 'auachegoxottoigui na Israel le'ecpi da yaqto' ỹalamaxatpi.

¹⁵ Qaq da ime, nache naua'a ñi npe'l maye naỹonqa' da yaqto' ỹo'ot da lo'onataxanaxac. Nache namayepi ỹataqta qui'itta 'anqa'en yaqto' Aỹem 'aỹa'anot da yaqto' nachetaqtaxanaxatpi.

¹⁶ Cha'aye namayepi qaỹachegoxottoigui na laỹepi Israel le'ecpi, da Aỹem qoỹanot da Aỹem do'onataxanot. Cha'aye Aỹem sacona namayepi da yaqto' naiguet ñaqa'en na la'auaxanec llalec na Israel le'ecpi.

¹⁷ Cha'aye Aỹem, ỹalamaxat 'enauac na la'auaxanec llalec na Israel le'ecpi, 'eeta'am nataqa'en na la'auaxanec llalec na lalo shiguiỹacpi, chegoqta'a co'ollaq ileu ñaqa'en so la'auaxanec llalec so Egipto le'ecpi, nache Aỹem sacona da ỹalamaxat na la'auaxanec llalec na Israel le'ecpi.

¹⁸ Qalaxaye Aỹem saconeua'a na leviitapi, da yaqto' naiguet ñaqa'en ne'ena la'auaxanec llalaqpi na Israel le'ecpi.

¹⁹ Nache ne'ena leviitapi, sanem ñi Aarón qataq na llalaqpi, 'eeta'am ñaqa'en da lachetaqtaxanaqte na Israel le'ecpi, da yaqto' ỹo'ot na no'onatacpi ñi npe'l maye naỹonqa', qataq da qaỹapalaxat na lasouaxashet na Israel le'ecpi. Yaqto' saishet da huo'o ca huaigui qauem na Israel le'ecpi da nqo'oneua'a ñi npe'l.»

²⁰ Nache so Moisés, Aarón qataq 'enauac so nhuo' le'ecpi, ipactelec da lamaxasoxonaxac Ñim Nataxala' da ỹo'otec na leviitapi da qaỹamaxalec co'ollaxa so Moisés.

²¹ Qaq somayepi nỹota co'ollaxa qataq iỹoi' naua alogo. Nache so Aarón ỹaneuo somayepi da yaqto' nachetaqtaxanaxat, qataq ỹo'ot da lataxac da yaqto' qaỹapalaxat na lasouaxashetpi.

²² Nache co'ollaq ime de'era, nache so leviitapi, taua'a so npe'l maye naỹonqa' da yaqto' ỹacoolec da lo'onataxanaxac, qaq so Aarón qataq so llalaqpi ilotague' da lo'onataxanaxac somayepi. Nache qaipacchigui da lamaxasoxonaxac Ñim Nataxala' maye ỹamaxalec co'ollaxa so Moisés.

²³ Nache Ñim Nataxala' 'enapega so Moisés, 'eeta':

²⁴ «Qaq ne'ena leviitapi da huo'o ca mashe ivi' na veinticinco vi'i da nachaalataxac, nache ishet da do'onataxaneua'a ñi npe'l maye naỹonqa',

²⁵ qataq da ivi' ca cincuenta vi'i, nache namayepi nañaxaañi da do'onataxaatac.

²⁶ Nache namayepi ishet da itauan na laỹepi maye hueta'a ñi npe'l maye naỹonqa', qalaxaye saishet da qaltaq ỹacoolec da lo'onataxanaxac co'ollaxa. Qaq 'era qome da qoỹeetec na leviitapi de'era lo'onataxanaxac.»