Números 6 - La'aqtaqa Ñim Lo'onatac 'Enauacna 2013

Ca shiỹaxaua qaiỹotauga da lalamaxat Ñim Nataxala'

¹ Nache Ñim Nataxala' 'enapega so Moisés, 'eeta':

² «Qonapega qome na Israel le'ecpi qoneta': Da huo'o ca ỹale, qataq 'alo da nañan da qaiỹotauga da lalamaxat Ñim Nataxala',

³ nache camaye saishet qome da nỹomgui na lataxa, huo'otaq na 'euaxaic lataxa, huo'otaq na lli'i ana uva, huo'otaq aca ñaq no'oitai' ala ana uva, huo'otaq aca nqaxaỹaqta.

⁴ Nache choche ivittraue'c naua na'axa'te da nañanot Ñim Nataxala', da saishet da chec ca chegaqaigui aca uva, qataq ana ala, huo'otaq na lo'oc acamaye.

⁵ Qataq 'enauaque naua na'axa'te maye huetaiguilo da nañanot da lalamaxat Ñim Nataxala', nache saishet qome da ỹe'egueeta'a da ichec na laue, nda'a't da huaqta'a da ñaxat qataq nalemaqte' da qui'itta naqa'en da lataxac.

⁶ Qataq da ñaq huetaiguilo que'ecaua na'axa'te de'era nañanaxac, nache saishet da nachaateua'a ca huetaña ca leuaxaic,

⁷ na'aictaxa da lta'a, late'e, lqaỹa ỹale, huo'otaq lqaỹa 'alo aca ileu, yaqto' que'eca leuaxaic saishet da na'aqchet camaye, cha'aye mashe qaiỹotauga da lalamaxat Ñim Nataxala'.

⁸ Nache 'enauaque caua na'axa'te maye huetaiguilo da nañanot Ñim Nataxala', camaye iuen da nqui'itaxatta.

⁹ Qaq da huo'otaq huo'o ca nque'elaxatta da ileu da huaqta'ai' camaye, nache na'aqchet da nañanaxac, nache iuen da qaichec na laue da ivireuga ca na'a'q siete.

¹⁰ Nache que'eca na'a'q ocho, camaye iroua'a ca ñegueuo ca npe'l maye huaña naxa da qanauane' Ñim Nataxala', da ỹanem ca ntaxaỹaxanaxanec caua dos qoto' lta'araiqa, huo'otaq llalqolqa.

¹¹ Nache ca ntaxaỹaxanaxanec ỹaneuo ca 'oonolec caamaye da yaqto' nachetaqtaxanaxat maye sa imauaq da qaỹavigaxat, qaq ca lỹa nache qaỹavigaxatta yaqto' qaỹapalaxat ca lasouaxashet camaye, souaxat da huaqta'ai' ca leuaxaic. Qaq nacheca que'eca na'a'q da qaltaq qui'itta que'eca shiỹaxaua maye qaiỹotauga da lalamaxat Ñim Nataxala',

¹² qataq nache chegoqchiguiña da qaltaq qaiỹotauga da lalamaxat Ñim Nataxala', qataq ỹaneuo ca qagueta llalec maye ivi' ye 'oonolec vi'i, da lachetaqtaxanaxat maye sa imauaq da qaỹavigaxat. Nache caua hua'au' na'axa'te saishet qome da qanaloqteereuo souaxat da qana'aqchet da lataxac camaye da qoỹanot Ñim Nataxala'.

¹³ Qaq da ime da qaltaq qoỹaneuo camaye da lalamaxat qanqa'en Ñim Nataxala', nache camaye taua'a ca ñegueuo ca npe'l maye naỹonqa',

¹⁴ nache ỹanot Ñim Nataxala' ca qagueta llalec maye ivi' ye 'oonolec vi'i, qataq qaica ca lque'emaxa, da lachetaqtaxanaxat qaỹavigaxatta, qataq aca 'oonole qagueta llale qaica ca lque'emaxa maye sa imauaq da qaỹavigaxat, da yaqto' qaỹapalaxat ca nasouaxashet, qataq ca peenaq maye qaica ca lque'emaxa da lachetaqtaxanaxat maye qanhuaachigui.

¹⁵ Nataqa'en ỹaneuo aca 'oonole npaqtole huetangui aca nauole 'ayiiña qaca ana lalecte, qataq aca sa nquesaxan nauole maye qairaqneguet na aceite qataq aca laỹe nachetaqtaxanaqtepi maye chegaqaigui ana ala ca nañiguishecpi qataq ca lataxa.

¹⁶ Nache ca ntaxaỹaxanaxanec ỹanot Ñim Nataxala', ca nachetaqtaxanaxat sa imauaq da qaỹavigaxat, da yaqto' qaỹapalaxat na nasouaxashet, qataq ca qaỹavigaxatta,

¹⁷ qataq ỹanot Ñim Nataxala' ca quetaq da yaqto' nachetaqtaxanaxat qanhuaachigui, qataq lỹateuo aca npaqtole maye huetangui aca nauole maye qaca ana lalecte. Nataqa'en ỹaneuo aca nachetaqtaxanaqtepi maye chegaqaigui na ala ca nañiguishec qataq ca lataxa.

¹⁸ Qaq que'eca shiỹaxaua maye qoỹanot da lalamaxat Ñim Nataxala', camaye da namarec na laue na lqaic, nache huaña naqa'en ca ñegueuo ca npe'l. Ime, nache ỹacona que'eca laue maye icheguec, nache ỹasaxangui ca norec maye huetaña na pa'aguiñi ca nachetaqtaxanaxat maye qanhuaachigui.

¹⁹ Qaq da ime da namarecta na lqaic camaye, nache ca ntaxaỹaxanaxanec ỹacona ca ltele'eta ca peenaq maye mashe datoxoic, qataq aca 'oonole nauole qaca ana lalecte maye huetangui aca npaqtole, qataq aca lỹa nauole maye sa nquesaxan qaca ana lalecte, qaq 'enauac camayepi da ỹachaleguete naua lhua'q cam shiỹaxaua maye qoỹaneuo da lalamaxat Ñim Nataxala'.

²⁰ Qaq da ime 'enauac de'era, nache ca ntaxaỹaxanaxanec ỹaasheguem que'eca nachetaqtaxanaxat da ỹanot Ñim Nataxala'. Cha'aye camaye sa qaishetapec, qataq qaiỹotauga da lalamaxat ca ntaxaỹaxanaxanec, qaq nache 'ena'am ca ltogue lapat maye qoỹaasheguem, qataq ca ltele'eta maye qaiỹotauga. Qaq da imeta 'enauac de'era, nache que'eca shiỹaxaua maye qoỹaneuo, ishet da nỹomigui ca lataxa.

²¹ Qaq 'era da lataxac ca shiỹaxaua da nañan da qaiỹotauga da lalamaxat Ñim Nataxala', qataq da ỹo'ot aca lachetaqtaxanaqte souaxat da nañanaxac, qataq ca lỹa maye ishet da nalotalec da ỹaneuo camaye, yaqto' ipacchigui qome da lataxac ca ỹan la'aqtac.»

No'on na'aqtac maye ỹan ca ntaxaỹaxanaxanec

²² Nache Ñim Nataxala' 'enapega so Moisés, 'eeta':

²³ «Qonapega qome so Aarón qataq soua llalqa, da ivita da ỹan ca no'on la'aqtac da talec naqa'en ca nqouagaxa na Israel le'ecpi, nache 'eeta':

²⁴ ‹Ñim Nataxala' 'am talec naqa'en ca 'anqouagaxa, qataq 'am ntela'a,

²⁵ qataq 'am ỹaỹamaxareeta da 'am ilota'a, qataq 'am ỹanem da lchoxonnataxanaxa,

²⁶ qataq Ñim Nataxala' 'am ỹaỹamaxareeta da 'am ilota'a, qataq ỹauo'o da 'arlagaxayec›.

²⁷ Qaq 'era qome da 'eetec da ỹan ca no'on la'aqtac da talec naqa'en ca nqouagaxa na Israel le'ecpi, nache Aỹem sanem qome ca nqouagaxa namayepi.»