Números 5 - La'aqtaqa Ñim Lo'onatac 'Enauacna 2013

Ca'ai qanqa'en ca qanayeuta'a na huo'o da lalolaxa

¹ Ñim Nataxala' 'enapega so Moisés, 'eeta':

² «Qonapega qome na Israel le'ecpi da ca'ai naqa'en ca qanayeuta'a nanataqa', 'enauac na shiỹaxaua maye hueta'ac na nchega naqa'en na lo'oc, qataq na anactac na lli'i ñi logoxoshet, huo'otaq ca ipoteua'a ca leuaxaic.

³ Qaq na'aictaxa da ỹale huo'otaq 'alo, nache qaỹo'orauec, ca'ai qanqa'en ca qanayeuta'a nanataqa'. Yaqto' saishet da huo'o ca huec ne'ena nalolaxapi que'eca qanayeuta'a nanataqa', maye nataqa'en Aỹem sootaña.»

⁴ Nache so Israel le'ecpi ỹo'ot co'ollaxa de'era lamaxasoxonaxac Ñim Nataxala', maye ỹamaxalec co'ollaxa so Moisés, nache ca'ai naqa'en ye qanayeuta'a nanataqa' se'eso shiỹaxauapi.

Da 'eetec da qaisheeten ca nasouaxashet

⁵ Ñim Nataxala' 'enapega so Moisés, 'eeta':

⁶ «Qonapega na Israel le'ecpi, qoneta': Da huo'o ca ỹale huo'otaq 'alo da huo'o ca lasouaxashet hueto'ot ca lỹa, nache camaye nataqa'en huo'o da lasouaxashet hueto'ot Ñim Nataxala',

⁷ nache camaye iuen da ỹa'axat ca lasouaxashet. Qataq isheeten que'eca shiỹaxaua maye hueto'ot ca lasouaxashet, qataq ipacchigui naqa'en aca lasheue ca lasouaqtac, qataq ỹauo'o aca ỹactec da isheeten camaye.

⁸ Qaq da huo'otaq ileu que'eca shiỹaxaua maye hueto'ot ca lasouaxashet, qataq da qaica ca lauo' le'ec da yaqto' qoỹanem aca nsheetenaqte, nache qoỹanot Ñim Nataxala', qalaxaye qoỹanem ca ntaxaỹaxanaxanec, nache lỹateuo ca qagueta peenaq maye qaỹavigaxat, da yaqto' qaỹapalaxat ca lasouaxashet que'eca shiỹaxaua.

⁹ Qataq 'enauac aca qaiỹotauga nachetaqtaxanaqtepi maye ỹaneuo na Israel le'ecpi, acamaye qairoua'a ca ntaxaỹaxanaxanec da yaqto' lalamaqte.

¹⁰ Qataq 'enauac aca qaiỹotauga da qoỹanot Ñim Nataxala', acamaye qairoua'a ca ntaxaỹaxanaxanec da yaqto' lalamaqte.»

Da nqataxac da huo'o ca deca'alaxaatac

¹¹ Ñim Nataxala' 'enapega so Moisés, 'eeta':

¹² «Qonapega qome na Israel le'ecpi, qoneta': Saiuena'a da huo'o aca 'alo maye huo'o ca lhua, qalaxaye saỹalemaq,

¹³ nache lauañi' ca lỹa ỹale, qalaxaye ca lhua aca'aca 'alo saishet da ỹaỹaten da saỹalemaq acamaye, cha'aye ỹataqta ỹoxotchiguiñi de'era ỹo'ot, qataq qaica ca ỹauangui acamaye da yaqto' ỹa'axat da 'eesa da huo'o ca ỹo'ottac.

¹⁴ Qaq saiuena'a da choche deca'alaxaatac que'eca ỹale, da ica'altac aca lhua, ipi'itaxaatega da saỹalemaq, qalaxaye acamaye qaica ca lasouaxashet.

¹⁵ Qaq da nache 'eetec de'era, nache que'eca ỹale, ỹauegueua'a ca ntaxaỹaxanaxanec aca lhua, nache ỹaneuo ca dos kilos ca 'ayiiña, chegaqaigui na cebada da lachetaqtaxanaxat camaye. Qalaxaye saishet da icorelec ca aceite huo'otaq ca nchenaxanaxat aca'aca lachetaqtaxanaqte, cha'aye acamaye nachetaqtaxanaqte souaxat da nca'alaxanaxac. Qataq acamaye nachetaqtaxanaqte da yaqto' ya'aqalec ca nasouaxashet.

¹⁶ Nache ca ntaxaỹaxanaxanec ỹauegueuo aca'aca 'alo da yaqto' nachaateua'a Ñim Nataxala'.

¹⁷ Ime, nache que'eca ntaxaỹaxanaxanec icoyingui ca 'etaxat sa qaishetapec acatai' ỹomaxaqui 'alhuole, nache ỹalecneguet ca lsoche na 'alhua maye huaigui ca pa'auo que'eca npe'l.

¹⁸ Nache ca ntaxaỹaxanaxanec ỹauegueua'a Ñim Nataxala' aca'aca 'alo, qataq isogui na laue acamaye, qataq ỹachaleguete naua lhuaxaye acamaye aca nachetaqtaxanaqte, maye naigui da qaiuennate ca nasouaxashet. Souaxat da nca'alaxanaxac, qaq camaye nache nasoqta'a aca 'alhuole maye huetangui ca 'etaxat maye ỹataqta chem, cam chegaqaigui ca nhuaxanaguec.

¹⁹ Nache ca ntaxaỹaxanaxanec ỹan naqa'en ca 'eesa la'aqtac aca'aca 'alo, nache 'enapega, 'eeta': ‹Qom ỹoqta 'eesa da saishet da qouetapeeguet ca lỹa ỹale, qataq saishet da sa 'aualemaq, nache saishet da 'am na'aqchet qom 'anỹomgui ne'ena 'etaxat maye ỹataqta chem, maye chegaqaigui ca 'anhuaxanaguec.

²⁰ Qaq da huo'otaq 'eesa da sa 'aualemaq da qouetapeeguet ca lỹa ỹale, nache damaye ỹo'ot da saishet da 'am qui'itta,

²¹ nache ca ntaxaỹaxanaxanec qataq ỹa'axatem aca'aca 'alo ca nhuaxanaguec qome, 'eeta': Ñim Nataxala' ỹo'ot qome da 'am naloqnaxanaqte souaxat ca 'anhuaxanaguec, qataq da maiche 'aỹa'an 'ara'aqtac maye hua'aqchigui na 'arhuo' le'ecpi, nache ỹashiiyigui qome ana 'ara'am qataq ỹo'ot da sa 'auco'o.

²² Qaq que'eca 'anhuaxanaguec, 'am talec qom mashe ime da 'anỹomgui ne'ena 'etaxat maye chegaqaigui ca 'anhuaxanaguec, nache ỹasheeraxachigui ana 'ara'am qataq ỹo'ot da sa 'auco'o›. Nache aca'aca 'alo ỹasat qome, 'eeta': ‹Aja', nache 'eetec.›

²³ Nache que'eca ntaxaỹaxanaxanec ỹerelec qome aca nere de'era qauem nhuaxanaguec aca 'alo, qalaxaye ỹauota'a que'eca 'etaxat maye ỹataqta chem da ỹapalaxat ca lerec.

²⁴ Qaq da ime, nache nỹomaxangui que'eca 'etaxat maye ỹataqta chem maye ỹo'ot ca nhuaxanaguec aca'aca 'alo, yaqto' ỹo'ot da nqui'ic na lauel acamaye,

²⁵ nache ca ntaxaỹaxanaxanec ỹaconeguet qome aca lachetaqtaxanaqte maye nasoqta'a acamaye, souaxat da nca'alaxanaxac, nache ỹaasheguem da ỹanot Ñim Nataxala', ime nache ỹachalec aca nca'atoxonaxalate,

²⁶ qataq ỹauota'a 'oonole napocna da ỹacona ca laỹe ca lsoche aca nachetaqtaxanaqte maye chegaqaigui ca nañiguishec ala maye naigui da saishet da qaicoua'ai acamaye, nache ỹachalec aca nca'atoxonaxalate da ỹavigaxat, qom mashe ime da nỹomaxangui ca 'etaxat.

²⁷ Qaq da ỹoqta 'eesa da saỹalemaq acamaye, nache que'eca 'etaxat maye ỹo'ot ca nhuaxanaguec, chemgui naqa'en na lauel, nache ỹashiiyigui, qataq ỹo'ot da saishet da deco'o. Nache da ỹalectaigui ca lauo' le'ecpi acamaye qalaq huetalec que'eca qauem nhuaxanaguec.

²⁸ Qalaxaye da qaica ca lasouaxashet aca'aca 'alo, nache qaica ca machaqca, qataq ishet qome da huo'o ca llalaqpi.

²⁹ Qaq 'era da lataxac da nqataxac da huo'o ca deca'alaxaatac, qataq da sa ỹalemaq aca 'alo,

³⁰ huo'otaq da choche qaica'altac acamaye. Nache ca lhua ỹauegueua'a ca ntaxaỹaxanaxanec da yaqto' nachaateua'a naqa'en ye lanataqa' Ñim Nataxala', nache ca ntaxaỹaxanaxanec ipacchigui naqa'en de'era nqataxac.

³¹ Qaq ca lhua aca'aca 'alo, qaica ca lasouaxashet, qalaxaye acamaye da huo'otaq 'eesa da huo'o ca lasouaxashet, nache maiche nque'etaxangui ca nhuaxanaguec.»