Números 28 - La'aqtaqa Ñim Lo'onatac 'Enauacna 2013

Aso nachetaqtaxanaqte ye na'a'q

¹ Ñim Nataxala' 'enapega so Moisés, 'eeta':

² «'Auamaxalec qome na Israel le'ecpi da ipacchigui naqa'en naua laloxoqui' da ỹaneuo aca lachetaqtaxanaqtepi maye ỹavigaxat, cha'aye aca'aca lachetaqtaxanaqtepi maye samaateguet da laitaỹaxac, acamaye maiche ỹalamaqte.

³ Nataqa'en 'aua'aqtaxanem da 'enauaque naua na'axa'te da ỹaneuo ca lachetaqtaxanaxatpi, ỹavigaxatta da ỹanot Ñim Nataxala': Dos naqa'en caua qagueta llalqa maye ivi' ye 'oonolec vi'i qataq qaica ca lque'emaxa,

⁴ qaq 'oonolec ca ỹaneuo ye nte'eta, qaq ca lỹa qalaq ỹaneuo ye avit.

⁵ Qaq que'eca lachetaqtaxanaxat, qalaq ỹauaxaỹaxaneguet ca dos kilos ca ỹataqta no'on 'ayiiña, maye chegaqaigui na ala ca nañiguishec, nache iraqneguet ca un litro ca aceite.

⁶ Qaq ne'ena nachetaqtaxanaxat qaỹavigaxatta nachena nam qoỹaategueuo ima'ape naua na'axa'te co'ollaq huaña añi qasoxonaxa ye Sinaí, da yaqto' nachetaqtaxanaxat maye ỹamaateguet da laitaỹaxac Ñim Nataxala'.

⁷ Qaq ca nachetaqtaxanaxat lataxa, camaye un litro ca qoỹaneuo da huaqtalec qanqa'en ca 'oonolec qagueta. Qaq que'eca lataxa qaicorelec ye lanataqa' da qaỹo'oxoren Ñim Nataxala'.

⁸ Qaq ca avit nache qaỹalauat que'eca lỹa qagueta, nache huaqtalec qanqa'en ca nachetaqtaxanaxat maye chegaqaigui na ala ca nañiguishec, qataq ca lataxa nache 'eeta'am qanqa'en so nachetaqtaxanaxat se'eso nte'eta. Nache camaye nachetaqtaxanaxat qaỹavigaxatta yaqto' da ama laitaỹaxac ỹamaateguet Ñim Nataxala'.

⁹ Qaq ye na'a'q mataxaqui, nache qaỹa'añiireuo caua dos qagueta maye ivi' ye 'oonolec vi'i, qataq qaica ca lque'emaxa, qataq ca cuatro kilos ca ỹataqta no'on 'ayiiña qairaqneguet ca aceite da yaqto' nachetaqtaxanaxat maye chegaqaigui na ala ca nañiguishec, qataq ca nachetaqtaxanaxat lataxa maye huaqtalec camaye.

¹⁰ Qaq 'eca ca nachetaqtaxanaxatpi qaỹavigaxatta, ye na'a'q mataxaqui, qataq aca nachetaqtaxanaqte qaỹavigaxatta maye, nache 'eetai' da qaỹo'ottac 'enauaque naua na'axa'te huaqta'aguet qanqa'en ca lataxa.»

Nachetaqtaxanaxat da dalaxaic ñi ca'agoxoic

¹¹ «Da ivita ye la'auaxanec na'a'q da dalaxaic so ca'agoxoic, nache qaỹa'añiỹot Ñim Nataxala', caua dos huaca llalqa, qataq 'oonolec ca qagueta lhuaraic, qataq caua siete qagueta llalqa maye ivi' ye 'oonolec vi'i, qataq qaica ca lque'emaxa da yaqto' nachetaqtaxanaxat qaỹavigaxatta.

¹² Qataq da qoỹaneuo ca 'oonolec huaca, nache qoỹaneuo ca seis kilos ca ỹataqta no'on 'ayiiña, qairaqneguet ca aceite,

¹³ qaq da qoỹaneuo ca 'oonolec qagueta llalec, nache huaqtalec qanqa'en ca dos kilos ca 'ayiiña, qairaqneguet ca aceite. Nache nachetaqtaxanaxat qaỹavigaxatta, yaqto' da ama laitaỹaxac ỹamaateguet Ñim Nataxala'.

¹⁴ Qaq ca nachetaqtaxanaxat lataxa qoỹaneuo ca dos litro da qoỹaneuo ca 'oonolec huaca llalec, qaq da qoỹaneuo ca qagueta lhuaraic, nache qoỹaneuo ca un litro y medio, qaq da qoỹaneuo ca qagueta llalec, nache qoỹaneuo ca un litro ca lataxa. Qaq 'eca ca nachetaqtaxanaxat qaỹavigaxatta da ivita da dalaxaic so ca'agoxoic ye 'oonolec vi'i.

¹⁵ Qaq cam nachetaqtaxanaxat maye, qoỹaatapegueuo ye na'a'q, qaq nataqa'en iuen da qoỹoneuo ca quetaq da nachetaqtaxanaxat da yaqto' qaỹapalaxat na nasouaxashetpi.»

Nachetaqtaxanaxatpi da ivita ye Lapascua

¹⁶ Qaq ca na'a'q catorce ca la'auaxanec ca'agoxoic ye vi'i, nache huetoigui qome da qaỹo'ot ca Lapascua da qaỹo'oxoren Ñim Nataxala',

¹⁷ qaq ca na'a'q quince, nache qaỹo'ot ca ỹo'oxoraq naponaxac. Nache siete na'axa'te da qanallectac aca nauole maye qaica ca lalegue.

¹⁸ Qataq que'eca la'auaxanec na'a'q que'ecaua siete na'axa'te, nache qaỹo'ot ca ỹo'oxoraq naponaxac. Nache que'eca na'a'q qaica ca qaỹo'ot no'onatac.

¹⁹ Nache qoỹaareuo caua dos huaca llalqa, qataq 'oonolec ca qagueta lhuaraic qataq caua siete qagueta llalqa maye ivi' ye 'oonolec vi'i, qataq qaica ca lque'emaxa da yaqto' nachetaqtaxanaxat qaỹavigaxatta da qoỹanot Ñim Nataxala'.

²⁰ Qaq que'eca nachetaqtaxanaxat lỹateuo qanqa'en ca nachetaqtaxanaxat 'ayiiña maye qairaqneguet ca aceite, nache ñi 'oonolec huaca llalec maye qoỹaneuo, nache huaqtalec qanqa'en ca seis kilos ca 'ayiiña, qataq ñi 'oonolec qagueta lhuaraic, huaqtalec qanqa'en ca cuatro kilos 'ayiiña,

²¹ qaq ñi 'oonolec caua qagueta llalqa, nache huaqtalec ca dos kilos ca qoỹaneuo 'ayiiña.

²² Qataq qoỹaneuo nataqa'en ca 'oonolec quetaq da yaqto' qaỹapalaxat na nasouaxashetpi.

²³ Qaq 'enauac ne'ena nachetaqtaxanaxat, namayepi nataqa'en qoỹanauo da qaỹavigaxat, huaqtalec qanqa'en ca nache 'eetai' da qoỹaatapegueuo ye nte'eta 'enauaque naua na'axa'te.

²⁴ Qaq 'era da qauo'oche da huaigui ye 'oonolec na'a'q que'ecaua siete na'axa'te da nachetaqtaxanaxat qaỹavigaxatta yaqto' da ama laitaỹaxac ỹamaateguet Ñim Nataxala'. Nache huaqtalec qanqa'eñi aca nachetaqtaxanaqte maye nache 'eetai' da qoỹaatapegueuo 'enauaque naua na'axa'te qataq ca lataxa.

²⁵ Qaq ca na'a'q siete, nache qauo'oche ca ỹataqta ỹo'oxoraq naponaxac. Nache que'eca na'a'q qaica qome ca do'onataxan.

Nachetaqtaxanaxat la'auaxanec ala ca nañiguishec

²⁶ Qaq ca naponaxac da qantonec ca la'auaxanec ala ca nañiguishec, nache da qaỹa'añiỹot Ñim Nataxala' ca la'auaxanec ala ca nañiguishec, nache qauo'oche qome ca lta'araic naponaxac da qavio'oxonnataxañi. Qataq qaica qome ca qaỹo'ot nam no'onatacpi.

²⁷ Qataq qaỹa'añiỹot Ñim Nataxala' caua dos huaca llalqa, 'oonolec qagueta lhuaraic, qataq siete caua qagueta llalqa maye ivi' ye 'oonolec vi'i, da nachetaqtaxanaxat qaỹavigaxatta, yaqto' da ama laitaỹaxac ỹamaateguet Ñim Nataxala'.

²⁸ Qaq que'eca nachetaqtaxanaxat lỹateuo qanqa'en ca qoỹaneuo 'ayiiña maye qairaqneguet ca aceite, nache ñi 'oonolec huaca llalec huaxaiguet qanqa'en ca seis kilos ca 'ayiiña, qaq ñi 'oonolec qagueta lhuaraic huaxaiguet qanqa'en ca cuatro kilos ca 'ayiiña,

²⁹ qaq ñi 'oonolec qagueta llalec, nache dos kilos ca huaxaiguet 'ayiiña.

³⁰ Nataqa'en qaỹa'añiiuo ca nachetaqtaxanaxat quetaq da yaqto' qaỹapalaxat ca qarasouaxashichi.

³¹ Nache que'eca nachetaqtaxanaxat qaỹavigaxatta lỹateuo qanqa'en ca nachetaqtaxanaxat 'ayiiña, qataq ca lataxa, qataq ca nachetaqtaxanaxat qaỹavigaxatta maye nache 'eetai' naxa da qoỹaatapegueuo 'enauaque naua na'axa'te. Qaq camayepi qaica qome ca lque'emaxa.