Números 23 - La'aqtaqa Ñim Lo'onatac 'Enauacna 2013

So Balaam ỹasaxalec da nchoxonnataxanaxa so Israel le'ecpi

¹ Nache so Balaam 'enapega so Balac, 'eeta': 'Ano'oxooyishegue'm qome ne'ena, caua siete nca'atoxonaxalate, qataq 'auqataxanai'salo caua siete huaca llalqa, qataq caua siete qagueta lhuaraiqa.

² Nache so Balac ỹo'ot da la'aqtac so Balaam, nache 'enauaque soomaye da ỹaareuo soua huaca llalqa, qataq soua qagueta lhuaraiqa, nache ñi 'oonolec huaca llalec qataq 'oonolec qagueta lhuaraic, ỹachaleguete añi 'oonole soua nca'atoxonaxalate.

³ Huaña nache so Balaam 'enapega so Balac, 'eeta': Nache qoueta'a qome ne'ena sa qaỹapeque na 'arachetaqtaxanaxat, qaq aỹem qalaq saicra'atai' shapegueto' da ishet da ñauane' Ñim Nataxala'. Qaq ca la'aqtac Ñimaye, nache 'am sa'axatem qome. Nache so Balaam jec, tasheguema aso no'oitelec lcomaraxalate.

⁴ Nache Ñim Nataxala', nachaxana so Balaam, nache so Balaam 'enapeco': Aỹem samaxasoxooleguete da qano'oxoyishegue'm ñeua siete nca'atoxonaxalate, nache añi 'oonole ñiimaye, sachalec ñi 'oonolec huaca llalec, qataq 'oonolec qagueta lhuaraic, da yaqto' 'Am sanot da ỹachetaqtaxanat.

⁵ Nache Ñim Nataxala' ỹanem so Balaam da la'aqtac, nache 'eeta': 'avi'eguelaxa qome ye hueta'a da Balac, nache 'aua'aqtaxanem dam 'am sanem ỹa'aqtaxanaxac.

⁶ Nache so Balaam ỹe'eguelaxa ye hueta'a so Balac, qaq somaye ñaq nachattaua'a so lachetaqtaxanaxat, qataq nataqa'en 'enauac so lataxala'pi so Moab le'ecpi.

⁷ Qaq huaña nache so Balaam do'onaxaataueeguelo naua la'aqtaqa, 'eeta': So Balac maye lta'a na netaña na Moab. Aỹem ỹachegoqchiguiña aye qasoxonaxapi maye pa'aigue da nala' lliguisheguem ye Aram, da aỹem nauega ne'ena 'alhua. Nache aỹem 'enapega 'eeta': Ña 'auanac qome da yaqto' 'auasaxalec ca qauem 'ara'aqtac so Jacob, qataq 'auasaxalec ca nhuaxanaguec na Israel.

⁸ Qalaxaye ¿Ca 'eeteco' da sasaxalec ca qauem ỹa'aqtac, ne'ena shiỹaxauapi maye Ñim Lo'onatac 'Enauacna saishet da ỹasaxalec ca qauem la'aqtac? ¿Qataq ta'ainec taxa da sasaxalec ca nhuaxanaguec, ye Ñim Nataxala' saishet da ỹo'ot ca nhuaxanaguec?

⁹ Huaña ana'ana qaỹoqotcheguemec coma' nache ishet da sela'a, qataq da sootaña ne'ena ỹataqta pa'asheguem ana qasoxonaxapi, nache semeteetac yi'iye nhuo' le'ecpi, maye ỹataqta qaiỹotauga, qataq saishet da 'eeta'am da lataxac na laỹepi shiỹaxauapi.

¹⁰ Yemayepi, 'eeta'am na lsoche na 'alhua, ¿Qaq negue'tom ca ishet da naloqten na chegoxoguetpi so Jacob? Qataq negue't ca ishet da ỹaỹaten ye lcata namayepi. ¡Qaq 'onaxaictoxo' da sheeta'am yi'iye shiỹaxauapi maye no'on da lataxac qom seleu. Qataq ca ỹoga't, nache sheeta'am qome ca loga't yemayepi!

¹¹ Nache so Balac, iviraxato'ot so Balaam, 'eeta': ¿Ta'ainco' da qonetec de'era? ¡Aỹem, 'am ñauega ne'ena da yaqto' 'auasaxalec ca qauem 'ara'aqtac na ñepa'aguenaxauapi, qaq nagui qalaq talec 'anqa'en da no'on 'ara'aqtac namayepi!

¹² Nache so Balaam, 'enapeco': Mashe 'am sa'aqtaxaateguem mque' da nachecata ca aỹem ỹanem la'aqtac Ñim Nataxala', nacheca sa'axat.

So Balaam qaltaq ỹe'eguelaxalec da ỹo'ot da nchoxonnataxanaxa

¹³ Qalaxaye so Balac qaltaq, 'eeta': 'Aỹala qolaq, ñeqo'onaxa ye lỹa 'alhua, yem huaña da saishet da imauec da 'aula'a yi'iye shiỹaxauapi. Qaq nache huaña qome da 'auasaxalec ca qauem 'ara'aqtac yemayepi.

¹⁴ Nache so Balac ỹauec so Balaam da tasheguema ye Sofim, yem huaña so pa'asheguem añi qasoxonaxa Pisga. Huaña nache qaltaq no'oxooyishegue'm soua siete nca'atoxonaxalate, nache ñi 'oonolec huaca llalec, qataq 'oonolec qagueta lhuaraic, ỹachalec añi 'oonole se'esoua nca'atoxonaxalate.

¹⁵ Huaña nache so Balaam 'enapega so Balac, 'eeta': Nache qoueta'a qome ne'ena sa qaỹapeque na 'arachetaqtaxanaxat, qaq aỹem qalaq saicra'atai' da yaqto' ñauane' Ñim Nataxala'.

¹⁶ Nache Ñim Lo'onatac 'Enauacna nauane' so Balaam, nache ỹanem so la'aqtac, 'eeta': 'avi'eguelaxa ye hueta'a da Balac, nache 'aua'aqtaxanem da 'am sanem ỹa'aqtaxanaxac.

¹⁷ Nache so Balaam ỹe'eguelaxa ye hueta'a so Balac, qaq somaye ñaq nachattaua'a so lachetaqtaxanaxat, qataq nataqa'en 'enauac so lataxala'pi so Moab le'ecpi. Nache so Balac inat somaye, 'eeta': ¿Ca 'eetec ca 'am ỹanem la'aqtac Ñim Nataxala'?

¹⁸ Nache so Balaam do'onaxaatauegue da la'aqtac, 'eeta': «'Am Balac, maye 'am llalec so Sipor, ña 'ana'axaỹaachigui da ỹa'aqtaxanaxac.

¹⁹ Ñim Lo'onatac 'Enauacna saishet da 'eeta'am ca shiỹaxaua, Ñimaye saishet da datenataxan, qataq sa naralaxat ca lhuennataxa. Cha'aye da huo'o ca ỹan la'aqtac, qalaq ipacchigui da ỹo'ot. Qataq da huo'o ca ỹachaxanapec qalaq ipacchigui da ỹan.

²⁰ Qataq Ñimaye aỹem ỹamaxalec da san ca no'on ỹa'aqtac, qaq Ñim Lo'onatac 'Enauacna da ỹan ca no'on la'aqtac, nache aỹem saishet da sataỹa'aguet.

²¹ Ñimaye saishet da ilalec ca qauem lataxac yi'iye lauo' le'ecpi so Jacob, huo'otaq ca saỹaỹamaxañi lataxac ye Israel le'ecpi. Cha'aye Ñim Nataxala' maye Natamnaxala' hueta'aguet yemayepi, qaq yemayepi da iỹaxana Ñimaye nache 'eetega lta'a.

²² Qaq Ñim Lo'onatac 'Enauacna maye nqateeguesop co'ollaxa ye Egipto, Ñimaye 'eeta'am da la'añaxac ca huaca no'onaxa le'ec.

²³ Nache qaica ca ishet da ỹo'otec ca qauem so Jacob, huo'otaq camachaqca ne'enaxanaxac na Israel le'ecpi. Qaq da qaitaxaỹa so Jacob qataq na Israel le'ecpi nache qoỹeeta': Ña qauloỹa da ỹo'otec Ñim Nataxala' namayepi.

²⁴ Qaq da nachaañi ne'ena nhuo' le'ecpi, qalaq 'eeta'am ca llon da saishet da nasamñi, ivitta'a da ỹachiguiñi ca ltoc, qataq da nỹomgui na ltago'q ca loxonec.»

²⁵ Nache so Balac 'enapega so Balaam, 'eeta': ¡Qaq cha'aye mashe saishet da 'auasaxalec ca qauem 'ara'aqtac ne'ena nhuo' le'ecpi, qaq nataqa'en saishet qome da 'auasaxalec namayepi ca no'on 'ara'aqtac!

²⁶ Nache so Balaam 'enapeco': ¿Peta'a saisheto' da 'am sheetega co'ollaxa, da nachecata ca aỹem ỹanem la'aqtac Ñim Lo'onatac 'Enauacna maye ishet da sa'axat?

So Balaam mashe ivi' tres da ỹasaxalec da nchoxonnataxanaxa so Israel le'ecpi

²⁷ Qaq huaña nache so Balac 'enapega somaye, 'eeta': Ñaq aỹem 'anqouaguec da ñeqo'onaxa ye lỹa 'alhua, saiuena'a da huaña yemaye da ỹaỹamaxareeta Ñim Lo'onatac 'Enauacna da 'auasaxalec ca qauem 'ara'aqtac na Israel le'ecpi.

²⁸ Nache so Balac ỹauec so Balaam, ỹaviguisheguema na ỹataqta pa'asheguem añi qasoxonaxa ye Peor, yem huaña da ỹoqta ỹaatec 'enauac ye toolec 'alhua.

²⁹ Nache so Balaam 'enapega so Balac, 'eeta': 'Ano'oxooyisheguem qome caua siete nca'atoxonaxalate, qataq 'auqataxanai'salo caua siete huaca llalqa, qataq caua siete qagueta lhuaraiqa.

³⁰ Nache so Balac ỹo'ot da la'aqtac so Balaam, nache ñi 'oonolec huaca llalec qataq 'oonolec qagueta lhuaraic, ỹachalec añi 'oonole soua nca'atoxonaxalate.