Números 22 - La'aqtaqa Ñim Lo'onatac 'Enauacna 2013

So Balac damaxasoxona so Balaam

¹ Qaq so Israel le'ecpi qaltaq jec co'ollaxa, nache naña ye nalochiguiñi 'alhua ye Moab, maye pa'aỹa'ague da nala' lliguisheguem ye Jordán qataq nalotta ye Jericó.

² Nache so Balac, som llalec so Sipor, co'ollaq ỹauaachigui dam ỹo'otec so Israel le'ecpi so amorreopi.

³ Nache nataqa'en so Moab le'ecpi ỹataqta lta'araic da lcolanaxa, qataq daquico souaxat da ila'a da ỹataqta qalota so Israel le'ecpi.

⁴ Nache so Moab le'ecpi, 'enapega co'ollaxa so nqueroxonecpi ye Madián, 'eeta': «Ne'ena shiỹaxauapi nlaxaañi qome 'enauac na huetalec na qana'alhua, 'eeta'am ca nauegaxanaxala' huaca da ỹataqta ỹauta na 'auaqpi na no'onaxa.» Qaq se'eso na'a'q so Balac som llalec so Sipor, nacheso co'ollaxa so nta'a ye Moab,

⁵ qaq somaye damaxasoxona so Balaam, som llalec so Beor, maye netaña co'ollaxa ye Petor, yem saqaỹapeque ye tala Éufrates ye 'alhua Amav. Nache so Balac ỹanem da la'aqtac so lamaxashecpi, da yaqto' 'enapega so Balaam, 'eeta': «Huo'o na nhuo' le'ecpi chegoqta'ague da Egipto, qaq namayepi ỹataqta imattalec ye nalotta na ña'alhua.

⁶ Ỹoqo'oye 'am ñachoxonnot da sa 'anaỹaloxon qome da 'auanac, yaqto' 'auasaxalec qome ca qauem 'ara'aqtac namayepi, cha'aye namayepi ỹataqta napacalec da qara'añaxac. Shapegueto' qom ishet da so'orauec da yaqto' ca'ai ne'ena 'alhua. Cha'aye aỹem saỹaten da huo'o ca 'auasaxalec ca no'on 'ara'aqtac, nache talec ca no'on, qaq ca 'auasaxalec ca qauem 'ara'aqtac, nache talec ca qauem.»

⁷ Nache so nqueroxonecpi maye lma' ye Moab qataq ye Madián jec, ỹachetac aso lsheetenaxanaqte da isheeten da qaỹo'ot ca qauem, nache co'ollaq ivita so Balaam, nache ỹanem so la'aqtac so Balac.

⁸ Nache so Balaam 'enapego' somayepi, 'eeta': Ña qoviỹa'a na ima' ne'ena pe, nache aỹem qami' sa'aqtaxanema qome ca la'aqtac Ñim Nataxala'. Nache se'eso nqueroxonecpi maye Moab le'ecpi, hua'a so lma' somaye se'eso pe.

⁹ Qalaxaye se'eso pe, Ñim Nataxala' nachaxana so Balaam, nache inattac, 'eeta': ¿Negue't ne'ena shiỹaxauapi maye hueta'a na 'arma'?

¹⁰ Nache so Balaam, 'enapeco': Qomye lamaxashecpi ca Balac, cam llalec so Sipor, maye nta'a ye Moab, da aỹem da'aqtaxanem,

¹¹ da huo'o ca nhuo' le'ecpi chegoqta'ague da Egipto, qaq camayepi mashe imattalec 'enauac ye na'alhua camaye. Nache cam Balac, aỹem 'eetega da sa ñaỹaloxon da ñeqo'ona da yaqto' sasaxalec ca qauem ỹa'aqtac camayepi, yaqto' da nalaate', nache ishet da ỹo'orauec, ca'ai naqa'en ye 'alhua.

¹² Nache Ñim Nataxala' 'enapega so Balaam, 'eeta': Saishet qome da 'auca'ategue namayepi, qataq saishet da 'auasaxalec ca qauem 'ara'aqtac yi'iye nhuo' le'ecpi, cha'aye yemayepi mashe sanem da no'on da llecỹaxac.

¹³ Nache so lỹa na'a'q, so Balaam no'ottasheguem, nache 'enapega so nataxala'pi maye lamaxashecpi so Balac, 'eeta': Qami', qavi'iguelaqỹa qome ca qarmaye. Cha'aye Ñim Nataxala' aỹem sa ỹashenem da qami' seca'ateguelo.

¹⁴ Nache so lataxala'pi so Moab le'ecpi, ỹe'eguelaxa ye netaña so Balac, nache da'aqtaxanem, 'eeta': Ñi Balaam saishet da qomi' nca'ateguelo.

¹⁵ Qalaxaye so Balac saishet da nañaxaañi, nache qaltaq ỹamaq so laỹepi nataxala'pi, qataq nquictec naqa'en ye lcata, qaq somayepi nquictec da ỹo'oxoraicpi, saq 'ena'am so hua'auñi lamaxashecpi.

¹⁶ Nache somayepi nqo'ona so Balaam, nache 'enapega, 'eeta': «'Am namaxa da la'aqtac ñi Balac, maye llalec so Sipor, 'eeta': ‹Saishet qome da huo'o ca 'ectega, ñaq aỹem 'anqouaguec da aỹem 'auanaỹa.

¹⁷ Cha'aye aỹem ỹataqta lta'araic ñaqa'en qome ca 'ansheetenaguec, qataq so'ot qome 'enauac ca aỹem 'anem 'ara'aqtac, ỹoqo'oye ñaq aỹem 'anqouaguec da 'auanac nagui, yaqto' 'auasaxalec ca qauem 'ara'aqtac ne'ena nhuo' le'ecpi.›»

¹⁸ Qalaxaye so Balaam, 'enapeco': Na'aictoxo' da aỹem ỹanem 'enauac ca oro, qataq ca plata, maye imattaigui ca lma' ca Balac, qalaxaye aỹem saishet da seca'ata camaye. Cha'aye aỹem sa sishet da so'ot ca lta'araic, huo'otaq ca qapio'olec, da ñapacalec ca la'aqtac Ñim Nataxala' maye Ñatamnaxala'.

¹⁹ Qalaxaye nataqa'en qami' qoviỹa'a qome ne'ena pe, ne'ena ima', cha'aye seuata'a ca 'eetec ca dalaxaic la'aqtac Ñim Nataxala'.

²⁰ Nache se'eso pe, Ñim Nataxala' nachaxana so Balaam, nache 'enapega, 'eeta': Da 'am ñe'eguena'a ne'ena shiỹaxauapi, nache no'on qome da qoñisheguem da 'auca'ategue. Qalaxaye ca 'am samaxalec, nachecata qome 'auo'ot.

So lamaxashec piguem le'ec Ñim Nataxala'

²¹ Qaq so Balaam no'ottasheguem so lỹa na'a'q, nache ỹo'oolec aso lalo 'ashena, nache ca'ategue so lataxala'pi so Moab le'ecpi.

²² Nache so Balaam ca'ategue somayepi, netalec aso lalo 'ashena, qataq nnaictagueto soua dos lamaxa'she. Qalaxaye Ñim Nataxala' ỹataqta dalemata souaxat da jec somaye, nache so lamaxashec piguem le'ec Ñim Nataxala', huaqata'ague so llec somaye da yaqto' nqanaxat.

²³ Qaq aso 'ashena co'ollaq ila'a so lamaxashec piguem le'ec Ñim Nataxala', da netangui so nqa'aic, nasoqta'a so lainec, nache huaỹoxouec da yaqto' tauga so no'onaxa. Qalaxaye so Balaam ỹataqta iuaxaatalec aso lalo da yaqto' ỹe'eguelaxa naqa'en so nqa'aic.

²⁴ Nache so lamaxashec piguem le'ec Ñim Nataxala', nachatchiguingui na laiñi so sa lca'ague nqa'aic, maye quichiguingui na laiñi soua dos lpaqtaqa'ate so lma' aso nañiguishe uva.

²⁵ Qaq aso 'ashena co'ollaq ila'a so lamaxashec piguem le'ec Ñim Nataxala', nache hua'aqot se'eso npaqtaxanaxat, nache ipataxaguet somaye na lapia' so Balaam. Nache so Balaam qaltaq iuaxaatalec asomaye.

²⁶ Qalaxaye so lamaxashec piguem le'ec Ñim Nataxala', hueqata'ague da taỹa'ague somaye, nache nachatchiguingui na laiñi so sa lca'ague nqa'aic, nache somaye saishet da dasheuec, cha'aye ỹataqta sa lca'ague so nqa'aic.

²⁷ Nache aso 'ashena co'ollaq ila'a so lamaxashec piguem le'ec Ñim Nataxala', nache nasoola't qaq so Balaam, nache netalec asomaye. Huaña, nache so Balaam ỹataqta dalemata, nache irota'a so 'epaq da iuaxaatac aso 'ashena.

²⁸ Qaq huaña, nache Ñim Nataxala' detaqa naqa'en aso 'ashena, nache 'enapega so Balaam, 'eeta': ¿Negue'to' ca 'am so'otec ye ỹataqta mashe tres, da aỹem 'avi'eguelaxalec da aỹem 'auaxaatac?

²⁹ Nache so Balaam, 'enapeco': ¡Qomye souaxat da ỹataqta aỹem 'aue'enai', ten ctaxa da ñasoqta'a ca ỹainec, nache 'am salauat nagui!

³⁰ Qalaxaye aso 'ashena 'enapega so Balaam, 'eeta': ¿Saisheto' peta'a da nachaỹem 'arelo 'ashena, maye aỹem qonetalec naxa 'enauaque naua na'axa'te choche ivitta'a nagui? ¿Qaq huo'o peta'a ca huaña da 'am so'otec ca 'eeta'am de'era? Nache so Balaam 'eeta': ¡'A'i, saishet!

³¹ Huaña, nache Ñim Nataxala', ỹo'ot da so Balaam ila'a naqa'en so lamaxashec piguem le'ec, nachattañi huetangui so nqa'aic, nasoqta'a so lainec. Nache so Balaam ỹa'alyiñi naua l-llecte, nache iviraxata'aguet naqa'en na latap na 'alhua.

³² Qalaxaye so lamaxashec piguem le'ec Ñim Nataxala', 'enapega somaye, 'eeta': ¿Ta'ainco' ye ỹataqta tres da 'avi'eguelaxalec da 'auaxaatac añi 'arelo 'ashena? Ye aỹem nachaỹem sootangui na 'ec da 'am ñeqanaxat, cha'aye sa saỹamaxaren da 'icỹaxac.

³³ Qaq ana 'ashena ye aỹem ilota'a, ỹoqo'oye tres da aỹem dashelec. Qaq taxa da saishet da aỹem dashelec anamaye, nache sogote taxa da 'am salauat, qaq anamaye nachanata taxa da nca'altauec ñaqa'en.

³⁴ Nache so Balaam 'enapega so lamaxashec piguem le'ec Ñim Nataxala', 'eeta': Aỹem huo'o da ỹasouaxashet, souaxat da sa saỹaten da qonetangui na ỹec. Qalaxaye da sa 'auaỹamaxaren de'era ỹecỹaxac, nache aỹem she'eguelaq.

³⁵ Qalaxaye so lamaxashec piguem le'ec Ñim Nataxala' 'enapego' so Balaam, 'eeta': Nalotañi da 'auca'ategue ne'ena shiỹaxauapi, qalaxaye ca 'am sanem ỹa'aqtac, nacheca qome ca ishet da 'aua'axat. Nache so Balaam nnaicapegue' som lamaxashecpi so Balac.

So Balac huaqata'aguet so Balaam

³⁶ Qaq so Balac co'ollaq la'axaỹaxac da anacta so Balaam, nache huaqata'a so huaqta'a't nỹecpi ye Moab, maye naña ye sa qaỹapque so tala Arnón, maye loga't yi'iye 'alhua.

³⁷ Nache so Balac 'enapega so Balaam, 'eeta': Aỹem ỹataqta she'eguelaqtalec da 'am seỹaxaatega, qalaq ¿Ta'ainco' da sa 'auanac? ¿'Aupi'itaxaatega peta'a da saishet da so'ot ca lta'araic 'ansheetenaguec?

³⁸ Nache so Balaam 'enapega so Balac, 'eeta': Aja', qalaxaye mashe soota'a ne'ena, aỹem 'am ñanaỹa. Qalaxaye aỹem, saishet da sa'axat ca saishet da aỹem ỹanem Ñim Lo'onatac 'Enauacna.

³⁹ Ime, nache so Balaam lỹa so Balac, da nqo'oora ye Quiriat Jusot,

⁴⁰ qaq huaña yemaye, nache so Balac damaxasoxoolec da qaỹalauat so huacapi, qataq so qaguetapi, nache na lapat qaira'a so Balaam qataq so nataxala'pi maye nnaictague' somaye.

⁴¹ Qaq so lỹa na'a'q, nache so Balac ỹauec so Balaam da tasheguema ye Bamot Baal. Qaq huaña yemaye nache so Balaam ila'a so netaña so lpe'lpi so Israel le'ecpi.