Números 12 - La'aqtaqa Ñim Lo'onatac 'Enauacna 2013

Aso María qataq so Aarón quetapegueleguete so Moisés

¹ Aso María qataq so Aarón quetapeguelguete co'ollaxa so lqaỹa Moisés, souaxat somaye da huaroneguet co'ollaxa aso lma' ye Cus, maye saishet da lauo' lashe.

² Soomaye nataqa'en 'ena'apo': «Ñim Nataxala' saishet da nachesota so Moisés, da detaqtague', cha'aye nataqa'en qomi'». Qaq Ñim Nataxala' hua'aqtegalo co'ollaxa soomaye.

³ Qalaxaye so Moisés ỹataqta huesota da lataxac, qaica ca 'ena'am na shiỹaxauapi, maye netalec ana 'alhua.

⁴ Ỹoqo'oye Ñim Nataxala' 'enapega so Moisés, Aarón qataq aso María, 'eeta': «Qami' tres qanqo'oñeeua'a ñi npe'l maye naỹonqa'». Nache 'enauaque soomaye co'ollaxa da je'c.

⁵ Nache Ñim Nataxala' anac co'ollaxa, nactaigui so sa nsatchiguiñi lo'oc, nache hua'a so ñegueuo so npe'l, ime, nache iỹaxana co'ollaxa so Aarón qataq aso María, nache soomaye taua'alo co'ollaxa so lanataqa' Ñim Nataxala',

⁶ nache Ñim Nataxala', 'eeta': «Ña qana'axaỹaxañiỹa da ỹa'aqtac: Da huo'o naxa na ỹa'aqtaxanaxanec da qoñiita, nache Aỹem setaxaỹapegue', huaigui ñaqa'en da lauanaqchec, qataq lchoxonaxac,

⁷ qalaxaye da ỹamaxashec Moisés, qalaq saishet da nache 'eetec de'era ñaqa'en. Cha'aye damaye nacherata ipe'et, qaica ca 'ena'am da ỹalectaigui na ỹalamaxatpi nhuo' le'ecpi,

⁸ ỹoqo'oye da setaxaỹapegue', qalaq ỹataqta satata'aguet, nache qaica ca soxocheesop, nache damaye ishet da aỹem iloto'ot ¿Qalaq ta'ainco' da saishet da qayi'iỹai da qoquiiteguelec da ỹamaxashec Moisés?»

⁹ Nache Ñim Nataxala' ỹataqta dalemataỹalo soomaye, ime, nache jec.

¹⁰ Nache so lo'oc co'ollaq ca'ai so npe'l, nache aso María nchega na lo'oc qataq ỹataqta ỹapagaq. Qaq so Aarón co'ollaq ỹamata'a aso María, nache ila'a da mashe huec na nchega naqa'en na lo'oc,

¹¹ nache 'enapega so Moisés, 'eeta': «'Am ỹataxala', 'am ñachoxonnot nagui, da saishet qome da 'auo'ot da qanhuaxanaguec, souaxat de'era qarasouaxashet maye ỹataqta 'eesa da so'otaq.

¹² Saishet qome da 'aua'aqta'a aramaye, da 'eeta'am ca nogotolec maye nleuauec da chegaqaigui na lauel aca late'e da ñiguiñi, da nlatañi na lo'oc.»

¹³ Nache so Moisés nachoxonnot Ñim Nataxala', 'eeta': «'Am Ỹataxala', 'Am ñachoxonnot da 'anataren aramaye nagui.»

¹⁴ Nache Ñim Nataxala', 'eeta': «So 'arta'a taxa da nqaigoxoigui na lashec aramaye, nache aramaye ivi' caua siete na'axa'te da nqañoxooñi souaxat da lcoxo. Qaq ỹoqo'oye aramaye ca'ai qome qanqa'en na qanayeuta'a nanataqa', qaq da inoxoorec caua siete na'axa'te, nache ishet da qaltaq ñe'eguelaxauo.»

¹⁵ Nache aso María ca'ai qanqa'en so nanataqa' soua siete na'axa'te, qaq se'eso nhuo' le'ecpi nache hua'a yemaye ivitta'a da qaltaq ñe'eguelaxauo aso María.

¹⁶ Qaq co'ollaq ime de'era, nache se'eso nhuo' le'ecpi jec, chegoqchiguiña ye Haserot, nache naña ye toolec 'alhua ye Parán.