Números 1 - La'aqtaqa Ñim Lo'onatac 'Enauacna 2013

Ana le'enaxat lmalate na Israel le'ecpi

¹ Qaq so la'auaxanec na'a'q, soua dos ca'agoxoiqa, maye huetoiguilo soua dos vi'iye, da qanayeca'ai ye Egipto. Nache Ñim Nataxala' 'enapega so Moisés, huaña ye toolec 'alhua añi qasoxonaxa Sinaí, huaña so npe'l maye huaña naxa da qanauane' Ñimaye, nache 'eeta':

² «Qauo'oche qome ca naneraguec na Israel le'ecpi, nache qa'aiyiiuo na le'enaxatpi 'enauac na shiỹaxauapi maye huo'o na maiche lalamaxat llalaqpi, qataq na maiche nalamaxat nhuo' le'ecpi. Nache qa'aiyiñi na le'enaxat ñi 'oonolec na ỹalleppi,

³ maye ivi', qataq na napacalec naua veinte vi'iye, maye mashe ishet da taỹa ca alaataxac. Nache 'am itauan qome so Aarón da qa'aiyiñi ñi 'oonolec namayepi, da ime nache qauallecñiỹoigui na alleppi.

⁴ Qataq qami' ỹalectaiguilo qanqa'eñi ñi 'oonolec na lataxala'pi na maiche nalamaxat nhuo' le'ecpi.

⁵ Qaq 'ena na le'enaxatpi na lataxala'pi na maiche nalamaxat nhuo' le'ecpi, maye qami' itaua'n qome: Elisur, som llalec so Sedeur, maye chegoxoguet so Rubén.

⁶ Selumiel, som llalec so Surisaday, maye chegoxoguet so Simeón.

⁷ Nasón, som llalec so Aminadab, maye chegoxoguet so Judá.

⁸ Natanael, som llalec so Suar, maye chegoxoguet so Isacar.

⁹ Eliab, som llalec so Helón, maye chegoxoguet so Zabulón.

¹⁰ Elisama, som llalec so Amiud, maye chegoxoguet so Efraín, som llalec so José. Qataq so Gamaliel, som llalec so Pedasur, maye chegoxoguet so Manasés.

¹¹ Abidán, som llalec so Guidoní, maye chegoxoguet so Benjamín.

¹² Ajiezer, som llalec so Amisaday, maye chegoxoguet so Dan.

¹³ Pagiel, som llalec so Ocrán, maye chegoxoguet so Aser.

¹⁴ Eliasaf, som llalec so Reuel, maye chegoxoguet so Gad.

¹⁵ Ajirá som llalec so Enán, maye chegoxoguet so Neftalí.»

¹⁶ Qaq 'ena na le'enaxatpi so lataxala'pi som ỹalecta'a't nhuo' le'ecpi, maye ỹaneuo co'ollaxa so Israel le'ecpi, qataq da lataxala' so alleppi.

¹⁷ Nache so Moisés qataq so Aarón ỹaconeguet co'ollaxa se'eso ỹalleppi maye qoỹaneuo,

¹⁸ nache lapona't 'enauac so Israel le'ecpi, huetoigui so la'auaxanec na'a'q soua dos ca'agoxoiqa se'eso vi'i. Nache qoỹereuo 'enauac so shiỹaxauapi maye huo'o na maiche lalamaxat llalaqpi, qataq na maiche nalamaxat nhuo' le'ecpi. Qaq 'era da 'eetec co'ollaxa qoỹereuo na le'enaxat 'enauac so ỹalleppi maye ivi', qataq so napacalec naua veinte vi'iye da nachaalataxac.

¹⁹ Nache qaipacchigui da lamaxasoxonaxac Ñim Nataxala', maye ỹamaxalec co'ollaxa so Moisés, da ỹo'ot de'era naneraguec se'eso shiỹaxauapi, co'ollaq huaña ye toolec 'alhua ye Sinaí.

²⁰ Nache so llalaqpi, qataq so chegoxoguetpi so Rubén, maye la'auaxanec llalec so Israel, qoỹiyiñi 'enauac na le'enaxatpi so ỹalleppi, maye maiche nalamaxat nhuo' le'ecpi, maye ivi' qataq napacalec naua veinte vi'iye da nachaalaxataxac, maye mashe ishet da taỹa ca alaataxac.

²¹ Nache so nalamaxat nhuo' le'ecpi maye chegoxoguet so Rubén, ivi' cuarenta y seis mil quinientos, ndotec ỹalleppi.

²² Qaq so llalaqpi qataq so chegoxoguetpi so Simeón, qoỹiyiñi 'enauac na le'enaxatpi so ỹalleppi maye maiche nalamaxat nhuo' le'ecpi, maye ivi' qataq napacalec naua veinte vi'iye da nachaalaxataxac maye mashe ishet da taỹa ca alaataxac.

²³ Nache se'eso maiche nalamaxat nhuo' le'ecpi maye chegoxoguetpi so Simeón, ivi' cincuenta y nueve mil trescientos.

²⁴ Qaq so llalaqpi qataq so chegoxoguetpi so Gad, qoỹiyiñi 'enauac na le'enaxatpi so ỹalleppi, maye maiche nalamaxat nhuo' le'ecpi, maye ivi' qataq napacalec naua veinte vi'iye da nachaalataxac, maye mashe ishet da taỹa ca alaataxac.

²⁵ Nache se'eso maiche nalamaxat nhuo' le'ecpi maye chegoxoguetpi so Gad, ivi' cuarenta y cinco mil saiscientos cincuenta.

²⁶ Qaq so llalaqpi qataq so chegoxoguetpi so Judá, qoỹiyiñi 'enauac na le'enaxatpi so ỹalleppi, maye maiche nalamaxat nhuo' le'ecpi, maye ivi' qataq napacalec naua veinte vi'iye da nachaalataxac, maye mashe ishet da taỹa ca alaataxac.

²⁷ Nache se'eso maiche nalamaxat nhuo' le'ecpi maye chegoxoguetpi so Judá, ivi' setenta y cuatro mil seiscientos.

²⁸ Qaq so llalaqpi qataq so chegoxoguetpi so Isacar, qoỹiyiñi 'enauac na le'enaxatpi so ỹalleppi maye maiche nalamaxat nhuo' le'ecpi, maye ivi' qataq napacalec naua veinte vi'iye da nachaalataxac, maye mashe ishet da taỹa ca alaataxac.

²⁹ Nache se'eso maiche nalamaxat nhuo' le'ecpi maye chegoxoguetpi so Isacar, ivi' cincuenta y cuatro mil cuatrocientos.

³⁰ Qaq so llalaqpi qataq so chegoxoguetpi so Zabulón, qoỹiyiñi 'enauac na le'enaxatpi so ỹalleppi maye maiche nalamaxat nhuo' le'ecpi, maye ivi' qataq napacalec naua veinte vi'iye da nachaalataxac, maye mashe ishet da taỹa ca alaataxac.

³¹ Nache se'eso maiche nalamaxat nhuo' le'ecpi maye chegoxoguetpi so Zabulón, ivi' cincuenta y siete mil cuatrocientos.

³² Qaq som llalaqpi qataq so chegoxoguetpi so Efraín, som llalec so José, qoỹiyiñi 'enauac na le'enaxatpi so ỹalleppi maye maiche nalamaxat nhuo' le'ecpi, maye ivi' qataq napacalec naua veinte vi'iye da nachaalataxac, maye mashe ishet da taỹa ca alaataxac.

³³ Nache se'eso maiche nalamaxat nhuo' le'ecpi maye chegoxoguetpi so Efraín, ivi' cuarenta mil quinientos ỹalleppi.

³⁴ Qaq so llalaqpi qataq so chegoxoguetpi so Manasés, qoỹiyiñi 'enauac na le'enaxatpi so ỹalleppi maye maiche nalamaxat nhuo' le'ecpi, maye ivi' qataq napacalec naua veinte vi'iye da nachaalataxac, maye mashe ishet da taỹa ca alaataxac.

³⁵ Nache se'eso nalamaxat nhuo' le'ecpi maye chegoxoguetpi so Manasés, ivi' treinta y dos mil doscientos ỹalleppi.

³⁶ Qaq so llalaqpi qataq so chegoxoguetpi so Benjamín, qoỹiyiñi 'enauac na le'enaxatpi so ỹalleppi maye maiche nalamaxat nhuo' le'ecpi, maye ivi' qataq napacalec naua veinte vi'iye da nachaalataxac, maye mashe ishet da taỹa ca alaataxac.

³⁷ Nache se'eso nalamaxat nhuo' le'ecpi maye chegoxoguetpi so Benjamín, ivi' treinta y cinco mil cuatrocientos ỹalleppi.

³⁸ Qaq so llalaqpi qataq so chegoxoguetpi so Dan, qoỹiyiñi 'enauac na le'enaxatpi so ỹalleppi maye maiche nalamaxat nhuo' le'ecpi, maye ivi' qataq napacalec naua veinte vi'iye da nachaalataxac, maye mashe ishet da taỹa ca alaataxac.

³⁹ Nache se'eso nalamaxat nhuo' le'ecpi maye chegoxoguetpi so Dan, ivi' sesenta y dos mil setecientos ỹalleppi.

⁴⁰ Qaq so llalaqpi qataq so chegoxoguetpi so Aser, qoỹiyiñi 'enauac na le'enaxatpi so ỹalleppi maye maiche nalamaxat nhuo' le'ecpi, maye ivi' qataq napacalec naua veinte vi'iye da nachaalataxac, maye mashe ishet da taỹa ca alaataxac

⁴¹ Nache se'eso nalamaxat nhuo' le'ecpi maye chegoxoguetpi so Aser, ivi' cuarenta y un mil quinientos ỹalleppi.

⁴² Qaq so llalaqpi qataq so chegoxoguetpi so Neftalí, qoỹiyiñi 'enauac na le'enaxatpi so ỹalleppi maye maiche nalamaxat nhuo' le'ecpi, maye ivi' qataq napacalec naua veinte vi'iye da nachaalataxac, maye mashe ishet da taỹa ca alaataxac

⁴³ Nache se'eso nalamaxat nhuo' le'ecpi maye chegoxoguetpi so Neftalí, ivi' cincuenta y tres mil cuatrocientos ỹalleppi.

⁴⁴ Qaq 'eso 'enauac som lereguishecpi soua Moisés, Aarón qataq so lataxala'pi so Israel le'ecpi, co'ollaq ỹereuo na llalaqpi so maiche nalamaxat nhuo' le'ecpi.

⁴⁵ Nache 'enauac so Israel le'ecpi, maye ivi' qataq napacalec naua veinte vi'iye da nachaalataxac, maye mashe ishet da taỹa ca alaataxac,

⁴⁶ somayepi da ima'a't, nache ivi' saiscientos tres mil quinientos cincuenta ye lcata.

Na leviitapi

⁴⁷ Qaq so leviitapi qalaxaye saishet da qaỹalecnoigui aso le'enaxat lmalate so laỹe Israel le'ecpi,

⁴⁸ cha'aye Ñim Nataxala' 'enapega co'ollaxa so Moisés, 'eeta':

⁴⁹ «Qom 'auo'ot ca naneraguec na Israel le'ecpi, nache saishet qome da 'ereuo na maiche nalamaxat nhuo' le'ecpi maye chegoxoguet so Leví.

⁵⁰ Nacherata da 'anem qome da ilo'ogue ca npe'l, maye huetaigui aca laỹe da aỹamaxataxac, qataq 'enauac na logoxoshetpi, qataq ca lalamaxatpi camaye. Qataq namayepi nachena na ỹachetac qome ca logoxoshetpi da qalachaxan que'eca npe'l, qataq huapegue' que'eca nanataqa'. Qataq nache netañalo naua loiguiye camaye da nauaatalec.

⁵¹ Qataq na leviitapi da ivita da qanqochenaxat ca npe'l, nache namayepi nachena na nsoguiñi, qaq da vi'iiguet qanqa'en, nache namayepi ỹa'ara't da qaltaq nauaxaỹaxaasheguem que'eca npe'l. Qataq da huo'o camachaqca chegaqauec shiỹaxaua da saishet da leviita, da taua'a que'eca npe'l, nache camaye qaỹalauat.

⁵² Nache ñi 'oonolec na laỹepi Israel le'ecpi, ỹa'ayiñi qome ca maiche lpe'l, qataq ñi 'oonolec ỹataqtac aca la'anaqte ca ỹalectaigui alleppi.

⁵³ Qaq na leviitapi, nache neta'asop qome naua loiguiye que'eca npe'l, maye netaigui aca arca maye laỹe' da aỹamaxataxac. Nache nauaatalec que'eca npe'l, yaqto' Ñim Nataxala' saishet da dalemataỹa na Israel le'ecpi.»

⁵⁴ Nache so Israel le'ecpi ỹo'ot 'enauac da lamaxasoxonaxac Ñim Nataxala', maye ỹamaxalec co'ollaxa so Moisés.