Miqueas 6 - La'aqtaqa Ñim Lo'onatac 'Enauacna 2013

Ñim Lo'onatac 'Enauacna dataỹa'aguet na Israel le'ecpi

¹ Ña qana'axaỹaxañiỹa nagui da la'aqtac Ñim Nataxala', 'eeta': «'Anachaañi, nache 'aua'aqtaxanem ana qasoxonaxapi da 'anhueela't, qataq hua'aqchigui 'anqa'en ca 'ara'aqtac ana lcomaraxalatepi.»

² Qami' qasoxonaxapi qataq qami' maye qami' no'oxootaleguete ana 'alhua, ñaq qana'axaỹaxañiỹa da ncotaxac Ñim Nataxala', cha'aye Ñimaye taỹa'a da nmit na lalamaxat nhuo' le'ecpi, qataq ncotaỹapegue' qome na Israel le'ecpi.

³ Qaq 'era da la'aqtac, Ñim Nataxala' 'eeta': Qami' ỹalamaxat nhuo' le'ecpi, ¿negue't cam qami' so'oteque maye qami' inogoqche't?

⁴ Aỹem, qami' ñeqateeguesopa co'ollaxa ye Egipto, qataq qami' sesoueeguesopa da qanlataguiiqui, aỹem samaq co'ollaxa so Moisés, Aarón qataq aso María, da yaqto' qami' ỹaueca'agueta.

⁵ Qami' ỹalamaxat nhuo' le'ecpi qantooñeeta'ac nagui, nam huotaique ỹo'ot co'ollaxa so Balac maye nta'a ye Moab, qataq dam la'aqtac so Balaam, som llalec so Beor co'ollaq ỹasateguet somaye. Qataq qantooñeeta'ac co'ollaq qa'aiteuga ye Sitín nache qaviyeeta'a ye Gilgal, yaqto' qauauattoñeeta da la'añaxac Ñim Nataxala'.

⁶ ¿Negue'tom ca sachetauo qom ñeqo'oneua'a Ñim Nataxala', qataq da sho'oxoren Ñim Lo'onatac 'Enauacna maye neto'ot na piguem? ¿Peta'a sachetauo ca huaca llalec maye mashe ivi' 'oonolec vi'i, da yaqto' sanot da ỹachetaqtaxanaxat qaỹavigaxatta?

⁷ ¿Peta'a machiguiñi naqa'en Ñim Nataxala' da sanot ca mil qagueta lhuaraicpi, huo'otaq da sanot ca diez mil la'auaxac na aceite? ¿Huo'otaq da sanot ca ỹalec ỹe souaxat da sa salaq qataq souaxat na ỹasouaxashetpi?

⁸ Ñim Nataxala' mashe 'am da'aqtaxaatapeguem dam no'on. Maye iuatta'a Ñimaye da 'auo'ot, 'eeta': 'Auo'ot da nalochiguiñi lataxac, qataq 'auo'ot da nchoxonnataxanaxa, qataq 'am huesota da 'auatato'ot Ñim 'Anatamnaxala'.

Da nhuaxanaguec nam ỹe'enai' na laỹepi

⁹ Ñim Nataxala' iỹaxaatega nam huaqta'a't nỹecpi, qaq ca huo'o naq 'enec naqa'en da le'enaxat Ñimaye, qaq nacheca ca ỹaanaxanaxaic. Ña qana'axaỹaxañi qami' nhuo' le'ecpi, qataq qami' shiỹaxauapi maye qaỹa'añiitac nam nqataxacpi.

¹⁰ Naua lma'ate na yeloxoicpi qalaq nlaqchiguilo da nsallaxa maye chegaqaigui da lcachaxac, qataq anam naloqnaxanaqte maye saq 'en maye ỹataqta seqaiga.

¹¹ ¿Peta'a qaico' ca lasouaxashet ñaqa'en cam do'onataxaatega aca saq 'en naloqnaxanaxaqui, qataq aca naloqnaxanaqte maye qaỹatenataxaatapigui?

¹² Qaq na sallaxanecpi maye lma' ne'ena huaqta'a't nỹecpi ỹataqta qauemaicpi, qataq 'enauac namayepi ỹataqta tenataxanaxaicpi.

¹³ Qaq ỹoqo'oye aỹem so'ot qome ca 'anhuaxanaguec, qataq 'am selaxachigui souaxat na 'arasouaxashetpi.

¹⁴ Qataq 'auque'etac qome qalaxaye saishet da 'aucoma', nacherata da queta da 'anque'etaxaatapigui na 'arqouaxa, nam 'arapoñiguishecpi qome qalaq pasa'a da imeuo, qaq da huo'o ca no'onañi nache serolec ca alaataxac da qailaxachigui.

¹⁵ Qataq qom 'anaxan qalaq saishet da 'avira'a da 'anqat na ala ca 'añiguishec, qataq da 'aulaxachigui ana aceituna qalaq saishet da 'avira'a da 'auo'ogoxona na aceite maye chegaqaigui anamaye, qataq choche 'aulaxattapigui qome ana uva, qalaxaye saishet da 'avira'a da 'anỹomgui na lataxa maye chegaqaigui anamaye.

¹⁶ Cha'aye qoguegue nam lamaxasoxonaxacpi so Omri, qataq nam ỹo'otpi co'ollaxa som llalaqpi so Ahab, nache qoquetelec da lataxac somayepi, qaq ỹoqo'oye 'am saneguet qome da 'am qailaxachigui qataq qane'eetapigui nam shiỹaxauapi maye 'am netaigui, huaña nache 'am huetalec qome da lta'araic la'agaxa na ỹalamaxat nhuo' le'ecpi.