Miqueas 3 - La'aqtaqa Ñim Lo'onatac 'Enauacna 2013

Da nhuaxanaguec nam nataxala'pi maye qauem da lataxac

¹ Qaq ime, nache sheeta': Ña qana'axaỹaxañi nagui qami' lataxala'pi qataq lta'alpi na Israel le'ecpi, cha'aye nache qami' maye iuen da qauaỹachiñi dam no'on lataxac.

² Qalaxaye qami' qanquiỹai da no'on, nache nda'a't da qanqopichiỹa da qauem, qataq qancolaxacheetauec na lapat na ỹalamaxat nhuo' le'ecpi, nache qui'itta'aguelo qanqa'eñi naua lpi'ineqa.

³ Qaq nache nca'altauec qanqa'eñi da qollequiitac na ỹalamaxat nhuo' le'ecpi, qataq da ime da qancolaxacheetauec na lapat nache qaunoxoñi' naua lpi'ineqa, qataq qanpelliquiichiguiñe 'eeta'am ca lapat maye taỹa'a da qaỹasaxangui aca taxaqui.

⁴ Qaq huo'o qome ca na'a'q da qauỹaxañiitega Ñim Nataxala', qalaxaye ñimaye saishet qome da qami' ỹasategueta, nacherata da que'eca na'a'q ñimaye qami' nqañoxotaisopa, souaxat nam qauemsat maye qauo'oche.

Da 'eetec qanqa'en nam saq 'en na'aqtaxanaxanecpi

⁵ Da la'aqtac Ñim Nataxala', 'eeta': Ne'ena ỹalamaxat nhuo' le'ecpi isomapec da llecỹaxac, souaxat da latenataxanaxac nam saq 'en na'aqtaxanaxanecpi, cha'aye nda'a't nam iquia'axan namayepi da da'aqtaxanem da nlagaxayec, qaq nam saishet da iquia'axan namayepi nache nda'a't da npa'aguene'.

⁶ Qaq ỹoqo'oye nache tachiguiña da saishet da huo'o ca qarauanaqchiqui ye pe, qataq da qaua'axachiỹa'a cam ñaq natauo da huaigui ca napalaxa. Qaq añi nala' qalaq 'eeta'am qome da inoxooñi nache sa icoỹarelec namayepi, nache ye na'a'q qalaq 'eeta'am da huetaigui ca napalaxa namayepi.

⁷ Huaña nache ne'ena na'aqtaxanaxanecpi qataq nam huo'oi naua l-loxoco, ỹataqta huo'o qome da la'aloxo nache 'enauac namayepi da ỹe'emaqtom qome, souaxat da Ñim Lo'onatac 'Enauacna saishet da huo'o ca ỹanem da ỹa'axat namayepi.

⁸ Qaq aỹem Miqueas, ỹataqta aỹem nlaqchigui so Saqcha'a La'añaxac Ñim Nataxala', Ñimaye aỹem ỹanem da ỹa'añaxac, qataq da nalochiguiñi lataxac, nache saishet da leetapigui ye iuel da seviraxato'ot na Israel le'ecpi, souaxat na lasouaxashetpi qataq da sa ỹalaq.

Ye Jerusalén taỹa'a da nlaguiñi

⁹ Qaq nagui, ñaq qana'axaỹaxañiỹa de'era na'aqtac, qami' lta'alpi qataq lataxala'pi na Israel le'ecpi, qami' maye qauqaiquiỹa da nalochiguiñi lataxac, qataq qauashaxañeeuec da no'on lataxac,

¹⁰ qataq qano'oxoñiisheguem ye huaqta'a't nỹecpi ye Jerusalén maye nalec añi qasoxonaxa ye Sión, nache chegoqchigui qanaqa'eñi da nalaataxanaxac qataq da sa naloguiñi lataxac.

¹¹ Qaq na nmit na nasouaxashetpi qalaq nmitta'a da qaisheeten da huo'o na ỹo'ot, qataq na ntaxaỹaxanaxanecpi qalaq nda'a't da qaisheeten nache dapaxaguenataxan, qaq na na'aqtaxanaxanecpi qalaq imen na la'aqtaxanaxacpi, qataq namayepi ivira'a da ỹectega Ñim Nataxala', 'eeta': «Ñim Nataxala' qomi' hueta'agueta ỹoqo'oye saishet da qomi' taleguete qome ca qauem».

¹² Qaq souaxat qami' nache ye Jerusalén, yem huaqta'a't nỹecpi maye nalec añi qasoxonaxa Sión, 'eeta'am ca nañiguishec lma' da qana'ayisheguem, nache ye Jerusalén choche lapoosheguem qome, qaq añi qasoxonaxa maye naña añi atamnaxaqui qalaq ñaxaalec qome ana ỹaxat.