Miqueas 2 - La'aqtaqa Ñim Lo'onatac 'Enauacna 2013

Da la'añaxac na qauemaicpi

¹ Choxoraicpiolec qome nam shiỹaxauapi maye nda'a't da tatapigui lauel na qauempi, ivira'a da huetalec ca lmala' qalaq lapaqtapiguiñi da ỹo'ot na qauem, qaq da choche yo'oxoñi nache ỹacoolec da ỹo'ot nam tatapigui lauel, cha'aye namayepi hueto'ot dam na'añaxac.

² Qaq da huo'o ye nqopita 'alhua nache ỹacona da ỹauo'o lalamaxat, qataq da nqopita ca nỹec nache ỹacona da ỹauo'o lalamaxat, qataq sa iyacnapec cam ỹale qataq cam llalaqpi maye lalamaxat que'eca nỹec.

³ Qaq ỹoqo'oye da la'aqtac Ñim Nataxala', 'eeta': Aỹem nataqa'en mashe huo'o da llapaxañi da sataỹa'agueta qami', qami' ñamaxalo qome ca qauem maye saishet da qami' ỹetrauec, huaña nache saishet da qana'amaqchiñiitac cha'aye ỹataqta qauem qome que'eca na'a'q.

⁴ Nache que'eca na'a'q choche qami' qaỹe'eeta'ape qome, nache qaỹo'on ca choxoraqta no'onec da qami' qaỹo'onaxaaleguete, maye 'eeta': Ỹataqta imauec da qomi' qanlaxatchiyiñi, na qarhuo' le'ecpi maye lalamaxat co'ollaxa Ñim Nataxala', qalaq dalaxaic nam lalamaxat namayepi, qaq na qana'alhuapi qalaq nalogui nam qomi' loxonecpi.

⁵ Qaq ỹoqo'oye qaica qome ca qami' ỹanema na 'alhua, nam nhuo' le'ecpi maye lalamaxat Ñim Nataxala'.

Nam saq 'en na'aqtaxanaxanecpi

⁶ Nam saq 'en na'aqtaxanaxanecpi namayepi, 'eeta': Saishet qome da qaua'aqtaxañeetac, cha'aye saishet qome da qomi' taleguete ca qauem.

⁷ Qaq nam chegoxoguetpi so Jacob, 'eeta': ¿Peta'a mashe imeuo da nhualaxaunaxac Ñim Nataxala'? ¿Qaq peta'a nachera de'era da lataxac da lo'onataxanaxac Ñimaye? ¿Peta'a saisheto' da ỹo'otec cam ỹaỹamaqchiguiñi naua la'aqtaqa Ñimaye cam no'on da lataxac?

⁸ Qaq qami' nhuo' le'ecpi, maye qami' ỹalamaxatpi co'ollaxa, qaq nagui, qalaq aỹem qanpa'agueñiitague'. Cha'aye nam qaica ca huotaique da chegaqa'a ca alaataxac qalaq qauotaxañic nam no'on logoxot 'eeta'am ca qanalaataxauai.

⁹ Qaq na na'alpi na ỹalamaxat nhuo' le'ecpi qalaq qauo'oyiỹauec, qauachegoxocheeteleguete naua lauotaqa'ate lma'ate, qaq na llalaqpi qalaq qauacoñiỹa da la'amaqchec maye sanem co'ollaxa.

¹⁰ Qoñiisheguem qome, nache qoqui, cha'aye ne'ena saishet da mataqa', qaq souaxat nam qauem maye ỹataqta imattalec namaye, nache namaye ỹataqta nlachiguiñi qome.

¹¹ Qaq da huo'o ca choche datenataxaatac, da 'eeta': «Aỹem sa'axatta'aguet nam ỹataqta no'on lataxapi». Qaq nacheca ca ỹataqta 'eesa naqa'en da na'aqtaxanaxanec ne'ena nhuo' le'ecpi.

Ñim Lo'onatac 'Enauacna ỹachaxanapeguem da huesochiguiñi naqa'en na lalamaxat nhuo' le'ecpi

¹² Aỹem, llaỹona't qome na lauo' le'ecpi so Jacob, llapona't qome nam saq 'amaqtaq no'onañi Israel le'ecpi. Llaỹona't qome 'eeta'am ñaqa'en aca qaguetapi da huetaigui aca laỹe', 'eeta'am aca nlopi da huetaigui ca 'auaqpisat, nache da l-lamaxa 'eeta'am ca qalota shiỹaxauapi.

¹³ Qaq Ñim Lo'onatac 'Enauacna ỹo'otegue qome ca llec, qaq namayepi nache ca'atteueegue qome Ñimaye, nache tachiviigui naqa'en ca lasom ca huaqta'a't nỹecpi. Qaq ñim nta'a maye Nataxala', hua'auta'ague qome da taỹa'ague namayepi.