Miqueas 1 - La'aqtaqa Ñim Lo'onatac 'Enauacna 2013

Da nhuaxanaguec ye Samaria

¹ Qaq 'era da la'aqtac Ñim Nataxala' maye ỹanem co'ollaxa so Miqueas maye lma' ye Moréset, maye huaigui so lauanaqchec co'ollaq ila'a ye Samaria qataq ye Jerusalén, huetoigui co'ollaxa da lo'onataxanaxac so Yotán, Ajaz qataq so Ezequías maye nta'al ye Judá.

² Ñaq qana'axaỹaxañiỹa de'era, 'enauac qami' nhuo' le'ecpi, qataq 'enauac qami' shiỹaxauapi maye qoñeetalec ne'ena 'alhua, Ñim Nataxala', maye netaña añi lalamaqte qui'itta atamnaxaqui, nacheñi ñim da'aqtaxan qome da qami' dataỹa'agueta.

³ Cha'aye Ñim Nataxala' anac qome chegoqchiguiña yem lma', nache petañi da quetalec na ỹataqta pa'asheguem ana qasoxonaxapi.

⁴ Qaq ana qasoxonaxapi quiguiñi qome souaxat da pelec Ñimaye, 'eeta'am ana dapic lapa da qaỹasaxangui ca norec nache quiguiñi. Qaq nam ca'amapega't 'alhuapi qalaq colaxagui qome, 'eeta'am na 'alhua da ichec ca ỹataqta chaxaguet la'auaxac na 'etaxat.

⁵ Qaq 'enauac huo'o qome de'era ỹasouaxat da nam chegoxoguetpi so Jacob ỹataqta sa ỹalaq, qataq souaxat na lasouaxashetpi na nhuo' Israel le'ecpi. Cha'aye huaña ye Samaria co'ollaxa da saỹalaq nam chegoxoguetpi so Jacob. Qataq ye Jerusalén nalec naqa'en nam saq'en natamnaqa'pi nam Judá le'ecpi.

⁶ Qaq ỹoqo'oye ye huaqta'a't nỹecpi ye Samaria nlachiguiñi ñaqa'en qome, huaña, nache ishet da qoỹaalec ana nañiguishe uvapi. Qaq na lalamaxat coma'pi yemaye laguelec ñaqa'en qome ye ca'amegue, huaña nache yo'oqchiguiña ñaqa'en na lo'oxonaxala'pi.

⁷ Qataq dolachigui 'enauac nam natamnaxala'pi, qataq ỹavicta 'enauac anam natamnaxalatepi qo'oipaq lamopi. Nache aỹem ñelaxatchiguiñi qome nam natamnaxala'pi, cha'aye namayepi chegaqaigui ana nsheetenaqte ana quisheguetaxaipi, huaña qome nache qaltaq ỹe'eguelaxa ñaqa'en da nsheetenaqte da quisheguetaxac.

Da nachoxonnaxac so Miqueas

⁸ Qaq souaxat de'era nache aỹem ñeỹeetac qome souaxat da lta'araic ỹaquicoxo, qataq qaicaua caua ỹapela'ate da sequeuotapigui' qataq sootauec, qataq sheeta'am na qa'alaq da dalacotac qataq na mañec llalec da nỹeetac.

⁹ Cha'aye da lque'emaxa ye Samaria ỹataqta qaica ca lata' nache ivira'a ye Judá, qataq ivitta'a ye Jerusalén, yem hueta'a nam ỹalamaxat ihuo' le'ecpi.

¹⁰ Qaq de'era saishet qome da qaua'aqtaxañim na lma' ye Gat, qataq saishet qome da qanỹeñiitac, nacherata da qancogaigui qome na namoxoỹaxa souaxat da qanqui'iqui da huaña ye Bet Leafrá.

¹¹ ¡Qaq qami' Safir le'ecpi, qom qami' qaỹauegalo ca ỹaqa'a 'alhua, qalaq qoviitauec qome qataq lta'araic da qara'agaxai! ¡Qaq na lma' ye Zanán qalaq saishet qome da huenoxonec! ¡Qaq na lma' ye Betesel qalaq huo'o da nnoinaxac nache qaica ca qami' itaua'n!

¹² Qaq na lma' ye Marot qalaq ncocateguiñi qome souaxat da nqui'ic, nache iuattaique da nvita ca lamaicỹaxac, cha'aye Ñim Nataxala' namaq da qauem nache iviraua'a naqa'en ye ñegueuo ye Jerusalén.

¹³ Qaq qami' maye qarma'ai na Laquis, ñaq qaucoñeyeeua'a ana naigonapi na caipi, cha'aye nache qami' chegoqchiguilo da lasouaxashet ye Sión, qataq nache qami' chegoqchiguilo da ỹataqta sa ỹalaq na Israel le'ecpi.

¹⁴ Qaq ỹoqo'oye qoquiỹa'ai qome ye Moréset Gat. Qaq ye huaqta'a't nỹecpi ye Aczib, yemaye 'eeta'am qome aca nqoina da yaqto' qaỹachiguiñi na nta'alpi ye Israel.

¹⁵ Qaq qami' maye qarma'ai na Maresa, qaltaq huo'o qome ca qami' ñamaxalo da yaqto' qami' loxonqa, nache na ỹataqta nca'aguishecpi Israel le'ecpi qalaq datauec qome nache ỹe'eguenoigui na auacpi ye Adulán.

¹⁶ Qaq qami' maye qarma'ai na Sión, qanamarequiite' qome naua qarqaigolle' souaxat da qanqui'iqui, souaxat nam qaỹa'alquipi maye ỹataqta qarauotaxache, nache ỹataqta qanamarequiite' naua qarqaigolle' nache ivira'a da ỹataqta qami' qui'itaiqa qoñeeta'am ca teguesan, cha'aye na qaỹa'alquipi qaỹauega qome ca ỹaqa'a 'alhua.