Mateo 4 - La'aqtaqa Ñim Lo'onatac 'Enauacna 2013

So Jesús nauec so pa'aguenataxanaxaic

¹ Qaq co'ollaq mashe ime de'era, nache So Saqcha'a La'añaxac Ñim Lo'onatac 'Enauacna, ỹauegueuga so toolec 'alhua So Jesús da yaqto' so pa'aguenataxanaxaic ỹe'eguen Somaye.

² Qaq co'ollaq mashe iviraxatre'c soua cuarenta na'axa'te da saishet da deque'e co'ollaq huetauga so toolec 'alhua, nache So Jesús ỹataqta ỹaguec na lqouaxa.

³ Nache nvi' so pa'aguenataxanaxaic da ỹe'eguen Somaye. Nache 'enapego', 'eeta': –Da ỹoqta 'eesa da 'am Llalec Ñim Lo'onatac 'Enauacna, qaq no'on qome da nañigui nauole 'ayiiña 'anqa'en ne'ena coma'pi.

⁴ Nache So Jesús ỹasateguet 'eeta': –Naua ñiyigui'she maye nanettaleguete ana nere maye huetalec na la'aqtacpi Ñim Lo'onatac 'Enauacna 'eeta': «Saishet da nachaqacata aca nauole 'ayiiña da ỹa'añaqchet ca shiỹaxaua, nataqa'en iuen da ỹalaxaguet 'enauac na lamaxasoxonaxacpi Ñim Lo'onatac 'Enauacna.»

⁵ Ime, nache so pa'aguenataxanaxaic ỹaviguisheguemec So Jesús ye qui'itta nỹecpi ye Jerusalén. Qaq huaña yemaye nache ỹaviguisheguemec na l-laq aso no'onaxanaxaqui late'erai,

⁶ nache 'enapega, 'eeta': –Qom ỹataqta 'eesa da 'am Llalec Ñim Lo'onatac 'Enauacna, nache 'auparenaxanec nagui. Cha'aye ye nanettalec ana nere maye huetalec na la'aqtacpi Ñim Lo'onatac 'Enauacna, 'eeta': «Ñim Lo'onatac 'Enauacna namaq qome ca lamaxashecpi, da yaqto' 'am ntela'a. Nache 'am ỹachetaleguete qome naua lhua'q camayepi, da yaqto' saishet da 'am iuaxaneguet na coma'pi.»

⁷ Nache So Jesús 'enapeco': –Nataqa'en ye nanettalec ana nere maye huetalec na la'aqtacpi Ñim Lo'onatac 'Enauacna, 'eeta': «Saishet qome da 'avi'iguen Ñim Nataxala' maye Lo'onatac 'Enauacna.»

⁸ Qaq pa'atec nache so pa'aguenataxanaxaic ỹauega So Jesús aso qaỹoqotcheguemec 'alhua. Nache hualec asomaye da imeenaxanaxanec na 'alhuapi maye hueta'a na sallaxanecpi qataq 'añaxaicpi.

⁹ Nache 'enapeco': –Aỹem 'am sami' 'enauac ne'ena, da ishet da 'aua'alyiñi naua 'arllectel da aỹem 'avio'oxoren.

¹⁰ Nache So Jesús 'enapego' somaye, 'eeta': –'Am pa'aguenataxanaxaic, aỹem qoca'ai, cha'aye ye nanettalec ana nere maye huetalec na la'aqtacpi Ñim Lo'onatac 'Enauacna 'eeta': «'Avio'oxoren Ñim Lo'onatac 'Enauacna, qataq nachaqñita da 'aualaxaguet.»

¹¹ Nache so pa'aguenataxanaxaic, somaye ca'ai So Jesús, nache saqaỹaloq da anac so lamaxashecpi Ñim Lo'onatac 'Enauacna da huetague' So Jesús.

So Jesús chegoqchiguiña ye 'alhua Galilea co'ollaq cheta'ague da do'onataxan

¹² Qaq So Jesús co'ollaq la'axaỹaxac so Juan da qaicoñerai' qoỹanaigui aso ncoñetaxanaxaqui, nache Somaye taỹa ye 'alhua Galilea.

¹³ Qalaxaye saishet da ỹe'eguelaxa so lma' maye naña ye nỹecpiolec le'enaxat Nazaret. Nachaqrata da nqo'ona da naña ye nỹecpiolec le'enaxat Cafarnaúm. Yemaye neto'ot na loigue aso lapel late'erai ye 'alhua Galilea. Yem hueta'a nam Israel le'ecpi maye chegoxoguet so Zabulón qataq so Neftalí.

¹⁴ Qaq 'eetec de'era, yaqto' ipacchigui dam ỹiyiñi co'olloxocheye so la'aqtaxanaxanec Ñim Lo'onatac 'Enauacna le'enaxat Isaías, 'eeta':

¹⁵ «Ñaq 'ana'axaỹaxan 'am 'alhua maye 'am lalamaxat na llalaqpi so Zabulón, maye 'am saqaỹapeque aso auaxai; qataq 'ana'axaỹaxan 'am 'alhua maye 'am lalamaxat na llalaqpi so Neftalí, maye 'apa'aigue da nala' lliguisheguem so tala Jordán; Qataq 'ana'axaỹaxan 'am 'alhua Galilea, maye 'am netalec nam chegaqauec shiỹaxauapi.

¹⁶ Na'aictaxa da nam shiỹaxauapi maye 'am huetalec da huetaigui na napalaxa, qalaq namayepi ila'a aca late'erai ncoỹaraxanaxaqui. Ncoỹaraxanaxaqui maye icoỹarelec nam mashe huetaigui qataq huotaique da loxonec da nleuaxa.»

¹⁷ Huaña, nache So Jesús cot da da'aqtaxanem 'enauac so shiỹaxauapi, 'eeta': «Qavi'eguelaqaỹot qome Ñim Lo'onatac 'Enauacna, cha'aye da lo'onataxanaxac Ñimaye maye hueta'a ne'ena.»

So Jesús iỹaxanalo soua cuatro ya'acoxoiqa

¹⁸ Qaq huo'o so na'a'q So Jesús queto'ot so loigue aso lapel late'erai maye huaña ye Galilea. Nache ila'alo soua dos nqaỹa't ya'acoxoiqa: Simón Pedro qataq so lqaỹa Andrés, soomaye ya'acota'ape,

¹⁹ nache So Jesús 'enapegalo, 'eeta': «Aỹem qauca'acheegue. Yaqto' nache tachiguiña da qaya'acoxoqui, nache Aỹem qami' sapaxagueneque da lataxac da yaqto' ishet da qanaviquiiua'a Aỹem na shiỹaxauapi.»

²⁰ Nache sa naỹaloxo'n soua Pedro qataq Andrés da ỹaxaare'c so lalegue'c, nache ca'atregue So Jesús.

²¹ Qaq So Jesús, nache queto'ot na loigue aso lapel, huaña nache qaltaq ila'alo soua lỹa't dos nqaỹa't maye nataqa'en ya'acoxoiqa: Santiago qataq so Juan soomaye netrangui aso l-llocta', napareeta'ape so lalegue'c nnaictrague' so lta'a' Zebedeo. Nache So Jesús iỹaxanalo soua nqaỹa't.

²² Huaña, nache soomaye no'onaxatchiguilo aso l-llocta' qataq so lta'a', nache ca'atregue So Jesús.

²³ Nache So Jesús coleetapeguelec 'enauac ye Galilea da dapaxaguenataxaatapoigui ana napaxaguenaxaquipi na judiopi yi'iye 'alhua, ỹa'axattac da no'on na'axaỹaxac maye ỹa'axat da Ñim Lo'onatac 'Enauacna ilo'ogue 'enauacna, qataq natareetac 'enauac na ỹotta'a't lalolaxa na shiỹaxauapi.

²⁴ Nache da na'aqtaguec So Jesús ỹataqta 'enauac ye 'alhua Siria da qaỹaỹaten. Nache qanda'a Somaye som shiỹaxauapi maye ỹotta'a't na lalolaxa, qataq som huo'o na netaigui saqcha'a na'añaxac leguemaxaic, copchaxaicpi, qataq na sa da'añiigue. Nache 'enauac nataren So Jesús.

²⁵ Nache ỹataqta qalota so shiỹaxauapi maye chegaqa'a ye Galilea, qataq ye Judea qataq ye Decápolis, nache ca'attague' So Jesús. Nataqa'en huo'o so chegaqaua'a ye nỹecpi Jerusalén, qataq na laỹepi nma'pi maye hueta'atague da lỹa le'ego so tala Jordán.