Mateo 24 - La'aqtaqa Ñim Lo'onatac 'Enauacna 2013

So Jesús ỹa'axata'a da qailaxachigui aso no'onaxanaxaqui late'erai

¹ Qaq So Jesús co'ollaq ca'ai aso no'onaxanaxaqui late'erai, nache soua lapaxaguenataqa nquicoto Somaye, da yaqto' ỹachaxana na nỹecpi asa'aso no'onaxanaxaqui late'erai.

² Nache So Jesús 'enapeco': «¿Qauloita'a nagui 'enauac ne'ena nỹecpi maye ỹataqta lta'araicpi? Aỹem ỹataqta 'eesa de'era qami' sa'axatema nagui da 'enauac ne'ena qailaxachigui qome. ¡Saishet qome da huo'o ca 'oonolec da nachattañi namayepi!»

Na na'anecpi maye ỹa'axata'a ca loga'tna

³ Qaq co'ollaq ime de'era, nache So Jesús qataq soua lapaxaguenataqa taresheguemec aso saqaỹoqotcheguemec 'alhua maye nanqa' ana Olivo. Nache So Jesús nso'ooñi, nache co'ollaq ndoteto soua lapaxaguenataqa, nache qainat Somaye, qoỹeeta': –Sauoqtaique da qomi' 'aua'axatema ¿chaq lagui qaq ivita de'era, da qailaxachigui añi no'onaxanaxaqui late'erai? ¿Ca 'eetec da saỹaanaq da ỹoltaq 'añe'eguelaq qome, qataq da ivita cam loga't ana 'alhua? ¿Chaq 'eetec ca la'anaxat qome?

⁴ Nache So Jesús 'enapeco': –¡Maxatchaxa qome! Saishet da huo'o ca qami' ỹatenache't.

⁵ Cha'aye ỹataqta qalota qome na anac, nache choche ne'enaqchingui da ỹe'enaxat, nache 'enapega na shiỹaxauapi, 'eeta': «Aỹem maye nachaỹem Lca'aguishec Ñim Lo'onatac 'Enauacna.» Qataq do'onataxana qome da ỹe'enaxat, nache qalota qome na ỹatenachet.

⁶ Qami' qaua'aqaitapeguelec qome da chemaqchiguiñalo da alaataxac na ỹotta'a't 'alhuapi. Qataq huo'o ca mashe huotaique da deloguiỹa't na nta'alpi. Qalaxaye saishet qome da qayi'i; cha'aye damaye iuen da huo'o qome, qalaxaye saxanaxa da ivita ca loga't ana 'alhua.

⁷ Cha'aye na lta'alpi nam ỹotta'a't shiỹaxauapi delogui' qome ca lỹa nta'a, nache na shiỹaxauapi qaica ca aloq, nache huo'o qome ca nqouaxa qataq qalota na 'alhuapi na huo'o na nacholaxanaxa.

⁸ Qaq 'enauac ne'ena, nachena na chegoqchiguiña na que'eenaxacpi ana 'alhua.

⁹ Huaña, nache qami' qaỹaue'c da qami' qaicoñerai'salo, qataq qami' qoỹaneua'alo na nta'alpi da yaqto' saishet da qami' iyacna'ape, qataq ivira'a da qami' ỹalaua't. Qataq 'enauac na shiỹaxauapi ỹataqta qami' nquiỹalo, souaxat da Aỹem qoquiitague'.

¹⁰ Nache qalota qome nam Aỹem ca'attague' da ỹaxanec da lpi'iỹaxac Aỹem, qataq huo'o qome ca decachiỹalec ca lỹa da sa iyacnapec, cha'aye souaxat da lquiỹaxa.

¹¹ Qataq qalota qome na nvi' maye tenataxanaxaicpi, 'eetega da la'aqtaxanaxanecpi Ñim Lo'onatac 'Enauacna, nache ỹataqta qalota qome na ỹatenachet shiỹaxauapi.

¹² Qaq na shiỹaxauapi ỹataqta qauemaicpi qome, ỹoqo'oye qalota qome na ỹaxaañi da ỹauotec ca lỹa.

¹³ Qalaxaye Aỹem ñeca'alaxatec 'enauac nam Aỹem quetague' qataq saishet da ỹaxanec da lpi'iỹaxac Aỹem choche ivitta'a ca loga't da nachaalataxac.

¹⁴ Qaq cam loga't ana 'alhua nvi' qom de'era no'on na'axaỹaxac maye ỹa'axat da lo'onataxanaxac Ñim Lo'onatac 'Enauacna mashe qaỹa'aqtaxanem 'enauac na huetalec ana 'alhua, qataq nam ỹotta'a't shiỹaxauapi hua'aqchigui damaye.

Dam na'anec qome da yaqto' na shiỹaxauapi datauec

¹⁵ So Jesús queto'ot da na'aqtaxaategueto soua lapaxaguenataqa, da'aqtaxaateguema cam loga't ana 'alhua, nache 'enapeco': Cam itaxaỹaxan de'era, nache iuen da npogoxoinapegue' da ỹaỹaten dam ỹa'axat som la'aqtaxanaxanec Ñim Lo'onatac 'Enauacna le'enaxat Daniel. Somaye ỹiyiñi co'ollaxa da huo'o ca na'a'q, nache qoỹaneua'a aca qauem nachetaqtaxanaqte añi no'onaxanaxaqui late'erai. Qaq qom qauloỹa'a yi'iye ndaqa' añi no'onaxanaxaqui maye sa qaishetapec da ipacchigui dam ỹa'axat co'ollaxa so na'aqtaxanaxanec, nache qami' qome qauataiuec.

¹⁶ Qaq nam hueta'a ye 'alhua Judea, nache datauec qome da tasheguemec ana qaỹoqotcheguemec 'alhuapi,

¹⁷ qaq cam netalec na l-laq ca lma', qaq no'on qome da saishet da taigui ca lma' da huo'o ca ỹache,

¹⁸ qataq cam huetauga na no'onaxa, qalaq saishet qome da ỹe'eguelaxaua'a ca lma' da yaqto' ỹache' caua alogo.

¹⁹ Qaq cam 'alpi maye hualaxaipi que'eca na'a'q ỹataqta lta'araic da nque'eenaxac qome. ¡Qalaxaye ỹactec da lachoxoyec qome aca 'alo maye cheta'ague da deco'otac!

²⁰ Ỹoqo'oye qanqouagaxauñiỹot qome Ñim Lo'onatac 'Enauacna, qataq qauỹaxañiỹot da yaqto' de'era saishet da huetoigui ca no'omaxa, huo'otaq ca na'a'q mataxaqui,

²¹ cha'aye que'eca na'a'q na shiỹaxauapi ỹataqta qalota qome da nque'eenaxac. Saishet da huo'o ca 'eeta'am que'eca que'eenaxac dam qaỹachegoqta'ague co'ollaq cheta'ague da ỹo'ot ana 'alhua Ñim Lo'onatac 'Enauacna, qataq saishet da qaltaq qanauane' qome de'era que'eenaxac.

²² Ñim Lo'onatac 'Enauacna ỹataqta ỹauotec nam maiche lca'aguishecpi, ỹoqo'oye caua na'axa'te que'eca que'eenaxac saishet da qaỹoqtre'c naqa'en Ñimaye. Cha'aye da saishet da nache 'eetec de'era Ñimaye, nache 'enauac ileu na shiỹaxauapi.

²³ Qaq que'eca na'a'q qom huo'o ca, 'eeta': «Ña qauloỹa, 'ena na Lca'aguishec Ñim Lo'onatac 'Enauacna hueta'a ne'ena», huo'otaq da, 'eeta': «'Iñi cha'a ñi Lca'aguishec Ñim Lo'onatac 'Enauacna», nache saishet qome da qaua'amaqchiñi.

²⁴ Cha'aye nvi' qome nam tenataxanaxaicpi maye 'eetega lca'aguishecpi Ñim Lo'onatac 'Enauacna qataq nam 'eetega da la'aqtaxanaxanecpi Ñimaye, nache ỹo'ot qome nam sa qaỹauanapega qataq huo'o da llo'oxoyec, nache ỹatenachet na qalota shiỹaxauapi. Qaq ivira'a da ishet nataqa'en da ỹatenachet nam ỹataqta iỹaxanapi Ñim Lo'onatac 'Enauacna.

²⁵ Qaq damaye mashe nache 'eetai' da qami' sa'aqtaxaateguema

²⁶ da huo'o ca nvi' da qami' da'aqtaxanema, 'eeta': «Ña qauloỹa da Lca'aguishec Ñim Lo'onatac 'Enauacna, damaye netauga ye toolec 'alhua», qalaq saishet qome da qanqo'oñiuga. Huo'otaq da, 'eeta': «¡Ñi Lca'aguishec Ñim Lo'onatac 'Enauacna nqañoxottañi hueta'a ne'ena!», qalaq saishet qome da qaua'amaqchiñi.

²⁷ Cha'aye Aỹem Shiỹaxaua Llalec qom ñanac, nache saishet da ñeqañoxottañi. 'Enauac da Aỹem qaila'a, cha'aye que'eca iviraxac 'eeta'am ca nqashelgaxa da nqashilliguiñi qalaq imata na piguem.

²⁸ 'Enauac na shiỹaxauapi ana 'alhua ỹaỹaten da ca huaña da lapona't na teguesanpi, nache ỹaỹaten da hueta'a ca leuaxaic. Qaq nache 'eetec nataqa'en qome da ñanac, nache 'enauac da qaỹaỹaten.

Da lviraxac qome Na Shiỹaxaua Llalec

²⁹ So Jesús queto'ot da da'aqtaxaatac, 'eeta': –Qom inoxonec que'eca que'eenaxac: «Nache añi nala' 'om qataq ñi ca'agoxoic saishet da 'eroigui, qataq naañi ana huaqaañipi, qataq ivira'a da cholaxan na na'añaxacpi maye hueto'ot na pa'asheguem.»

³⁰ Huaña, nache 'enauac da qaila'a na pa'asheguem ca la'anaxat da Aỹem Shiỹaxaua Llalec qaltaq ñe'eguelaq. Nache 'enauac qome na ỹotta'a't shiỹaxauapi ana 'alhua ỹataqta iviloxolaqchet da lcolanaxa qom Aỹem ila'aguet da ñanactaigui ca lo'oc na piguem, ỹataqta lta'araic da ỹa'añaxac qataq da ỹo'oxoyec.

³¹ Nache samaqteegalo qome na ỹamaxashecpi, namayepi ỹauota'a ana lasheere da yaqto' laỹona't nam Aỹem ca'attague'pi.

Qaỹaloqnaxana aso higo lcheyec

³² Qanapaxagueñiỹa qome da lataxac ana higo lcheyec. Da anamaye da ivita da ñaxatec ana lcouepi qataq dalaxai ana lauepi, nache qami' qauaỹaañi da mashe saqaỹapigui naua nta'api.

³³ Qaq nache 'eetec nataqa'en qom qami' qauloỹa'a 'enauac ne'ena maye sa'axattac, nache qami' qauaỹaañi da mashe saqaỹapeque ca ỹe'eguelaxasoxoc.

³⁴ Qaq ỹataqta 'eesa de'era qami' sa'axatema, da 'enauac qome ne'ena hua'auñi da yo'oq qom huo'otaq saxanaxa da ileu na shiỹaxauapi maye huetaiguilo nagui ne'enaua na'axa'te.

³⁵ Na piguem qataq ana 'alhua imeuo qome, qalaxaye da ỹa'aqtac saishet da imeuo.

³⁶ Qalaxaye que'eca na'a'q qataq ca laloqo' da ñe'eguelaq, qalaq qaica ca ishet da ỹaỹaten, ivira'a na namaxashecpi na piguem. Qataq ivira'a Aỹem saishet da saỹaten. 'Oonolec Ñim Lo'onatac 'Enauacna maye Ita'a da ỹaỹaten.

³⁷ Qaq Aỹem Shiỹaxaua Llalec qom qaltaq ñe'eguelaq, nache na shiỹaxauapi 'eeta'am qome da lataxac so na'a'q maye huetaigui co'ollaxa so Noé,

³⁸ da na shiỹaxauapi ỹo'ottac da lquia'axac, qataq nỹomtac, qataq huarootega't, choche ivitta'a so na'a'q da so Noé huenoxonoigui aso nnotaxaqui, ime nache npaxaasheguem ana 'alhua.

³⁹ Se'eso shiỹaxauapi saishet da ỹaỹaten da huaigui co'ollaq npaxaasheguem ana 'alhua, ỹoqo'oye ivira'a da 'ogaxaicpi. Qaq 'era da 'eetec Aỹem Shiỹaxaua Llalec qom qaltaq ñe'eguelaq.

⁴⁰ Qaq que'eca na'a'q qome, huo'oi caua dos ỹale't da do'onataxaata'ape huetrauga ca no'onaxa, nache caamaye 'oonolec ca sauec, qaq ca lỹa qalaq ño'onaxatañi.

⁴¹ Qataq da huo'oi caua dos 'alo da isocta'ape na lañiguishec ala, qalaq 'oonole aca sauec, qaq aca lỹa qalaq ño'onaxatañi.

⁴² Qaq ỹoqo'oye iuen da nache 'eetai' da qanloitec, cha'aye qami' sa qauaỹaañi ca laloqo' da Aỹem, maye Aỹem Qarataxala'ai qaltaq ñe'eguelaq.

⁴³ Qaq ỹoqta 'eesa de'era qami' sa'aqtaxanema da ca lalamaxat ca nỹec da huo'otaq ỹaỹaten ca laloqo' da nvi' ca cachaxaic, nache camaye nauaatac ca lma', da yaqto' saishet da qaicachiỹot.

⁴⁴ Qaq ỹoqo'oye nache 'eetec nataqa'en da qoñiita, iuen da qanloitec qataq qanaỹamaxacheetai' qome. Cha'aye Aỹem Shiỹaxaua Llalec ñevi' qom mashe saishet da Aỹem qaỹauotaique.

Ca namaxashec maye ỹataqta ỹalaq qataq ca namaxashec maye sa ỹalaq

⁴⁵ ¿Negue't cam namaxashec maye ỹataqta ipaqueelec ca namaxasaguec qataq nlotec? Qomye nacheca cam ỹale maye ca na'aco' ipataxalec camaye, da yaqto' iquia'axaatac cam hueta'a ca lma' da ivita ye laloqo' da nquia'axac.

⁴⁶ ¡Qaq ỹataqta machiguiñi qome que'eca namaxashec, da huo'otaq ivita da nvi' ca na'aco' qalaq ilalec camaye da ỹo'ottac cam ỹamaxalec!

⁴⁷ Qaq ỹoqta 'eesa de'era qami' sa'aqtaxanema, da que'eca 'aco' ipataxalec 'enauac nam lalamaxatpi camaye.

⁴⁸ Qalaxaye saloqnaxanaxa da huo'o ca namaxashec qauemaic, nache 'eeta' da lhuennataxac: «Que'eca ña'aco' qaỹoqtegue da taigue nache qaỹaloqta da ñe'eguelaq»,

⁴⁹ nache quetot da iuaxaatac na ltauapi, qataq ỹo'ot na lquia'axac, qataq nỹomtague' na taxaicpi.

⁵⁰ Qaq da nvi' ca na'aco' que'eca na'a'q maye saishet da huotaique,

⁵¹ nache ỹauo'o ca nhuaxanaguec camaye, 'eeta'am naqa'en da nhuaxanaguec 'enauac nam namaxashecpi maye ỹatenachet ca na'aco'. Huaña, nache nỹeetac, qataq ỹataqta inaga't naua lhue da nqui'ic.