Mateo 14 - La'aqtaqa Ñim Lo'onatac 'Enauacna 2013

Da l-leuaxa so nachelaxanataxanaq Juan

¹ Qaq se'eso na'a'q so Herodes Antipas maye ilotague' ye 'alhua Galilea, somaye hua'aqtega na shiỹaxauapi da na'aqtaxaatapigui So Jesús.

² Qaq huo'o so na'a'q, nache 'enapego' som lamaxashecpi, 'eeta': «Se'eso Jesús ỹoqta da nacheso som Juan maye nachelaxanataxanaq da qaltaq nca'alec. Ỹoqo'oye huo'o da la'añaxac da ỹo'ot nam sa qaỹauanapega.»

^3-4 Cha'aye soua hua'au' na'axa'te co'ollaxa so Juan maye nachelaxanataxanaq 'eetega so Herodes, 'eeta': «¡De'era 'auo'ot ỹataqta sa ỹaỹamaxañi! Cha'aye añi Herodías maye lhua so 'arqaỹa Felipe, añimaye 'auotaxanec, nache 'auauo'o 'arhua.» Nache so Herodes dalemataỹa so Juan, nache damaxasoxoolec da qaỹaconeua'a, nache qaicoñerai' qoỹanaigui aso ncoñetaxanaxaqui late'erai.

⁵ Qaq so Herodes huotaique da ỹalauat so Juan. Qalaxaye sa ỹañoxot cha'aye huo'o da lcolanaxa na shiỹaxauapi. Cha'aye qalota na ỹa'amaqten da so Juan ỹataqta 'eesa da la'aqtaxanaxanec Ñim Lo'onatac 'Enauacna.

⁶ Qalaxaye co'ollaq ivita so laloqo' da deque'elec so lañoxoqui so Herodes, nache aso llale aso Herodías dasottac, qaq 'enauac som lquia'axauapi imeteetac asomaye. Nache so Herodes ỹataqta nqopita da lasotaxac asomaye.

⁷ Nache ỹanem asomaye da la'aqtac da ipacchigui da ỹanem cam camachaqca iỹaxanaique asomaye.

⁸ Nache aso Herodías ỹañoxot da ỹamaxalec aso llale da 'enapega so Herodes da 'eeta': «¡Sauotaique da sa 'auaỹaloxon nagui da aỹem 'andouga ca nquia'axaqui da huetagui 'anqa'en ca lqaic ca Juan maye nachelaxanataxanaq!»

⁹ Nache so nta'a Herodes ỹataqta daquico. Qalaxaye mashe ỹan so la'aqtac maye 'enapec da ipacchigui, qataq souaxat so lquia'axauapi maye hua'aqchigui co'ollaxa somaye, nache damaxasoxoolec da qoỹami' asomaye so iỹaxanaua'a.

¹⁰ Nache so lamaxashecpi taua'a aso ncoñetaxanaxaqui da iquesoxouec so lqaic so Juan,

¹¹ nache qaỹachagui so nquia'axaqui, ime nache qairouga aso qa'añole, nache asomaye ỹami' aso late'e.

¹² Nache soua lapaxaguenataqa so Juan taua'alo da yaqto' irouec so lo'ocỹaxac somaye da ilayiñi. Qaq co'ollaq ime, nache je'c da da'aqtaxaarem So Jesús dam qanayeuaigui.

So Jesús iquia'axan so qalota shiỹaxauapi

¹³ Qaq co'ollaq ỹaỹaten de'era So Jesús, nache ca'ai ca hueta'a, nache ndotec da huenongui aso nllocta da taitague da le'ego, tauga ca qaỹoqteuga 'alhua. Qalaxaye so shiỹaxauapi maye saqaỹapeque que'eca hueta'a co'ollaq la'axaỹaxac, nache piỹañi da icaalec Somaye.

¹⁴ Qaq co'ollaq huenoteeguesop aso nllocta So Jesús da le'ego, nache choche ilaigui so shiỹaxauapi ỹataqta qalota hueta'a yi'iye, nache ỹataqta qalota da lchoxonnataxanaxa somayepi. Huaña, nache nataren 'enauac so sa no'onpi maye qandotauo.

¹⁵ Qaq co'ollaq mashe avit, nache soua lapaxaguenataqa So Jesús ana'c da qoỹenapega Somaye, qoỹeeta': –Ne'ena souaqta'a ỹataqta toolec qataq mashe avit. Qonapega taxa na shiỹaxauapi da nqo'ona na nỹecpi da yaqto' desheenaxana ca aloq.

¹⁶ Nache So Jesús 'enapeco': –Namayepi qome saishet da jec. Qami' maye iuen da qaỹa'añim qome ca aloq.

¹⁷ Nache soua lapaxaguenataqa 'ena'apo': –Qaica cam lỹa qonoq chaqyeuate' yeua cincole nauole 'ayiiña, qataq yeua dos nỹaxaye.

¹⁸ Nache So Jesús 'enapeco': –Ñaq Aỹem qandoiua'alo caamaye.

¹⁹ Qaq co'ollaq mashe ime da 'enapega na shiỹaxauapi da nso'ooñi, nso'oolec na 'auaqpi darala, nache So Jesús ỹaconalo soua cincole nauole 'ayiiña qataq soua dos nỹaxaye, ime, nache ỹamato'ot na piguem, nache ỹanot da na'achecỹaxac Ñim Lo'onatac 'Enauacna. Ime, qaq ncolaxaayiñi soua nauole, nache ỹanema soua lapaxaguenataqa da yaqto' soomaye ỹanoigui so shiỹaxauapi.

²⁰ Nache 'enauac somayepi deque'e qataq ivira'a da ỹataqta comaraxaicpi. Qaq soua lapaxaguenataqa co'ollaq laỹona't so ñi'iỹoxot, nache ivi' soua doce no'oxonal maye laỹe' na nallec soua nlaqchiguilo.

²¹ Qaq som deque'epi co'ollaxa ivi' cinco mil ỹalleppi, qalaxaye saishet da qanaloqten so 'alpi qataq so ñaqpiolec.

So Jesús quetalec so 'etaxat

²² Qaq co'ollaq ime de'era, nache So Jesús 'enapegalo soua lapaxaguenataqa 'eeta': «Qaunochingui añi nllocta nache qa'aỹeetegue da lỹa le'ego ana lapel. Aỹem qalaxaye ño'onañi da ñecoyeguene' na shiỹaxauapi, maiche qami' seviraleguete qomele.»

²³ Qaq co'ollaq mashe 'enauac da jec so shiỹaxauapi, nache So Jesús ndotec da tasheguemec aso qaỹoqotcheguemec 'alhua, da yaqto' nqouagaxauen. Nache hueta'a yemaye da nqouagaxaueetac choche ivitta'a da pe.

²⁴ Qaq aso nllocta mashe qaỹoqteueegue asomaye datateguet so la'at, nache ana lapaxa na 'etaxat ỹataqta iuaxaatacot asomaye ỹataqta qapa'atteguet.

²⁵ Qaq co'ollaq mashe yo'oxoñitai', nache So Jesús icaalec aso nllocta, quetalec na 'etaxat.

²⁶ Nache soua lapaxaguenataqa ila'aguet Somaye, qalaxaye saishet da ỹauatto'n, nache soomaye ỹataqta nlaqchiguilo da lcolanaqa', nache ỹa'alaqtaguilo, 'eeta': –¡Ña qauloỹa na nqui'i!

²⁷ Nache So Jesús 'enapegalo soomaye, 'eeta': –¡Qaue'enaxañiitai'! ¡Saishet da qayi'i! ¡Nachaỹem!

²⁸ Nache so Pedro ỹasateguet, 'eeta': –'Am Qarataxala', qom ỹoqta 'eesa da nache 'am, nache 'auauo'o ca 'ara'aqtac da yaqto' aỹem nataqa'en ishet da sapelec na 'etaxat, da 'am seca'ata'aguet.

²⁹ Nache So Jesús 'enapeco': –¡Aja'! ¡'Auanac! Nache so Pedro sa naỹaloxon da huenoteeguesop aso nllocta, nache pelec na 'etaxat da ca'ata'aguet So Jesús.

³⁰ Qalaxaye co'ollaq nomteguet da la'añaxac so la'at, nache ỹataqta huo'o da lcolanaxa. Nache somaye iyiiñi, nache ỹa'alaq, 'eeta': –¡'Am Ỹataxala', aỹem 'anca'alaxatec!

³¹ Nache So Jesús ỹaconeguet na lhuaq so Pedro. Nache 'enapega, 'eeta': –¡Pedro, 'am ỹataqta qapio'olec da 'arpi'iỹaxac Aỹem! ¿Ta'ainco' ye 'auqolectaxan?

³² Nache soomaye co'ollaq mashe huenooyingui aso nllocta, nache vi'iiguet so la'at.

³³ Nache 'enauac so netangui aso nllocta, ỹa'aroto naua l-llectel So Jesús, nache 'eeta': –¡Ỹoqta 'eesa, da nache 'am maye 'am Llalec Ñim Lo'onatac 'Enauacna!

So Jesús nataren na sa no'onpi co'ollaq huaña ye Genesaret

³⁴ So Jesús qataq soua lapaxaguenataqa ỹa'axasoxoorelec aso lapel choche ivitta'ata ye nỹecpi ye Genesaret.

³⁵ Nache so shiỹaxauapi maye lma' se'eso 'alhua co'ollaq ỹauatton So Jesús, nache qaỹa'aqtaxanem 'enauac som netalec se'eso 'alhua, nache qandoua'a 'enauac so sa no'onpi cam hueta'a Somaye.

³⁶ Nache qanachoxoreetacot da na'aictaxa da choche qaipoteua'a na laỹe so lapo'. ¡Nache 'enauac som sa no'onpi maye ipoteua'a na laỹe so lapo' So Jesús, somayepi no'oita!