Marcos 14 - La'aqtaqa Ñim Lo'onatac 'Enauacna 2013

Da qoỹoxottañi ỹamaxataxac da qaỹaconeua'a So Jesús

¹ Qaq mashe saxanaxalo caua dos na'axa'te da ivireuga ca laloxoqui soua naponaxaqui' maye le'enaxat Lapascua. Qataq huetoigui nataqa'en da qanallec ana nauole 'ayiiña maye qaca aca lalecte maye ỹasheeraxachigui. Nache nam lataxala'pi na ntaxaỹaxanaxanecpi qataq nam dapaxaguenataxaatapeguec na namaxasoxonaxacpi, namayepi ilotaique ca latenataxanaxac da ỹachegoxotchigui da ỹaconeua'a So Jesús da yaqto' ỹalauat.

² Qalaxaye somayepi 'enapeco': «No'on da saishet qome da huetoigui ñaqa'enaq na naponaxaqui, yaqto' saishet da ỹe'elaxa't na shiỹaxauapi qataq qomi' dataỹa'agueta.»

Aso 'alo maye icorelec so coraxat So Jesús

³ So Jesús hueta'a ye nỹecpi ye Betania, netaña ca lma' so Simón maye nchega na lo'oc co'ollaxa. Qaq Somaye co'ollaq ñaq deque'etac, nache nvireuo aso 'alo nasoqta'a aso laỹe' so coraxat maye ỹataqta qaỹoqteua'a. Nache nquigueua'a So Jesús, ime, nache ilaxat aso laỹe' so coraxat, nache icorelec na lqaic So Jesús.

⁴ Nache huo'o nam ỹalectauo na dalemata, nache maiche detaqtega't, 'eeta': «¡Ta'ainco' ye choche qaỹe'en se'eso coraxat!

⁵ Ye somaye ivi' da lashiichiỹaxa'c caua trescientos na'axa'te da lo'onataxanaxac ca shiỹaxaua, somaye ishettaxa da qaimen, nache ishet da qaitauan na qalota choxoraqpi.» Nache ỹataqta qanayectapeguelec aso 'alo.

⁶ Qalaxaye So Jesús 'enapeco': «¡Qauaqaita'a aramaye! ¿Ta'ainco' ye sa qaualemaxache? Aramaye da Aỹem ỹo'otec ỹataqta ỹaỹamaqchiguiñi.

⁷ Nache 'eetai' qome da huo'o na shiỹaxauapi choxoraq da qaualliquiita'aguet, nache ishet da qautauañi da maiche qarhuennataxaqui. Aỹem qalaq saishet da nache 'eetai' da qami' soota'agueta.

⁸ Ara'ara 'alo, aramaye ỹo'ot dam nalotaua'a. Icorelec na iqaic so coraxat, qalaxaye saishet da ỹaỹaten aramaye da ỹaỹamaxattegueñi da ỹo'ocỹaxac maye taỹa'a da qailareñi.

⁹ Qaq ỹataqta 'eesa de'era qami' sa'axatema, de'era ỹo'ot aramaye qaiuennate nataqa'en 'enauac nam pa'aiguelo naua laỹel ana 'alhua nam hua'aguelo da qaỹa'axattac de'era no'on na'axaỹaxac maye chegoqo'ot Ñim Lo'onatac 'Enauacna.»

So Judas ỹaneuo So Jesús

¹⁰ So Judas Iscariote som 'oonolec soua doce napaxaguenataqa, somaye nqo'oneua'a da detaxaỹapegue' na lataxala'pi na ntaxaỹaxanaxanecpi da ỹachaxanapeguem, da itauan da qaỹaconeua'a So Jesús.

¹¹ Qaq somayepi co'ollaq hua'axaỹa de'era, nache ỹataqta machiguiñi, nache ỹachaxanapecot aso nsheetenaqte anom da isheeten somaye. Nache chegoqchiguiña da so Judas nmittaique ca ỹaỹamaqchiguiñi lataxac da ishet da ỹaneuo So Jesús.

Da nquia'axac maye saishet da qaicoua'ai

¹² Qaq som la'auaxanec na'a'q soua na'axa'te naponaxaqui' maye huaigui da qanallec ana nauole 'ayiiña maye qaca aca lalegue anam ỹasheeraxachigui, qataq qaỹalauat na qagueta llalec se'eso na'a'q Lapascua, qaq se'eso na'a'q soua napaxaguenataqa, inatta'ape So Jesús, 'eetra': –¿Ca hua'ague ca 'auauotaique da saxague da yaqto' saỹamaxataxañi ca qarquia'axac da nvireuo na Lapascua?

¹³ Nache So Jesús 'enapegalo soua dos soomaye, 'eeta': –Qanqo'oñiiua'a qome ye nỹecpi ye Jerusalén; nache huaña qome da qauloỹa'ague ca ỹale ỹachetac aca laco'oña 'etaxat laỹe'. Nache qauca'acheegue qome camaye,

¹⁴ choche qaviyeeta'a ca lma' maye tateua'a, nache qoñiỹapega que'eca lma' que'eca nỹec qoñiita'. «Ñi Napaxaguenataxanaq, huotaique da ỹaỹaten ca ndaqa' cam huaña da dequi'iỹa'ai' naua lapaxaguenataqa ne'ena pe maye le'enaxat Lapascua.»

¹⁵ Nache camaye qami' ỹachaxanalo qome ca ndaqa' lta'araic na pa'asheguem ñi nỹec mashe lhuotta. Nache huaña da qauaỹamaxachiiñi 'enauac cam seuenaq.

¹⁶ Nache soua dos lapaxaguenataqa je'c. Qaq co'ollaq ivildeua'a so nỹecpi, nache ỹataqta ipacchigui 'enauac nam ỹa'axat So Jesús. Nache soomaye iqataxaarai' so nallec maye qanallec naxa da ivireuga so naponaxac le'enaxat Lapascua.

¹⁷ Qaq co'ollaq mashe pe, nache ivireuo So Jesús qataq soua doce lapaxaguenataqa.

¹⁸ Qaq co'ollaq ñaq deque'eta'ape, nache So Jesús 'enapeco': –Ñim Aỹem ỹaneua'a nam Aỹem ipa'agueetacpi, ñimaye hueta'a ne'ena Aỹem lquia'axaua.

¹⁹ Nache soua napaxaguenataqa soomaye ỹataqta daquigoi'. Nache ñi 'oonolec soomaye, 'eeta': –¿Peta'a nachaỹem?

²⁰ Nache So Jesús 'enapeco': –Ñimaye nacheñi ñi 'oonolec da qoñiita, ñim ỹauoltenaxanaxaua nagui ne'ena qarquia'axaqui.

²¹ Qalaxaye, nache 'enapec ana nere maye huetalec na la'aqtacpi Ñim Lo'onatac 'Enauacna, da Aỹem Shiỹaxaua Llalec iuen da Aỹem qaỹalauat. Qalaxaye ñim Aỹem ỹaneuo ñimaye huo'o ca talec qome ỹataqta chaqaic, ¡'onaxaictoxo' co'ollaxa da saishet da nañiguiñi ñimaye!

²² Qaq co'ollaq ña deque'eta'ape soomaye, nache So Jesús ỹacona aso nauole 'ayiiña, nache ỹanot da na'achecỹaxac Ñim Lo'onatac 'Enauacna. Ime, nache ncolaxaañi, qataq ỹanema soua lapaxaguenataqa, nache 'enapegalo 'eeta': «Qauacoñiiguet, namaye, nachena na maiche ỹo'ocỹaxac.»

²³ Ime, qataq ỹacona aso ỹomaxaqui nlaqchigui na lataxa, nache ỹanot da na'achecỹaxac Ñim Lo'onatac 'Enauacna. Ime, nache ỹanoiguilo soua lapaxaguenataqa, nache 'enauaque soomaye nỹomguilo asomaye.

²⁴ Nache 'enapegalo', 'eeta': «Ne'enaua nachenaua na itago'q. Naamaye nachenaua naua chegoqchiguilo da Ñim Lo'onatac 'Enauacna ỹo'ot da naỹamaxataxac da qami' naỹamaxatto 'enauac da qoñiita. Ne'enaua itago'q naigui da qalota na qanca'alaxatec.

²⁵ Nache pa'atec nagui da qami' ñeỹomaxau', ne'ena lataxa maye lli'i ana uva. Qalaxaye qom ivita da llaponaqta'a't da sonaqtaigui da lo'onataxanaxac Ñim Lo'onatac 'Enauacna, huaña, nache ñeỹomaxagui ca dalaxaic lataxa.»

²⁶ Ime, nache do'onaxaata'ape, qaq co'ollaq ime, nache nqo'ooreuga aso qaỹoqotcheguemec 'alhua maye nanqa' ana Olivo.

So Pedro ỹan da la'aqtac da saishet da ỹaxanec So Jesús

²⁷ Qaq co'ollaq ivireugalo aso saqaỹoqotcheguemec 'alhua maye nanqa' ana Olivo, nache So Jesús 'enapegalo soua lapaxaguenataqa, 'eeta': –'Enauac da qoñiita deqat da qanaquitaxaqui Aỹem. Cha'aye ne'enaua ñiyigui'she maye nanettaleguete ana nere maye huetalec na la'aqtacpi Ñim Lo'onatac 'Enauacna, 'eeta': «Salauat qome ñim ilotague' ana qagueta, nache anamayepi datauec qataq ỹataqta nlagaxattac.»

²⁸ Qalaxaye qom ỹoltaq Aỹem ỹe'eguelaxatem da ica'alaxa Ñim Lo'onatac 'Enauacna, nache Aỹem sa'auta'a qome ye 'alhua Galilea.

²⁹ Nache so Pedro 'enapego' Somaye, 'eeta': –Na'aictoxo' da 'enauac 'am qaỹalata'a't, qalaxaye aỹem saishet da 'am salat.

³⁰ Nache So Jesús ỹasategueto' somaye, 'eeta': –Pedro, 'am saishet da 'eesa de'era 'ara'aqtac; cha'aye qom yaqta'a da qaltaq ỹe'eguelaxalec da nỹen ca 'olgaxa, nache 'am mashe tres qome da 'avi'eguelaxalec da qonetega Aỹem sa 'auauatton.

³¹ Qalaxaye so Pedro ỹataqta ỹe'eguelaxattalec da la'aqtac, 'eeta': –Na'aictaxa da aỹem qaỹalauat, qalaxaye saishet qome da shenapec da 'am sa sauatton. Nache soua lỹa't napaxaguenataqa, ima'ague de'era la'aqtac somaye.

So Jesús nqouagaxaueetac souaxat da ỹataqta ỹaguec da laquicoxo

³² So Jesús qataq soua lapaxaguenataqa nqo'oora ye 'alhuolec le'enaxat Getsemaní, qaq huaña yemaye, nache So Jesús 'enapegalo soua lapaxaguenataqa, 'eeta': «Qoviita'a ne'ena qome, Aỹem qalaxaye saicra'atai' da ñeqouagaxauen.»

³³ Nache So Jesús iỹaxanalo soua Pedro, Santiago qataq so Juan da yaqto' nnaicapegueto. Huaña, nache nvi' da ỹataqta lta'araic laquicoxo,

³⁴ nache 'enapegalo se'esoua tres, 'eeta': «Aỹem ỹataqta lta'araic da ỹaquicoxo qataq ñanomteguet da saỹa'a da ileuaxa; qoviita'a qome ne'ena, qalaxaye saishet da qauo'oche.»

^35-36 Nache So Jesús taỹa cam qaỹata'a cam huetra'a soomaye, nache ỹa'alyiñi naua l-llectel qataq nqapaxaneguet na 'alhua da nqouagaxaunot Ñim Lo'onatac 'Enauacna, 'eeta': «¡'Am Ita'a! 'Onaxaictaxa da saishet da Aỹem 'apagaqna'aguet da ñeque'eenaxac. Cha'aye 'am qaica ca 'auqalanapec. ¡Cha'aye Aỹem ỹataqta huo'o da iyaxa da sa sevireguet da ñeque'eenaxac! Qalaxaye saishet qome da ipacchigui da maiche sheetapeguec, nachaqcata cam maiche qonetapeguec.»

³⁷ Qaq So Jesús co'ollaq ỹe'eguelaxa ca hueta'a soua tres lapaxaguenataqa, nache ilaleguete da do'ochete', nache 'enapego' so Pedro, 'eeta': «Simón, ¿mashe 'auo'ocheta? ¿Ỹataqta ña sa 'auañoxot peta'a, da cara'acolec da 'anlotauec?

³⁸ Saishet qome da qauo'oche; qanqouagaxauñi yaqto' ishet da qauataiỹa'aguet da qañe'eguenataguiiqui maye saqaỹapeque. Qami' qauauoitaique da qauo'oche ca ỹaỹamaqchiguiñi, qalaxaye sa qauañoxoche da ndotec da maiche qara'añaxaqui.»

³⁹ Nache So Jesús qaltaq ỹe'eguelaxa ca nqouagaxaunaqa', nache qaltaq nqouagaxauen, ipagaqchiichigui so hua'auchiguiñi la'aqtac.

⁴⁰ Ime, nache qaltaq ỹe'eguelaxa cam huetra'a soua tres lapaxaguenataqa, nache ỹoltaq ilaleguete da do'ochete', cha'aye sa nalo'ogueta na lo'ochaqa', cha'aye ỹataqta nasamyiñi. Nache So Jesús nquetoxo'n soomaye, qalaxaye soomaye sa ỹaỹate'n ca la'aqta'c.

⁴¹ Qaq co'ollaq mashe ivi' da tres da ỹe'eguelaxa ca hueta'a naxa da nqouagaxaueetac. Nache co'ollaq ñe'eguelaq. Nache 'enapegalo', 'eeta': «¿Ñaq 'eetalec da qanmacheeteguec qataq qauo'ocheeta? ¡Qoñiisheguem! Mashe anacta na shiỹaxauapi qauemaicpi da ỹaconeua'a Aỹem, Aỹem Shiỹaxaua Llalec.

⁴² Qoñiisheguem qome, nache Aỹem qauca'acheegue, 'ena cha'aguet mashe anacta na Aỹem ỹaneuo.»

So Jesús qaỹaconeua'a da qaicoñe'

⁴³ Qaq ña detaqtac So Jesús co'ollaq nvi' so Judas maye nacheso som 'oonolec soua doce lapaxaguenataqa. Qaq ỹataqta qalota so huataxanaqpi nnaictague', somayepi huota'a na lainecpi qataq na nponpi 'epaq. Qaq somayepi, nache lamaxashec nam lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna, qataq nam dapaxaguenataxaatapeguec na namaxasoxonaxacpi qataq na nqueroxonecpi maye lataxala'pi na judiopi.

⁴⁴ Qaq so Judas mashe ỹan so la'aqtac, 'eeta': –Cam ñapigoxoi', qaq nacheca ca Jesús. Qauacoñiiua'a qome, nache qauaviqui da qaucoñiye.

⁴⁵ Nache so Judas nquigueua'a So Jesús, nache 'enapego', 'eeta': «¡'Am Napaxaguenataxanaq!» Nache napigoxoi'.

⁴⁶ Nache so huataxanaqpi ỹaconeua'a So Jesús, nache ỹauec da icoñi'.

⁴⁷ Qalaxaye huo'o som 'oonolec som hueta'a yi'iye nqatsheguem so lainec, nache iquesoxouec aso ltela so l-latac som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna.

⁴⁸ Nache So Jesús inattaco' so shiỹaxauapi, 'eeta': –¿Ta'ainco' da qauanaqui da qauauoita'a na qa'ainaqalli' qataq na qanpoñi, 'eeta'amo' da Aỹem laataxanaxaic?

⁴⁹ 'Enauaque naua na'axa'te da sapaxaguenataxaatac sootaigui añi no'onaxanaxaqui late'erai, qaq saishet da Aỹem qauacoñiiua'a da Aỹem qaucoñiye. Qalaxaye 'enauac de'era iuen da huo'o, da yaqto' ipacchigui 'enauac na nanettalec ana nere maye huetalec na la'aqtacpi Ñim Lo'onatac 'Enauacna.

⁵⁰ Nache 'enauaque soua lapaxaguenataqa datare'c, no'onaxatchiguilo So Jesús.

⁵¹ Huo'o so nsoq ca'attague' So Jesús, somaye ỹataqta ndoteguet so napotaña nacanec hualoxolaỹi. Qaq co'ollaq so huataxanaqpi huotaique da ỹaconeua'a somaye,

⁵² nache somaye ỹasaxauec so nacanec, nache datauec, qalaxaye huetauec.

Da nmitaguec So Jesús

^53-54 Qaq so Pedro ca'attaueegue co'ollaxa So Jesús, qalaxaye qaỹoqteguet, choche ivittaua'a ca nqasoxoc som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna. Qaq huaña yemaye, nache nso'ootañi ỹalectaigui so huataxanaqpi, ntootapigui so norec. Qaq som icoñi' So Jesús ỹauegueua'a Somaye som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna. Qaq nache hueta'a 'enauac so laỹepi ntaxaỹaxanaxanecpi, qataq na lataxala'pi na judiopi qataq na dapaxaguenataxaatapeguec na nqataxacpi.

⁵⁵ Nache som lataxala'pi na ntaxaỹaxanaxanecpi qataq 'enauac na 'amaqtaqaicpi nta'alpi maye nmit na nasouaxashetpi, somayepi nmittaique ca shiỹaxaua da ishet da ỹasaxalec ca la'aqtac saq 'en So Jesús, da yaqto' ỹachegoxotchigui da ỹaneguet ca nalaataguec Somaye. Qalaxaye saishet da ỹanata.

⁵⁶ Qalota so naua'a So Jesús da choche nachetauo da latenataxanaxac, qalaxaye dataỹa'a't 'enauac da la'aqtaxanaxac somayepi.

⁵⁷ Qataq huo'o na nachaañi da datenataxan, nache ỹasaxalec nam saq 'en lasouaxashetpi, 'eeta':

⁵⁸ «Qomi' sa'axasoqchigui da Jesús da 'eetega ishet da nlaxaañi añi no'onaxanaxaqui late'erai maye qaro'onata. Damaye 'eetega da ishet da tres na'axa'te, nache ishet da qaltaq no'oxoosheguem aca lỹa no'onaxanaxaqui, sa iuen da huo'o ca itauan.»

⁵⁹ Qalaxaye ñaqaiyeta sa natena't na na'aqtaxanaxacpi maye qoỹeetega lasouaxashet So Jesús.

⁶⁰ Nache som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna, nachaañi, nache inat So Jesús, 'eeta': –¿'Aua'aqchigui peta'a nam qoỹeetega 'arasouaxashetpi? ¿Ca 'eetec ca 'ara'aqtac da 'auataỹa'aguet namayepi?

⁶¹ Qalaxaye So Jesús ỹe'emaqtom, saishet da ỹasat. –Nache som lta'a na ntaxaỹaxanaxanecpi da qaitaxaỹapegue' Ñim Lo'onatac 'Enauacna qaltaq ỹe'eguelaxalec da inat, 'eeta': –¿Peta'a nache 'am maye 'am Lca'aguishec Ñim Lo'onatac 'Enauacna, qataq 'am Llalec Ñimaye, maye 'enauac da qaỹo'oxoreetac?

⁶² Nache So Jesús ỹasateguet somaye 'enapeco': –Aja', Nachaỹem. Qaq qami' qauloỹa'aguet qome Aỹem Shiỹaxaua Llalec, da ñanac da sootalec ca lo'oc na piguem, ñanactaigui da la'añaxac qataq da 'enec Ñim Lo'onatac 'Enauacna maye qaica ca ỹaqalanapec.

⁶³ Nache co'ollaq hua'axaỹa de'era som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna, nache somaye ncolaxata'aisalo soua alogo. Damaye naigui da ỹachaxan da layeloxo. Nache 'enapeco': –Mashe sa seuenaq ca lỹa da da'aqtaxan.

⁶⁴ Ye damaye 'eetega da nachera dam Lo'onatac 'Enauacna. Qaq ¿ca 'eetec damaye? ¿Ca 'eetec ca qara'aqtaqui? –Nache somayepi 'enauac da nasara'a't da So Jesús iuen da qaỹalauat.

⁶⁵ Huaña, nache huo'o na nqaigoqot So Jesús, qataq huo'o na ỹaxachigui na lashec Somaye, nache iuaxaatac, qataq 'eetega, 'eeta': «¡Ña 'aua'axat, chaq negue't na 'am iuaxaatac!» Nache so huataxanaqpi maye ilotague' aso no'onaxanaxaqui late'erai somayepi pa'aiguet da iuaxaatac So Jesús, iuaxaatapoigui na lashec.

So Pedro nqoleguet da ỹauatton So Jesús

⁶⁶ Qaq co'ollaq ñaq qanayeetaigui de'era, nache so Pedro ñaq hueta'a so nqasoxoc so lma' so nta'a. Nache nvi' aso lamaxashe som lataxala' na ntaxaỹaxanaxanecpi,

⁶⁷ nache ila'a somaye da ntootapigui so norec, nache ilotot, ime nache inattaco', 'eeta': –'Am, nache 'eetai' naxa da qoueta'aguet se'eso Jesús, som ỹale maye Nazaret le'ec.

⁶⁸ Nache so Pedro 'enapeco': –Aque', sa sauatton, qataq sa saỹaten cam qonetega. Ime, nache nqo'oneuga so ñegueuo so qasoxoc. Nache huaña, yemaye nache nỹen so 'olgaxa.

⁶⁹ Qaỹata'ague, nache aso namaxashe qaltaq ỹe'eguelaxalec da ila'a so Pedro, nache 'eetega nam hueta'a yi'iye, 'eeta': –De'era ỹale nachera da 'oonolec nam ca'attague' So Jesús.

⁷⁰ Qalaxaye so Pedro qaltaq nqoleguettac. Qaq co'ollaq qaỹata'ague, nache nam hueta'a yemaye qaltaq 'eetega somaye, 'eeta': –'Am ỹoqta 'eesa da, nache 'araỹepi nam ca'attague' So Jesús, cha'aye 'am nataqa'en 'auachegaqa'ague da Galilea.

⁷¹ Nache so Pedro ỹataqta na'axannec da la'aqtac da ỹasateguet somayepi, 'eeta': –¡Mashe sheetega mque' da sa sauatton que'eca ỹale! ¡Ñim Lo'onatac 'Enauacna ỹauo'o ca ñeuaxanaguec qom saishet da 'eesa da ñasaxauec!

⁷² Huaña, nache so 'olgaxa ỹe'eguelaxalec da nỹen. Nache so Pedro tachigui lauel da la'aqtac co'ollaxa So Jesús, co'ollaq, 'eeta': «Qom yaqta'a da dos ỹe'eguelaxalec da nỹen ca 'olgaxa, qaq mashe ivi' qome da tres da 'avi'eguelaxalec da qonetega Aỹem sa 'auauatton.» Nache somaye co'ollaq tachigui lauel de'era, nache nỹeetac, cha'aye ỹataqta ỹaguec da laquicoxo.